Kóptegen salalar boıynsha jalpy jahanda bolyp jatqan sony ózgeristerdi álemniń maıtalman mamandary bes kún boıy Nur-Sultan qalasynda talqyǵa saldy. Al 40-tan astam elden kelgen 500-den astam delegat jıyn kórkine aınaldy. Nazarbaev Ýnıversıtetinde ótken The Harvard College Project for Asian and International Relations 2019 Asia Conference (HPAIR 2019 Asia Conference) halyqaralyq konferensıasy búgin jumysyn aıaqtady.
Uıymdastyrýshylardyń aıtýynsha, HPAIR Asia Conference 2019 Konferensıasy – bes kúndik halyqaralyq jastar konferensıasy, 1991 jyldan bastap Azıanyń iri qalalarynda (12 túrli elde 43 konferensıa) ótkizilip kelgen. Al mańyzdy konferensıa jalpy Ortalyq Azıada tuńǵysh ret ótkizildi. Konferensıany Garvard ýnıversıtetiniń Óner jáne ǵylym fakúlteti janyndaǵy komersıalyq emes HPAIR uıymy Nazarbaev Ýnıversıtetimen birlesip uıymdastyrdy. Alqaly jıynnyń maqsaty — Azıa aldynda turǵan eń mańyzdy ekonomıkalyq, saıası jáne áleýmettik máselelerdi talqylaý jáne zertteý úshin stýdentter men jas mamandar arasynda tájirıbe almasý úshin pikirtalas platformasyn qurý.
Konferensıanyń bıylǵy jylǵy taqyryby – «Passion for change» («Ózgeristerge qumarlyq»), onyń aıasynda alty baǵyt boıynsha ártúrli pikirtalastar men talqylaýlar ótti: jahandyq naryq jáne ekonomıka; óner, BAQ jáne mádenıet; áleýmettik saıasat jáne áleýmettik ádilettilik; energetıkalyq jáne ekologıalyq turaqtylyq; memlekettik basqarý jáne geosaıasat; ǵylym jáne tehnologıalar.
Konferensıa spıkerleri arasynda – halyqaralyq kompanıalardyń basshylary, belgili ınflúenserler, túrli salalardaǵy qoǵam qaıratkerleri, sonyń ishinde UNICEF Koreıa prezıdenti, doktor Song San Hen, Úndistannyń burynǵy syrtqy ister mınıstri Nırýpama Rao, Taıaý Shyǵys jáne Soltústik Afrıka úshin jahandyq naryqtar boıynsha Standard Chartered Bank burynǵy basshysy – Denıel Assı, álemdik Nobel syılyǵynyń ıegeri – Rae Kvon Chýng, McKinsey & Company aǵa seriktesi jáne McKinsey Dúnıejúzilik ınstıtýtynyń dırektory – Djonatan Votsel, World Bank Group bas tehnıkalyq dırektory – Leslı Go, Sıngapýrde negizdelgen ońtústik-shyǵys Azıanyń Bain & Company seriktesi – Tıl Vestrıng, Halyqaralyq valúta qorynyń Azıa-Tynyq muhıty óńirine arnalǵan óńirlik bólimshesiniń dırektory – Chıkahısa Sýmı, Indonezıanyń burynǵy Qarjy mınıstri jáne Indonezıanyń ınfraqurylym ınstıtýtynyń tóraǵasy – Chatıb Basrı, Vashıngtondaǵy CN jáne Nú-Iorktegi ABC News, Ystambuldaǵy Channel News Asia jáne Berlındegi Deutsche Welle TV sıaqty jańalyqtar uıymdarynda jumys istegen telejúrgizýshi, kásibı moderator ári jýrnalıs Alı Aslan jáne basqalar boldy.
Konferensıaǵa qatysýshylar arnaıy daıyndalǵan oıyn-saýyq keshteri men aýqymdy keıs-chempıonattarǵa da qatysty. Baǵdarlama aıasynda halyqaralyq tún (I-Night) jáne mádenıet pen dástúr karnavaly (I-Carnival) ótkizildi. I-Night – bul halyqaralyq mádenıet merekesi, onda túrli elderden kelgen delegattardyń biregeı mýzykalyq, teatrlyq jáne bı kórinisteri kórsetiledi. I-Carnival – halyqaralyq jármeńke formatynda ótetin dástúrli HPAIR is-sharasy, onda kelýshiler dástúrli taǵamdardyń dámin tatyp, konferensıa delegattary usynǵan ulttyq kádesyılardy satyp ala alady. I-Night jáne I-Carnival álemniń túrli halyqtarynyń ókilderi arasyndaǵy yntymaqtastyqty nyǵaıtýǵa yqpal ete otyryp, álemniń mádenı ártúrliligin bildiredi.
Konferensıa aıasynda ótetin dástúrli mádenı merekelerden basqa HPAIR Asia Conference 2019 uıymdastyrý komıteti Kazakhstan Night is-sharasyn ótkizip, qonaqtarǵa qazaq mádenıetin dástúri men tarıhyn, mýzykasyn tanystyrdy.
Impact Challenge formatyndaǵy keıs-chempıonat baıqaýy konferensıa qatysýshylaryna túrli oblystardan, áleýmettik saıasat pen ındýstrıadan alynǵan tájirıbelik keıster, bıznes pen halyqaralyq qatynastarǵa deıingi máselelerdi sheshe otyryp halyqaralyq kompanıalar men uıymdardyń ekojúıesine enýge múmkindik berdi. Qatysýshylar osy is-shara barysynda baı jáne baǵa jetpes óz ıdeıalary men tájirıbelerin biriktire otyryp ózara baılanys jáne breınshtormıng tájirıbesimen almasýǵa biregeı múmkindik bolyp tabylady. «Impact Challenge» ereksheligi – bul usynylǵan keıster Orta Azıa, TMD jáne álem elderi óńirleri aldynda turǵan naqty problemalar men syn-qaterlerge baılanysty bolady. Osylaısha, “Impact Challenge” – bul jastar kózimen jahandyq deńgeıde áleýetti jáne standartty emes sheshimderdi tabýdyń múmkindigi.
Osy bedeldi halyqaralyq konferensıany Qazaqstanda ótkizý jónindegi stýdentterdiń bastamasyn qoldaǵan HPAIR Asia Conference 2019 demeýshileri “Qazmyrysh” JSHS, Eurasian Resources Group (ERG), Chevron jáne Microsoft sıaqty uıymdar boldy.
Al aqparttyq demeýshiler arasynda ULYS aqparattyq jýrnaly men ulys.kz saıty bolǵanyn maqtanyshpen aıta ketýimiz kerek.
Sýretterdiń birazy https://nu.edu.kz/kk/ saıtynan alyndy.
