Búgin fýtzaldan Qazaqstan ulttyq quramasy Ózbekstanda ótip jatqan álem chempıonatynyń shırek fınalynda 2016 jylǵy jahandyq dodanyń jeńimpazy – Argentına fýtzalshylarymen oınaıdy. Mach elorda ýaqytymen saǵat 20:00-de bastalady. Oıyn Tashkenttegi «Hýmo Arena» sport kesheninde ótedi.
Qazaqstan quramasy álem birinshiliginiń toptyq kezeńinde Ispanıa, Jańa Zelandıa jáne Lıvıa quramalarymen D tobynda oınady. Úsh týrda 7 upaı jınap, toptan ekinshi orynmen pleı-off kezeńine joldama aldy. 1/8 fınalda 2021 jylǵy álem chempıonatynyń jeńimpazy Portýgalıa quramasynan basym túsip (2:1), shırek fınalǵa joldama aldy.
Argentına fýtzalshylary S tobynda Ýkraına, Aýǵanstan jáne Angola quramalarymen synǵa túsip, 9 upaımen óz tobynda kósh bastady. Al pleı-off kezeńinde Horvatıany 2:0 esebimen jeńip, shırek fınalda Qazaqstanǵa qarsylas atandy.
Qazaqstan men Argentına fýtzalshylary búginge deıin eki márte kezdesip, eki qurama bir-bir márteden jeńiske jetken. 2016 jylǵy álem chempıonatynyń toptyq kezeńindegi alǵashqy oıynda argentınalyqtar 1:0 esebimen jeńiske jetse, jýyrda ǵana Almatyda uıymdastyrylǵan joldastyq kezdesýde bizdiń jigitter 3:2 esebimen basym tústi.
Aıta ketsek, fýtzaldan Qazaqstan ulttyq quramasy 2016 jylǵy Eýropa chempıonatynyń qola, Azıa chempıonatynyń kúmis jáne qola júldegeri (1999, 2000). 2021 jyly Lıtvada ótken álem chempıonatynda 4-oryn aldy. Sondaı-aq qatarynan tórtinshi márte álem chempıonatyna qatysyp keledi (2000, 2016, 2021 jáne 2024).
