Búgin baýyrlas Túrkıanyń qurylǵanyna 96 jyl toldy. Osydan bir ǵasyrdaı ýaqyt buryn Anadolyda ult kóshbasshysy Mustafa Kemal Atatúrik bastaǵan shet el ınterventteriniń jaýlaýynan qutqarýǵa baǵyttalǵan ult-azattyq kúres jeńispen aıaqtaldy. Osylaısha 1923 jyldyń 29 qazan kúni zaıyrly Túrkıa Respýblıkasy quryldy.
Uly elderdiń murageri retinde qurylǵan jańa memleket óziniń tarıhı sahnaǵa shyqqanyn bar álemge jarıalap, respýblıkanyń tuńǵysh prezıdenti bolyp Otan úshin ot pen oqqa keýdesin tosqan dańǵty marshal ǵazı Mustafa Kemal saılandy. Túrkıa memleketiniń negizin qalaýshy ári tuńǵysh Prezıdenti Mustafa Kemaldyń esimine keıin qurmetti «Atatúrik» ataýy qosyldy. Túbimiz ben tegimizi bir tarıhymyz ben mádenıetimiz, ádebıetimiz ortaq elmen qazir baılanysymyz kúshti. Elordanyń kórikti jerleriniń birinen túriktiń taý tulǵasy, kemeńger kósem Mustafa Kemal Atatúrikke eskertkish ornatyldy. Bul kúni Ankaradaǵy Atatúrik kesenesine halyqtyń aǵylatynyn, bılik ókilderiniń arnaıy gúl shoqtaryn qoıyp, taǵzym etetinin atap ótken abzal.
Búgin Túrkıa Respýblıkasynyń 96 jyldyǵyna Túrkıa Respýblıkasynyń Tótenshe jáne Ókiletti Elshisi Nevzat Ýıanyk arnaıy qabyldaý ótkizip, saltanatty shara aıasynda Iýnýs Emre atyndaǵy túrik mádenıet ortalyǵy uıymdastyrǵan "Góbeklitepe" fotokórmesi ashylady.
