Búgin Qazaqstan Respýblıkasy men Ázerbaıjan Respýblıkasy arasynda dıplomatıalyq qatynastar ornatylǵanyna 27 jyl tolady. Syrtqy ister mınıstrligi baspasóz qyzmetiniń málimetinshe, Qazaqstannyń Bakýdegi Elshiligi 1994 jyldyń jeltoqsan aıynda, al Ázerbaıjannyń Qazaqstandaǵy Elshiligi 2004 jyldyń naýryz aıynda ashyldy. 2008 jyldyń qyrkúıek aıynan bastap Ázerbaıjannyń Aqtaý qalasyndaǵy Bas konsýldyǵy jumys isteýde.
Eki el arasynda syndarly saıası dıalog ornatylǵan. Qazaqstan men Ázerbaıjan óńirlik jáne halyqaralyq sıpattaǵy negizgi ózekti máseleler boıynsha ustanymdardyń jaqyndyǵymen erekshelenedi.
Qazaqstan-Ázerbaıjan qatynastary 2005 jylǵy mamyrda Bakýde qol qoıylǵan Strategıalyq áriptestik jáne odaqtastyq qatynastar týraly sharttyń qaǵıdalary men erejelerine sáıkes damýda.
Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev pen Ázerbaıjan Respýblıkasynyń burynǵy Prezıdenti, Jalpy ulttyq kóshbasshysy Geıdar Álıev irgetasyn qalaǵan dostyq qarym-qatynas Ázerbaıjannyń qazirgi Prezıdenti Ilham Álıevpen de sátti jalǵasyn tabýda.
2017 jyldyń sáýir aıynda Qazaqstannyń Tuńǵysh Prezıdenti – Elbasy Nursultan Nazarbaevtyń Ázerbaıjan Respýblıkasyna resmı sapary oryn alyp, onyń nátıjesi boıynsha 10 memleketaralyq jáne úkimetaralyq kelisimge qol qoıyldy.
2018 jyldyń tamyz aıynda Ázerbaıjan Prezıdenti Ilham Álıev Kaspıı jaǵalaýy elderiniń Besinshi samıtine qatysý maqsatynda Qazaqstan Respýblıkasynda (Aqtaý) jumys saparymen boldy.
Jalpy 2018 jyl ishinde Prezıdent, Premer-Mınıstr, Parlament, SİM jáne basqa da mınıstrlikter men vedomstvolar basshylary deńgeıinde 30-dan asa ózara issaparlar oryn aldy.
2018 jyly ekijaqty taýaraınalym 258,3 mln. AQSH dollaryn qurady. Ázerbaıjan sońǵy 3 jyl ishinde Qazaqstannyń Batys óńirine 70 mln. AQSH dollarynan asa ınvestısıa saldy.
Ekijaqty saýda-ekonomıkalyq qatynastardyń lokomotıvi bolyp tabylatyn kólik-logıstıkalyq saladaǵy baılanystar únemi keńeıtilip, damyp keledi.
Qazirgi tańda Qazaqstanda Ázerbaıjannyń qatysýymen 524 zańdy tulǵalar tirkelgen, sonyń ishinde 221 birlesken kásiporyn jumys isteýde.
Ekijaqty ekonomıkalyq yntymaqtastyqty damytýǵa Saýda-ekonomıkalyq yntymaqtastyq jónindegi Qazaqstan-Ázerbaıjan Úkimetaralyq komısıasynyń jumysy da yqpal etýde.
Úkimetaralyq komısıanyń usynystary ekijaqty qarym-qatynastardyń keń-aýqymdy spektryn qamtyp, energetıka, tranzıttik jáne kóliktik júıeler, aýyl sharýashylyǵy, bilim berý jáne týrızm salalaryndaǵy saýda-ekonomıkalyq jáne ınvestısıalyq baılanystardy keńeıtýge múmkindik beredi.
Kópjaqty formattaǵy qatynastarymyz da ózara senimdilikke negizdelip damýda. Halyqaralyq kún tártibindegi ózekti máseleler boıynsha bizdiń kózqarastarymyz úılesimdi jáne uqsas.
Kópjaqty formatta taraptar halyqaralyq jáne óńirlik uıymdar (BUU, EQYU, IYU, TMD, TMYK, AÓSSHK, EYU jáne t.b.) sheńberinde belsendi ózara is-qımyl jasasyp keledi.
Qazaqstan men Ázerbaıjan parlamentteri arasynda tyǵyz ózara is-qımyl jolǵa qoıylǵan. Eki eldiń zań shyǵarýshy organdary arasyndaǵy dostyq toby quryldy jáne jumys isteıdi. Bizdiń elderimizdiń zańnamalyq organdary turaqty ózara saparlarmen, onyń ishinde QR men AR-da uıymdastyrylatyn parlamenttik jáne prezıdenttik saılaýdy ózara baqylaý jelisi boıynsha almasady.
Mádenı-gýmanıtarlyq yntymaqtastyqty nyǵaıtý jáne odan ári damytý úshin belsendi jumys júrgizilýde. Taraptar tájirıbe almasyp, eki eldiń aýmaǵyndaǵy túrli is-sharalarǵa qatysady.
