Jetisý oblysy Sarqan aýdanynyń aýyldarynda qatarynan úsh áleýmettik mańyzy bar nysan iske qosyldy. Shekaralas Amanbókter aýylynda 500-den astam turǵyny bar jańa blokty-modýldi medısınalyq pýnkt pen aýyldyq ákimdik paıdalanýǵa berildi. Dál osyndaı medısınalyq pýnkt 600-den astam adam turatyn Abaı aýylynda da el ıgiligine usynyldy, - dep habarlaıdy Jetisý oblysy ákiminiń baspasóz qyzmeti.
Amanbókter men Abaı aýyldaryndaǵy 60-shy jyldary salynǵan burynǵy eki medısınalyq pýnkt te qazirgi sanıtarlyq normalarǵa sáıkes kelmeıtin.
- Búginge deıin medısınalyq kómek 1965 jyly salynǵan ǵımaratta kórsetilip keldi. Bul biraz qolaısyzdyq týǵyzdy. Endi qajetti jabdyqtary bar, jańa, zamanaýı medısınalyq mekemede medısınalyq qyzmet kórsetýdiń de sapasy artady. Ǵımarat jyly, jaryq, jaıly, munda jumys isteý de qolaıly, - dedi densaýlyq saqtaý salasynyń ardageri, Amanbókter aýylynyń turǵyny Kúlpash Jantelova.
1974 jyly salynǵan Amanbókter aýyldyq ákimdigi apatty jaǵdaıda bolǵan. Endi jańa ǵımarat barlyq talaptarǵa saı keledi, mamandar úshin yńǵaıly jumys kabınetteri qarastyrylǵan.
Jańa blokty-modýldi medısınalyq pýnkt saltanatty túrde ashylǵan Abaı aýylynyń turǵyndary da rıza.
- Turǵyndar ǵana emes, biz de qýanyshtymyz. Óıtkeni, materıaldyq baza eskirgende, oǵan qosa ǵımarat sanıtarlyq normalarǵa sáıkes kelmese sapaly medısınalyq kómek kórsetý de qıyn. Endi, mine, jańa medısınalyq pýnkt salyndy. Munda alǵashqy, jedel medısınalyq kómek kórsetý, skrınıng, vaksınasıa júrgizý, balaly áıelderdi tekserý, naýqastardy ortalyq aýrýhanaǵa jiberý, patronaj uıymdastyrý jumystaryna qajetti jaǵdaı bar, - dedi Abaı aýylyndaǵy medpýnkttiń aǵa medbıkesi Jamal Dolanbaeva.
Jalpy ótken jyly Sarqan aýdanynda Eshkiólmes, K. Qazybaev jáne Birlik aýyldarynda 3 blokty-modýldi medısınalyq pýnkt iske qosylǵan, sondaı-aq bıyl Cherkask aýylynda dárigerlik ambýlatorıa paıdalanýǵa berildi.