Máskeýge jumys saparymen kelgen Qasym-Jomart Toqaev Táýelsiz Memleketter Dostastyǵy uıymyna múshe memleketter basshylary keńesiniń otyrysyna qatysty, dep habarlaıdy Aqorda.
Qazaqstan Prezıdenti dástúrli qonaqjaılyǵy jáne Reseıdiń TMD-ǵa tóraǵalyq etý barysynda nátıjeli jumys atqarǵany úshin Vladımır Pýtınge alǵys aıtty.
Memleket basshysy 1991 jyly Almaty Deklarasıasynyń negizinde qurylǵan TMD-nyń áleýetin bedeldi halyqaralyq uıym retinde odan ári nyǵaıtý Qazaqstan úshin basty basymdyqtyń biri ekenine nazar aýdardy.
«Ótken ǵasyrdyń 90-jyldarynda Balqan túbegindegi sekildi kúrdeli jaǵdaılarǵa postkeńestik aýmaqta jol berilgen joq. Munda Táýelsiz Memleketter Dostastyǵynyń úlesi zor deýge bolady. Sondyqtan Dostastyqty saqtaý kerek dep oılaımyn. Osy maqsatta ózara senimdi nyǵaıtýdyń eń tıimdi sharalaryn qabyldap, memleketter basshylary deńgeıinde bir-birimizdi negizsiz synap-mineýden aýlaq bolyp, ustamdylyq pen parasattylyq tanytqanymyz jón», – dedi Qasym-Jomart Toqaev.
Qazaqstan Prezıdentiniń aıtýynsha, geosaıası turaqsyzdyq pen aýmaly-tókpeli halyqaralyq ahýal jaǵdaıynda ótip jatqan búgingi kezdesý Uıym jumysyna tyń serpin berýge tıis.
«Bizdiń el Ázerbaıjan men Armenıanyń beıbit kelisim jasaýǵa degen umtylystaryn quptaıdy. Sonymen qatar Ortalyq Azıa aımaǵyndaǵy memleketaralyq shekaralardyń jekelegen bólikterin zańdyq turǵydan resimdeýdi aıaqtaý isinde aıtarlyqtaı ilgerileý bar», – dedi Qasym-Jomart Toqaev.
Prezıdent Táýelsiz Memleketter Dostastyǵy jahandyq yntymaqtastyq pen damý úderisine eleýli úles qosyp kele jatqan tıimdi óńirlik uıym retinde halyqaralyq deńgeıde keńinen moıyndalǵanyna toqtaldy.
«Dostastyq BUU-nyń túrli qurylymymen, sondaı-aq basqa da kóptegen halyqaralyq jáne óńirlik uıymmen utymdy baılanys ornatty. TMD-nyń álemdik arenadaǵy bedeli artyp keledi. Byltyr TMD janyndaǵy Baqylaýshy jáne Seriktes mártebesi bekitildi. Bul sheshim Uıymnyń kemeline kelgenin jáne ashyqtyǵyn kórsetedi. Osy júıeli jumysty jalǵastyryp, «TMD +» formatyn qurý týraly máseleni qarastyrýdy usynamyn. Mundaı alań Dostastyqtyń óńirlik baılanystaryn keńeıtýge negiz bolady», – dedi Memleket basshysy.
