Kelissóz aldynda Aqordada elimizge memlekettik saparmen kelgen Ózbekstan Prezıdentin saltanatty qarsy alý rásimi ótti.
Qasym-Jomart Toqaev pen Shavkat Mırzıóev bir-birine resmı delegasıa múshelerin tanystyrdy. Qurmet qaraýylynyń bastyǵy memleketter basshylaryna raport berip, eki eldiń ánurandary shyrqaldy. Sodan keıin prezıdentter shaǵyn quramda kelissóz júrgizdi.
Memleket basshysy Ózbekstan Prezıdentine iltıpat bildire otyryp, bul sapar eki el arasyndaǵy yntymaqtastyq pen odaqtastyqty damytýǵa tyń serpin beretinin aıtty.
– Qazaqstan halqy Sizdiń búgingi saparyńyzǵa úlken mán berip otyrǵanyn atap ótkim keledi. Munyń ózi kóp dúnıeden habar beredi. Jalpy, sońǵy jyldary Qazaqstan men Ózbekstan arasyndaǵy baılanystar jaqsy jaǵyna qaraı túbegeıli ózgerdi. Eki el yntymaqtastyǵyn naqty mazmunmen tolyqtyrýǵa bar kúsh-jigerimizdi salamyz. Búgin biz memleketterimiz arasyndaǵy yntymaqtastyq pen odaqtastyqtyń negizgi baǵyttaryn aıqyndaıtyn qujattarǵa qol qoıamyz. Sondyqtan bul sapardyń jóni bólek, – dedi Qazaqstan Prezıdenti.
Óz kezeginde Ózbekstan Prezıdenti kórsetken syı-qurmeti úshin Qasym-Jomart Toqaevqa alǵys aıtyp, Qazaqstanǵa jasaǵan memlekettik saparynyń mańyzyna toqtaldy.
– Bul sapar tarıhı mánge ıe. Búgingi kezdesýimiz eki halyq arasyndaǵy san ǵasyrǵa jalǵasqan dostyq jáne tatý kórshilik qatynastardyń tinin nyǵaıta túsip, strategıalyq seriktestik pen odaqtastyq baılanystardy jańa deńgeıge kóteredi, – dedi Shavkat Mırzıóev.
Kelissóz barysynda taraptar saıası, saýda-ekonomıkalyq, kólik-tranzıt, ınvestısıa, energetıka, aýyl sharýashylyǵy, sý resýrstary, mádenı-gýmanıtarlyq jáne ónerkásip kooperasıasy salalaryndaǵy yqpaldastyqty odan ári nyǵaıtý perspektıvalaryn talqylady. Sondaı-aq óńirlik jáne halyqaralyq kún tártibindegi máselelerdi qarastyrdy.
Prezıdentter qazaq-ózbek qatynastary barlyq baǵyt boıynsha órkendep kele jatqanyn atap ótti.
