Elbasy Nursultan Nazarbaev Ózbekstan Respýblıkasynyń Prezıdenti Shavkat Mırzıeevpen telefon arqyly sóılesti. Elbasy.kz saıtynda jarıalanǵan aqparǵa qaraǵanda, Nursultan Nazarbaev Shavkat Mırzıeevti týǵan kúnimen quttyqtap, zor densaýlyq jáne memlekettik qyzmetine tolaǵaı tabys, al baýyrlas Ózbekstan halqyna baq-bereke tilegen.
Sonymen qatar, saıttaǵy aqparatta «taraptar sońǵy jyldary qol jetkizilgen ýaǵdalastyqtardyń arqasynda Qazaqstan-Ózbekstan arasyndaǵy kópqyrly yntymaqtastyq tyń serpin alyp, jańa sapaly deńgeıge kóterilgenin atap ótti.
Ózara saýda kóleminiń artýymen jáne ekonomıkalyq qatynastardyń nyǵaıýymen qatar mádenı-gýmanıtarlyq baılanystardyń belsendi damyp kele jatqanyna nazar aýdaryldy. Atap aıtqanda, 2018 jyly Qazaqstandaǵy Ózbekstan jyly tabysty ótti, bıyl Ózbekstandaǵy Qazaqstan jyly aıasynda is-sharalar ótkizilýde.
Nursultan Nazarbaev pen Shavkat Mırzıeev kún tártibindegi óńirlik máselelerdi de talqylady.
Taraptar tatý kórshilik rýhynda jáne eki el halqynyń ıgiligi jolynda damyp kele jatqan Qazaqstan-Ózbekstan strategıalyq qatynastary odan ári nyǵaıa túsetinine senim bildirdi» dep jazylǵan.