Beıbit Isabaev kásibı voleıbolshylarmen kezdesti

Sport

Foto: Jetisý obl ákimdigi 23 qazan 2024

Beıbit Isabaev kásibı voleıbolshylarmen kezdesti

Búgin oblys ákimi Beıbit Isabaev «Jetisý» kásibı voleıbol klýbynyń jattyqtyrýshylar quramymen jáne oıynshylarymen kezdesip, Qazaqstan Kýbogyndaǵy jeńisimen quttyqtady. Eske salsaq, áıelder komandasy Kýbok jeńimpazy atansa, al erler komandasy İİİ orynǵa ıe boldy, dep habarlaıdy Jetisý oblysy ákiminiń baspasóz qyzmeti.

- Elimizdiń ulyq merekesi - Respýblıka kúni qarsańynda sizder oblysymyz úshin, jalpy barsha jankúıerler úshin úlken syı jasadyńyzdar. Sizderdiń bul jetistikterińiz - qajyrly eńbektiń aıqyn nátıjesi ǵana emes, sonymen qatar rýh myqtylyǵynyń, toptyq jumys pen kásibı sheberliktiń jarqyn mysaly. El Kýbogynyń qorytyndysy boıynsha bizdiń áıelder komandasy osymen toǵyz dúrkin chempıon atanyp otyr. Erler komandasy da qýantty, bul komandadaǵy oıynshylardyń kópshiligi jergilikti sportshylarymyz. Ekinshi jyl Ulttyq lıgada oınap, bıyl birden júldeli İİİ orynǵa ıe boldyńyzdar. Barshańyzdy osy aıtýly sporttyq jetistikterińizben quttyqtaımyn! - dedi klýb basshylyǵyna jáne barlyq jattyqtyrýshylar quramyna alǵysyn bildirgen óńir basshysy.

Sportshylardyń jetistigin tilge tıek etken B.Isabaev klýbtyń burynǵy chempıondyq dańqyn qaıtaratyn kez kelgenin atap ótti, sondaı-aq qajetti qoldaý jalǵasatynyn da aıtty. Eske salsaq, klýbtyń áıelder komandasynyń qorjynynda el chempıonatyndaǵy 8 jeńis bar. Óz kezeginde áıelder komandasynyń bas bapkeri Marko Grshıch oblys basshylyǵyna qoldaýy úshin alǵys bildirip, komandanyń chempıondyq ataǵyn qaıtarýǵa bar kúsh-jigerlerin jumsaıtyndyqtaryn aıtyp ýáde berdi.

Kezdesý barysynda qatysýshylar klýbtyń aldaǵy josparlaryna toqtaldy. Áıelder komandasynyń kapıtany Karına Denısova jaqynda sportshylarǵa arnalǵan jańa voleıbol ortalyǵy men turǵyn úıdiń salynyp berilgeni sapaly jattyǵýǵa kóp kómek bolǵanyn atap ótti.

- Bizdiń voleıbol ortalyǵynyń elimizde balamasy joq, onda jattyǵýǵa qajetti jaǵdaılardyń bári bar. Qazaqstan Kýbogyndaǵy jeńis - bul bizdiń árqaısymyzdyń kúndelikti eńbegimizdiń, fızıkalyq jáne moraldyq jaǵynan kórsetilgen qoldaýdyń nátıjesi. Maýsym endi bastalyp jatyr, degenmen biz durys baǵytta kele jatqanymyzdy dáleldedik, Kýbokty Taldyqorǵanǵa alyp keldik, – dedi K.Denısova.

Kezdesýdi qorytyndylaı kele oblys ákimi sportshylarǵa Qurmet gramotalary men Alǵys hattar tabys etti, sondaı-aq aldaǵy jarystarda jeńisti joldyń jalǵasty bolýyna tilektestik bildirdi:

- Alda qarashadan bastap sáýirge deıin Ulttyq lıga oıynshylary arasynda ótetin Qazaqstan Chempıonatyna qatysý mindeti tur. Sizderden joǵary nátıje kútemiz. Ótken oıynda qajyrly minez tanytyp, sapaly oıyn kórsettińizder, óskeleń urpaq sizderden úlgi alyp, sizderge qarap ósedi, - dep sózin qorytyndylady Beıbit Isabaev.

RELATED NEWS

Sport

14 qańtar 2025

Qysqy Ýnıversıada: Qazaqstandyq frıstaıl-mogýldan chempıon atandy

Italıanyń Týrın qalasynda ótip jatqan qysqy Ýnıversıadada frıstaıl-mogýldan qazaqstandyq Anastasıa Gorodko chempıon atandy, dep habarlaıdy Ulys Ulttyq olımpıada komıtetine silteme jasap.

Fınalǵa birinshi orynmen shyqqan A.Gorodko eń joǵary upaımen (79,79) altyn medalǵa ıe boldy.

Japonıalyq Harýka Nakao 76,29 balmen ekinshiorynǵa ıe boldy.

Germanıalyq Hanna Vesse (75,04 bal) úzdik úshtikti túıindedi.

Qysqy Ýnıversıadanyń ashylý saltanatynda tý ustap shyqqan Aıaýlym Ámirenova bul básekede 70,52 balmen besinshi orynǵa taban tiredi.

Aıta keteıik, qysqy Ýnıversıadada búgin qazaqstandyq jastar úsh sport túrinen synǵa túsýde.

