Búgin sársenbiniń sáti kúni ıaǵnı 27-shi aqpan kúni «Nur Otan» partıasynyń kezekti XVIII sezi ótedi. Bas partıanyń 20 jyldyǵyna oraı uıymdastyrylǵan jıynda partıalyq organdardyń esebi tyńdalyp, «Nur Otannyń» 2030 jylǵa deıingi jańa Baǵdarlamasy talqylanady. Sonymen qatar, saıası uıymnyń Jarǵysyna ózgertýler men tolyqtyrýlar engizilip, partıa Saıası keńesiniń quramy jańartylady.
Prezıdent Úkimetti otstavkaǵa jiberýge qatysty arnaıy málimdemesinde Úkimettiń jańa basshylyǵy ómir súrý deńgeıin arttyrýǵa, ekonomıkany yntalandyrýǵa, strategıalyq mindetterdi júzege asyrýǵa baǵyttalǵan naqty sharalar ázirleýge tıis ekenin nyǵarlaı kele bylaı degen bolatyn:
«Men «Nur Otan» partıasynyń jaqynda ótetin sezinde áleýmettik qoldaýdy kúsheıtýge jáne azamattardyń turmys sapasyn arttyrýǵa arnalǵan birqatar sharalar usynamyn. Osy maqsatpen búdjetten jáne Ulttyq qordan qomaqty qarjy bólinetin bolady.
Bul qarajat mynadaı mindetterdi sheshýge baǵyttalady:
- az qamtylǵan azamattarǵa áleýmettik qoldaý kórsetý isin kúsheıtý.
- halyqtyń áleýmettik turǵydan álsiz toptarynyń baspana jaǵdaıyn jaqsartý múmkindikterin arttyrý.
- óńirlerdi damytý saıasatyn túbegeıli ózgertý.
Úkimet pen barlyq deńgeıdegi ákimderdiń jumysy osy mindetterdi júzege asyrýǵa baǵyttalýy tıis.
Úkimet pen óńirlerdiń ıeligindegi qarajat kózdelgen maqsatqa saı jumsalmaı otyr. Munyń bárine baqylaý ornatylady. Osy taqyryptar jóninde «Nur Otan» partıasynyń sezinde tolyǵyraq aıtylatyn bolady».
Demek, bul jolǵy bılik partıasy quryltaıynda jańa úkimetke qandaı mindetter júkteletinin kórip, «Nur Otan» partıasynyń 2030 jylǵa deıin arnalǵan jańa baǵdarlamasynyń mazmunymen tanysamyz. Qalaı bolǵanda da, áleýmettik salaǵa basymdyq beriletini sózsiz.
