Sheteldegi qandastar arasynda qara úzip júrgen talaı talant bar. Solardyń biri Mońǵolıa elinde turatyn jas palýan — Serik Berdimuratuly. Qazaqstandaǵy jarystarǵa jıi qatysyp, jarqyrap kórinip kele jatqan sportshyny muqym qazaq jaqsy tanıdy. Endi mine, KAZNEWS.MN saıtynyń jazýynsha, búgin Ýlaanbaatar qalasynda sambodan eresekter arasynda ótken Mońǵolıa birinshiliginde óz salmaǵynda chempıon atanǵan.

Ótken apta ǵana dzúdo kúresinen Selenge aımaǵynyń Súhbaatar qalasynda erler men áıelder arasyndaǵy ótken Mońǵolıa  chempıonatynda 100 keli salmaqta beldesken Serik Berdimuratuly qarsylas shydatpaı altyn medal alǵan bolatyn. Serik Berdimuratuly jartylaı fınalda 2017, 2018 jylǵy el chempıony G.Altanabaganadan basym túsip, fınaldyq kezdesýde qarsylasy D.Serennámdy aıaqtan ilip shalý ádisi boıynsha vazarı upaıymen jeńgen edi. Al búgin mine, sambodan Mońǵolıa chempıony atandy. Esterińizge sala ketsek, Serik Berdimuratuly sambodan eresekter arasynda úshinshi ret el chempıony atanyp otyr. Ol, buǵan deıin 2014, 2017 jyldary chempıon bolǵan edi. Al dzúdo kúresi boıynsha Serik Berdimuratuly 100 keli salmaq boıynsha el birinshiliginiń 2017 jyly qola júldesine ıe bolǵan bolatyn. Osylaısha, ol Baıan-Ólgıı sport tarıhynda alǵash ret dzúdodan eresekter arasynda El chempıony atandy. Eki aptada eki salmaq boıynsha Mońǵolıa chempıony atanǵan qazaq balasyna ázirshe teń keler qarsylas joq.

Búgin «Otandastar» Qory birinshi vıse-prezıdenti Talǵat Adýov pen Halyqaralyq baǵdarlamalar ortalyǵynyń prezıdenti Janbolat Meldeshov kezdesti. Taraptar bilim salasyndaǵy yntymaqtastyq týraly memorandýmǵa qol qoıdy. Bul týraly qordyń baspasóz qyzmeti aqparat taratty.

DIDAR BOLAT – «OTANDASTAR» QORY PREZIDENTİNİŃ KEŃESSHİSİ:  «Bolashaq» – stýdent jastardy Qazaqstanǵa jáne kerisinshe Qazaqstannan sheteldik joǵary oqý oryndaryna tartatyn negizgi uıymdardyń biri. Osyny negizge ala otyryp, biz kúsh biriktirgeli otyrmyz. Mundaǵy maqsat – shetelde turatyn qandastarymyzdyń qalaýynsha Qazaqstanda nemese sheteldiń áıgili joǵary oqý oryndarynda bilim alý múmkindigin qamtamasyz etý».

Jaqyn kúnderi «Otandastar» qory men Halyqaralyq baǵdarlamalar ortalyǵy ókilderiniń Mońǵolıa, Ózbekstan jáne Reseı Federasıasyna birlesken sapar jasaıdy.  Olar sheteldegi qandastarmen, dálirek mektep oqýshylarymen kezdesip, Qazaqstanda jáne sheteldik jetekshi joǵarǵy oqý oryndarynda bilim alý múmkindikteri jaıly aqparattandyratyn bolady.

DIDAR BOLAT – «OTANDASTAR» QORY PREZIDENTİNİŃ KEŃESSHİSİ:  «Kelesi aıda biz Mońǵolıaǵa, 120 myńǵa jýyq qazaq turatyn Baıan-Ólgeı aýdanyna attanamyz. Ondaǵy qandastarymyzdyń shamamen bir jarym myńy - bıylǵy mektep bitirýshi túlekter. Iaǵnı qazaqstandyq bilim ordalaryna túse alatyn áleýetti stýdentter. Máselen, ótken jyly Ózbekstannan Qazaqstanda bilim alýǵa 12 myń bala kelse, onyń 5 myńǵa jýyǵy – etnıkalyq qazaqtar. Olarǵa yńǵaıly tıimdi jaǵdaıdyń barlyǵy jasaldy. Aqtóbe ýnıversıteti bir jyl boıy tegin oqý múmkindigin usyndy. Mundaı baǵdarlamalar bizde kóp, tek qandastarymyzǵa aqparat kóp jaǵdaıda jetpeı jatady. Biz osy aqparattandyrý baǵytynda jumys isteıtin bolamyz».