Sport

08 mamyr 2025

Er Jánibek batyrdyń esimi ulyqtaldy

Óskemen qalasynyń Jekpe-jek saraıynda aty ańyzǵa aınalǵan Er Jánibekti eske alýǵa arnalǵan jasóspirimder men kadetter arasynda semserlesýden HİH ashyq respýblıkalyq týrnır ótti.
Er Jánibek urpaqtary uıymdastyryp otyrǵan týrnırge Shyǵys Qazaqstan, Abaı, Ońtústik Qazaqstan oblystary men Astana, Almaty qalalarynan kelgen 200 jasóspirim sportshy qatysady.

- Kadetter men jasóspirimder arasyndaǵy ashyq respýblıkalyq týrnırdi osymen 19-shy márte ótkizip otyrmyz. Biz jastardy otansúıgishtikke tárbıeleý, sportqa, onyń ishinde semserlesýge baýlý maqsatynda ótkizip kelemiz, - dedi týrnırdi uıymdastyrýshy, Er Jánibek urpaqtarynyń ókili Álibek Erýbaev.

Týrnırdiń saltanatty ashylýynda SHQO ákiminiń orynbasary Erbol Nurǵalıev sportsúıer qaýymdy memlekettik merekemen quttyqtap, Uly Jeńistiń 80 jyldyǵy qarsańynda jáne Otan qorǵaýshylar kúninde ótip otyrǵan jarystyń máni men maǵynasy zor ekenin aıtty.

- Er Jánibek batyrdyń qurmetine ótip otyrǵan týrnırge jastardyń kóptep qatysyp otyrǵany bizdi qýantady. Oblysymyzda bul sport túrine erekshe den qoıylyp otyr. Jas qatysýshylarymyz kóp bolǵan saıyn bolashaq Olımpıada chempıondarynyń qatary tolysatynyna senim bildiremiz, - dedi Erbol Nurǵalıev.

Týrnır 9 mamyr kúnine deıin jalǵasyp, shapshańdar men alǵyrlar Jeńis kúninde anyqtalady.

Sport

25 sáýir 2025

CS2 KZ 2025: Qazaq kıbersportshylaryna Astana tórindegi PGL sahnasy ashyq

Avtor: ulys.kz tilshisi

«PGL» — bul jaı ǵana úsh árip emes. Bul — álemdik deńgeıdegi shaıqas alańy. Bul — myńdaǵan jankúıerdiń kóz aldynda, mıllıondaǵan kórermenniń aldynda óz elińniń atynan shyǵatyn, tek myqtylardyń mekeni. Bıyl bul sahnaǵa alǵash ret qazaq kıbersportshylary joldama alýy múmkin. Sebebi, CS2 KZ 2025 Community Cup týrnıri osyndaı múmkindik berip otyr.

Erteń, 26 sáýirde, otandyq oıynshylar úshin asa mańyzdy kún. Bul — respýblıkalyq aýqymdaǵy irikteý kezeńderiniń sońǵy kúni. Bir aı boıy ár senbi saıyn 166 komanda, ıaǵnı 800-ge jýyq oıynshy Counter-Strike 2 alańynda ter tókti. Endigi kezekte 3–4 mamyrda pleı-off, al 15 mamyrda Astanadaǵy The Hood klýbynda LAN-fınal ótpek.

Bul — bir qaraǵanda jaı ǵana jarys emes. Bul — úlken armanǵa jol ashatyn kópir. Óıtkeni, bas júlde – PGL Astana 2025 sahnasyna shyǵý. Jeńimpaz komanda sol jerde álemniń eń myqtylarymen ıyq tirestirip, 5 VIP-oryn ıelenedi. Bul — buryn-sońdy Qazaqstanda bolmaǵan jaǵdaı.

Qazaq Cybersport Federation prezıdenti Qýanyshbek Esekeevtiń aıtýynsha, bul týrnırdiń basty maqsaty – jastarǵa tek oıyn emes, múmkinshilik beretin platforma jasaý.
«PGL — bul Qazaqstannyń kıbersport kartasyndaǵy ornynyń nyǵaıǵanyn kórsetetin oqıǵa. Bizdiń oıynshylarǵa álemdik deńgeıge shyǵýǵa jol ashyp, otandyq jankúıerlerge NAVI, G2 Esports, Astralis syndy komandalardy óz kózderimen kórýge múmkindik beredi. Qazaqstan CS2-de árqashan myqty bolǵan. Endi sol myqtylyqty álem sahnasynda dáleldeıtin ýaqyt keldi», – deıdi ol.

Eń qyzyǵy, týrnırge qatysýshylarǵa jaı ǵana sahna emes, naqty qoldaý da kórsetilýde. Fınalısterdiń jolaqysy men turýy tolyqtaı Winline kompanıasynyń qoldaýymen qamtamasyz etiledi. Al ekinshi oryndy ıelengen komanda 5 standartty bıletke ıe bolady. TOP-4 quramyna kirgenderdiń barlyǵy geımerlik qurylǵylarmen marapattalady.

Al PGL Astana 2025 týrnıri she? Bul jaı ǵana jarys emes. Bul — S-Tier sanatyna jatatyn, Valve-diń resmı tizimine kiretin bedeldi týrnır. 16–18 mamyrda Barys Arena sahnasynda ótetin fınaldyq básekede álemniń 16 úzdik komandasy baq synasady. NAVI, Team Spirit, Virtus.pro... Tizim uzaq, ataǵy bıik.
Eń bastysy — bul týrnırdiń júlde qory – 1 250 000 AQSH dollary. CS2 tarıhyndaǵy rekordtyq kórsetkish.

Bálkim bul jarys bireýdiń ómirin ózgertedi. Bálkim, bul Qazaqstandaǵy jańa dáýirdiń bastalýy. Buryn el namysyn bokstan, kúresten, shahmattan qorǵap júrgender edi. Endi — CS2. Endi — kıbersport. Endi — Astana.

Jańalyqtar

24 maýsym 2025