Qazaqstan musylmandarynyń dinı basqarmasy kópshilikke úndeý joldady.
«Ózderińiz kóz jetkizip otyrǵandaı, elimizde tótenshe jaǵdaı merzimi aıaqtalǵanymen, juqpaly indettiń qaýpi tolyq seıilgen joq. Bul – karantın rejıminiń talaptaryna baǵynyp, saqtyq sharalaryna asa mán berýimiz qajet degen sóz. Qazaqstan musylmandary dinı basqarmasy Bas sanıtarlyq dárigerdiń karantındik rejımniń kezeńdik talaptaryn saqtaý boıynsha qaýlysyn negizge alyp jáne qazirgi jaǵdaıdy eskere kele, jamaǵatpen oqylatyn bes ýaqyt, juma, taraýyq namazdaryna qatysty qoıǵan ýaqytsha shekteýdi óz kúshinde qaldyrdy. Koronavırýs ınfeksıasynyń taralýyna jol bermeý jónindegi jedel shtabtyń qaýlysyna sáıkes osyndaı sheshim qabyldandy. Al jamaǵatpen oqylatyn namazdardyń merzimin aldaǵy ýaqytta qosymsha habarlaımyz» delingen úndeýde.
Bıylǵy Ramazannyń qasıetti Qadir keshi mamyr aıynyń 19-nan 20-na qaraǵan túnge sáıkes kelip otyr. 19 mamyrda meshit tańǵy saǵat 07:00 men keshki 20:00 aralyǵynda jumys isteıdi.
«Osy rette barshańyzdy Qadir keshin óz úılerińizde ótkizý qajettigin qaperlerińizge salamyz. Tártipke baǵynýdy suraımyz. Bul – siz ben bizdiń, óz otbasymyz ben eń jaqyn týystarymyzdyń densaýlyǵy men ómiriniń ıgiligi úshin qabyldanǵan sheshim. Osy úndeýge túsinistik tanytyp, karantın talaptaryn saqtaısyzdar degen senimdemiz. Osy rette barsha qaýymdy qasıetti Qadir túninde Túrkistan oblysyndaǵy tasqyn sýdan zardap shekken jerlesterimizge duǵa jasaýǵa úndeımiz» dedi QMDB.
Qazaqstan musylmandary dinı basqarmasy qasıetti Qadir keshinde Quran hatym duǵasyn, ýaǵyz-nasıhat pen paıdaly dáristerdi onlaın rejımde ótkizedi. Úıde otyryp, onlaın rejımde duǵaǵa qatysyp, nasıhat tyńdaýǵa tolyq múmkindik bar.
