Prezıdent Qasym-Jomart Toqaev Qazaqstannyń bilikti jastarynan quralǵan jańa elıta jasaqtaý jaıyn saılaýaldy «Igilik barshaǵa! Sabaqtastyq. Ádildik. Órleý» dep atalatyn baǵdarlamasynda aıtqan bolatyn. Ol úshin daryndy jastardy qoldaıtyn Prezıdenttik kadrlyq rezerv qurylatynyn da málimdegen edi. «Memlekettik qyzmettiń barlyq deńgeıinde jańa daryndy basqarýshylardy qoldaý úshin Prezıdenttik kadrlyq rezerv qurylady. Bizdiń jastar - óte daryndy ári kreatıvti, maqsatqa umtylyp turady. Sol sebepti, Qazaqstannyń bolashaǵy senimdi qolda dep aıta alamyn», - degen bolatyn memleket basshysy. Bolashaqta Qazaqstannyń basqarýshy elıtasy quramyna ázirshe 300 jas mamandy iriktep alý josparlanǵan.
QR Memlekettik qyzmet isteri agenttiginiń baspasóz qyzmeti Prezıdenttiń kadrlyq rezervine irikteýdiń qyrkúıek aıynyń birinen bastalatynyn jarıalady. Ózderiniń baqtaryn synap kórgisi keletin jastarǵa arnap rezervke ótkisi keletinderge qoıylatyn talaptardy tómende tolyq jarıalap otyrmyz.
Prezıdenttik kadr rezervi aldaǵy reformalardyń lokomotıvi bolatyn jastar úshin ashyq jáne tıimdi áleýmettik lıftti qurý maqsatynda qalyptastyrylady.
Jasy 35-ten astam emes, joǵary bilimi jáne 5 jyldan kem emes jumys ótili bar Qazaqstan Respýblıkasynyń azamaty irikteýge qatysa alady.
Bul rette Prezıdent taǵaıyndaıtyn memlekettik saıası qyzmetshiler irikteýge qatyspaıdy.
Azamattar Prezıdenttik kadr rezervine 3-jyldyq merzimge alynady. Osy kezeńniń ishinde tıisti bos oryn bolǵan jaǵdaıda adam saıası nemese joǵary basqarýshy ákimshilik laýazymyna, ulttyq basqarýshy holdıńterdiń nemese kompanıalardyń joǵary basqarýshy laýazymyna taǵaıyndalýy múmkin.
Prezıdenttik rezervten taǵaıyndaýdy kózdeıtin laýazymdar qyzmettiń baǵyttaryn eskerýimen toptastyrylǵan:
laýazymdardyń salalyq toby:
(mınıstrler, olardyń orynbasarlary,
oblystardyń, respýblıkalyq mańyzy bar qalalardyń, astananyń ákimderiniń birinshi orynbasarlary men orynbasarlary;
ortalyq atqarýshy organdar komıtetteriniń tóraǵalary;
ulttyq basqarýshy holdıńterdiń basqarmalarynyń, ulttyq holdıńterdiń, ulttyq kompanıalardyń tóraǵalary jáne músheleri);
Salalyq laýazymdardyń toby qyzmettiń mynadaı baǵyttaryn qamtıdy:
ekonomıkalyq saıasat jáne memlekettik josparlaý;
áleýmettik saıasat;
ınfraqurylymdy jáne rezervti damytý;
syrtqy saıasat;
quqyqtyq saıasat pen qaýipsizdik;
óńirlik laýazymdardyń toby:
(oblystardyń, respýblıkalyq mańyzy bar qalalardyń, astananyń ákimderi;
oblystyq mańyzy bar qalalardyń, oblystar aýdandarynyń jáne qalalardaǵy aýdandardyń ákimderi);
ákimshilik laýazymdardyń toby:
(ortalyq atqarýshy organdardyń jaýapty hatshylary;
ortalyq memlekettik organdardyń apparat basshylary;
jaýapty hatshy laýazymy engizilmegen ortalyq atqarýshy organdar apparattarynyń basshylary;
oblystardyń, respýblıkalyq mańyzy bar qalalardyń, astananyń ákimderi apparattarynyń basshylary).
