QR BǴM «Halyqaralyq baǵdarlamalar ortalyǵy» AQ «Bolashaq» memlekettik stıpendıasynyń jańa talaptaryn jarıalady.
Uıymnyń baspasóz qyzmetiniń málimdeýinshe, «Bolashaq» stıpendıasyna úmitkerlerdi irikteý qaǵıdalary ózgertiledi jáne baǵdarlama modernızasıalandy. «Halyqaralyq baǵdarlamalar ortalyǵy» AQ júrgizgen monıtorıń nátıjeleri men sybaılas jemqorlyq táýekelderin taldaý boıynsha, QR Prezıdentiniń «Bolashaq» halyqaralyq stıpendıasyn taǵaıyndaý qaǵıdalaryna birqatar ózgeris ázirlendi.
QR Bilim jáne ǵylym mınıstrliginiń normatıvtik-quqyqtyq aktilerine ózgeris engizildi. Olar eń aldymen ashyqtyqty arttyrýǵa, barlyq úmitkerler úshin teń múmkindikter jasaýǵa, irikteýdiń obektıvtiligin kúsheıtýge jáne búrokratıalyq kedergiler men burynǵy máselelerdi sheshýge baǵyttalǵan», - dep habarlady «Halyqaralyq baǵdarlamalar ortalyǵy» AQ baspasóz qyzmeti.
1. Basym mamandyqtardyń jańa tizimi Stıpendıa alýǵa bolatyn basym mamandyqtar tizimi eńbek naryǵy qajettilikteriniń ortasha boljamyn eskere otyryp, qaıta qurylady. Ony jumyspen qamtý máseleleri jónindegi ýákiletti organ áleýmettik-ekonomıkalyq damý perspektıvalary men taldaý negizinde jasaıdy. Bul Qazaqstan Respýblıkasynyń kásiporyndary men uıymdaryna qajet joǵary bilikti kadrlardy daıarlaýǵa kómektesedi.
2. Halyqaralyq stıpendıa úmitkerlerine arnalǵan kvotalyq sanattar qysqartyldy Stıpendıa úmitkerleriniń barlyǵyna múmkindik birdeı beriledi. Úmitkerlerdiń barlyq jeńildik kvota sanattary alynyp tastalady. Barlyq úmitkerler sheteldik joǵary oqý oryndaryna óz betimen túsýi tıis. Sondaı-aq, jańa Qaǵıdalarda aýyldyq jerden shyqqan úmitkerlerdi qospaǵanda, buryn usynylǵan aldyn ala tildik daıyndyq kýrstary alyp tastaldy.
3. Halyqaralyq stıpendıa úmitkerlerine qoıylatyn memlekettik jáne shet tilderin bilý talaptaryn arttyrý Jańa qaǵıdalar boıynsha irikteý týrlary aıasynda til bilý deńgeıin tekserý alyp tastalǵan. Úmitkerler derbes test tapsyrýlary kerek jáne qujattardy tapsyrý kezinde memlekettik (KazTEST V1) jáne shet tilinen (keminde IELTS 6.5) sertıfıkat usynýlary tıis.
4. Halyqaralyq stıpendıa taǵaıyndaýǵa arnalǵan barlyq úmitkerler úshin konkýrstyq irikteý týrlarynyń sanyn qysqartý Konkýrstyq irikteý kezindegi 6 týrdyń ornyna jalpy 3 týr bolady. Ýájdemelik jáne usynys hattaryn baǵalaý, sondaı-aq memlekettik jáne shet tilderin bilý deńgeıin anyqtaý boıynsha irikteý týrlary qysqarady.
İrikteý týrlarynda zıatkerlik jáne emosıonaldyq IQ deńgeıin anyqtaýǵa arnalǵan keshendi testileý, táýelsiz saraptamalyq komısıa múshelerimen jeke áńgimelesý jáne shetelde kadrlar daıarlaý jónindegi respýblıkalyq komısıanyń úmitkerlerdi qarastyrýy qamtylady.
5. Táýelsiz saraptamalyq komısıanyń jumysy Táýelsiz saraptamalyq komısıanyń (TSK) quramyna qoıylatyn talap kúsheıtiledi, endi komısıa quramyndaǵy 3 adamnyń ornyna keminde 5 adam sheshim qabyldaıdy. Úmitkerlerdi irikteýdiń búkil prosesi jáne barlyq komısıa otyrystary onlaın taratylady. Óz jumysynyń barysynda komısıanyń qoıa alatyn barlyq suraqtary, onyń ishinde qosymsha suraqtary da naqty reglamentteledi.
6. Qujattardy qabyldaý men konkýrstyq irikteý rásimin avtomattandyrý Elektrondyq úkimettiń veb-portalynda úmitkerdiń jeke kabıneti arqyly úmitkerlerdiń qujattaryn qabyldaý prosesi tolyqtaı avtomattandyryldy. Qazirgi tańda adamı faktordyń qatysýyn azaıtý maqsatynda konkýrstyq irikteý kezeńderiniń avtomattandyrylýyn qamtamasyz etý jumystary júrgizilýde.
Atap aıtqanda, búkil irikteý prosesi Prezıdenttik kadrlyq rezervke irikteý úlgisi boıynsha sıfrlyq platformany paıdalaný arqyly júrgiziledi. Ortalyq sonymen birge qadamdyq nusqaýlyqtar ázirleıdi jáne reglamentteýshi qujattarǵa sáıkes konkýrstyq irikteýge qatysatyn qyzmetkerlerdiń jaýapkershiligin kúsheıtedi.
Jańa qaǵıdalar QR Úkimetiniń Qaýlysymen bekitilgennen keıin «Halyqaralyq baǵdarlamalar ortalyǵy» AQ www.bolashak.gov.kz resmı saıtynda jarıalanady.
Aıta keteıik, «Bolashaq» halyqaralyq stıpendıasy QR Prezıdentiniń 1993 jylǵy 5 qarashadaǵy №1394 qaýlysymen bekitilgen. 26 jyl ishinde bul baǵdarlama arqyly 10738 maman daıarlandy, qazirgi ýaqytta 7226 túlek ózderiniń sharttyq mindettemelerin oryndady, 3331 túlek eńbekpen óteý monıtorıńinde.