«Otandastar» qory 2017 jyly Elbasynyń Dúnıejúzi qazaqtarynyń V-shi quryltaıynda aıtqan tikeleı tapsyrmasymen qurylǵan bolatyn. Qor qandastardy tarıhı otan tóńireginde birlestirýdi maqsat tutady. Jumys josparyndaǵy basym baǵyttarynyń biri – bilim salasy.

28-qarasha kúni «Otandastar qory» jáne «Dúnıejúzi qazaqtarynyń qaýymdastyǵy» shet elderdegi qazaq dıasporasynyń tarıhı Otanymen mádenı-gýmanıtarlyq jáne iskerlik yntymaqtastyǵyn odan ári damytý úshin jaǵdaı jasaý maqsatyndaǵy memlekettik tapsyrma aıasynda otandastardyń qatysýymen «Otandastar. Bolashaqqa baǵdar» atty Halyqaralyq dóngelek ústel ótkizedi.

Qordyń baspasóz qyzmetiniń habarlaýynsha, jıynǵa QR Premer-Mınıstriniń orynbasary  B. Saparbaev men QR aqparat jáne qoǵamdyq damý mınıstri D. Abaev qatysady. Eń basysy — halyqaralyq sharaǵa 20 eldegi qazaq dıasporalarynan 150 delegat keledi. «Otandastar Qory» KEAQ Prezıdenti N. Ábiqaev Qordyń iske qosqan jáne júzege asyrǵan jobalary,  olardyń nátıjeleri, otandastarmen jumystyń 2020 jylǵa arnalǵan jospary jaıly sóz sóıleıdi. Sonymen qatar, shet elderdegi qazaq qaýymdastyqtarynyń jetekshileri de óz uıymdary jaıly aıtady. Shara aıasynda dúnıejúzi qazaqtarynyń qaýymdastyǵy men Qor ókilderi qyzmetteriniń negizgi baǵyttary, onyń ishinde shet elderdegi qandastarmen mádenı-gýmanıtarlyq jáne iskerlik baılanysty keńeıtý ári nyǵaıtýdy kózdegen «Otandastar» qorynyń negizgi jobalarynyń biri «Qazaq úıi» Qazaq mádenı-iskerlik úıiniń quramyna kiretin iskerlik úıleri men mádenı ortalyqtarynyń  álem boıynsha jelisin qurý jospary talqylanady. Birlesken jumystyń naqty usynystary ázirlenedi. Qatysýshylarǵa Qazaqstannyń ınvestısıalyq áleýeti men óńirlerde bıznesti damytý úshin jasalǵan jaǵdaılar jaıynda aqparat beriledi.  «Atameken» iskerlik úıiniń paneldik sesıasynda İskerlik úıiniń maqsaty men mindeti, otandastardy konsýltasıalyq qoldaý ortalyǵynyń jumysy jaıly aıtylady. Shet elderde ótkizilgen bıznes forýmdar qorytyndylanady. Túrkıa, Shvesıa, Eýropa elderinen kelgen qandas kásipkerler sóz sóıleıdi. «QazAgro», «Báıterek» holdıńteri men «QazaqInvest» UAQ óz taraptarynan qandas kásipkerlerdi qoldaý múmkindikterimen bólisedi. Shet elderdegi qazaqtildi BAQ ókilderiniń qatysýymen ótetin paneldik sesıada shet elderdegi qazaqtildi BAQ pen jýrnalıserdiń ózara yntymaqtastyq máselesi talqylanady. «Abaı» mádenı ortalyǵynyń paneldik sesıasynda mádenı ortalyqtyń  maqsaty men mindeti, shet elderde qazaq mádenıeti men ónerin damytý, bilim berý jobalaryn iske asyrý, elimizde týrısik klasterdi damytý jáne elimizdiń týrısik tartymdylyǵyn arttyrý, barlyq elde qazaq ádebıeti ortalyǵynyń jelisin qurý máseleleri talqylanady. «Otandastar» Qorynyń jobasy – «Álemdegi tanymal qazaqtar týraly» kitaby men «Muzbalaq» anımasıalyq fılmi tanystyrylady. «Jas Qazaq» jastar klýbynyń paneldik sesıasynda shet elderdegi qazaq jastaryn tarıhı Otanyn aınalasyna shoǵyrlandyrý jáne olarǵa jan-jaqty qoldaý kórsetý,  dıasporalyq jáne jastar saıasaty salasyndaǵy ózara árekettestik jáne seriktestik aıasyn keńeıtý, jas belsendilerdi tanystyrý, dostyǵyn nyǵaıtý,  olardyń boıynda tarıhı Otanyna degen patrıottyq sezimderin qalyptastyrý, Qazaqstan Respýblıkasynyń barlyq jastar uıymdarynyń is-sharalaryna dıaspora ókilderin qatystyrý, ózara birikken jumys josparyn quryp, birlese jumys isteý máselesi talqylanady. «Qazaq eli» jastar klýby jumysynyń jospary bekitiledi.