Laýazymdar tobyn tandaý aldaǵy kandıdat jobasynyń taqyrybyn aıqyndaıdy, sondaı-aq Prezıdenttik rezervke alynǵan jaǵdaıda laýazymǵa taǵanıyndaý kezinde eskeriledi.
Prezıdenttik rezervke kandıdat birqatar kezeńderden ótedi.
Birinshi. Qatysý úshin qujattardy tapsyrý
Qujattardy tapsyrý rásimi avtomattandyrylǵan.
Usynylǵan málimettiń jáne qujattardyń shynaılyǵy irikteýdiń árbir kezeńinde tekseriledi.
Ekinshi. Kandıdattardyń teorıalyq bilimderin testileýden ótý
Testileýden ótý rásimi avtomattandyrylǵan, onlaın-rejıminde ótkiziledi.
Testilik tapsyrmalar kandıdattyń teorıalyq taıyndyǵyn, taldamalyq jáne syn turǵysynan oılaý deńgeıin anyqtaýǵa baǵyttalǵan.
İrikteýdiń kelesi kezeńine jiberiletin eń joǵary nátıjelerdi kórsetken kandıdattardyń sanyń Kadr rezervi jónindegi ulttyq komısıasy aıqyndaıdy.
Úshinshi. Berilgen taqyrypqa esse jazý
Esse jazý rásimi avtomattandyrylǵan, onlaın rejıminde ótkiziledi.
Esse jazý barysynda kandıdattardyń saýattylyǵy, qısyndylyǵy jáne dáleldiligi, túıinderdiń negizdiligi, usynystary baǵalanady.
Esse jazý ýaqyty men kólemi shekteýli.
Tórtinshi. Salalyq komısıalardyń aldynada jobany usyný
Jobanyń taqyryby irikteýge qatysý úshin qujat tapsyrǵanda kandıdat tańdaǵan laýazymdar tobyna sáıkes kelýi qajet.
Kezeń jobalardyń beıneprezentasıasy formatynda ótkiziledi.
Joba tıisti salaǵa qatysty ózekti máseleni, ony sheshý boıynsha usynystardy, tásilderdiń negizdemelerin qamtý qajet.
Besinshi. Qundylyqtardy, motıvasıany jáne quzyretterdi baǵalaýdy ótý
Bul kezeń kandıdattardyń jeke qundylyqtaryn, memlekettik qyzmette jumys isteý motıvasıasynyń deńgeıin, sondaı-aq basqarýshylyq quzyretterin aıqyndaýǵa baǵyttalǵan.
Baǵalaýdy sarapshylar ótkizedi.
Altynshy. Saraptamalyq komısıada áńgimelesýden ótý
Komısıa Prezıdent Ákimshiliginiń beıindik bólimderi meńgerýshileriniń qatysýymen Prezıdent Ákimshiliginiń Basshysy Orynbasyrynyń tóraǵalyǵymen qalyptastyrylady.
Saraptamalyq komısıa otyrysynyń nátıjeleri boıynsha Kadr rezervi jónindegi ulttyq komısıanyń qaraýyna usynylǵan barynsha daıarlanǵan kandıdattardyń tizimi qalyptastyrylady.
Jetinshi. Kadr rezervi jónindegi ulttyq komısıada áńgimelesýden ótý
Ulttyq komıssııada Prezıdent Ákimshiliginiń Basshysy tóraǵalyq etedi.
Komısıanyń otyrysy nátıjesinde kandıdattardy Prezıdenttik rezervine alý sheshimi qabyldanady.
Rezervtegi adamdardy laýazymǵa taǵaıyndaýdan buryn olardy oqytý kózdeledi.
Oqý sheńberinde atalǵan adamdar halyqpen jumys isteýge, halyqtyń aldynda sóıleýge, belgisizdik jaǵdaıda jumys isteýge qajetti quzyretterdi ulǵaıtý maqsatynda memlekettik organdarda jáne uıymdarda taǵylymdamadan ótedi.
photo: mfa.gov.kz
