Batystaǵy sý tasqynymen kúreske 10 myńnan astam áskerı jumyldyryldy

Sý tasqyny

11 sáýir 2024

Batystaǵy sý tasqynymen kúreske 10 myńnan astam áskerı jumyldyryldy

Qazaqstan Premer-Mınıstri Oljas Bektenov Sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtabtyń jumys keńesin ótkizdi. Basty másele – sý tasqynynyń ekinshi tolqyny qarsańynda batys óńirlerdegi jaǵdaı. Bul týraly Úkimettiń baspasóz qyzmeti habarlady.

Vıse-premer, Shtab jetekshisiniń orynbasary Qanat Bozymbaev Reseı Federasıasynan Jaıyq ózeni arqyly kólemdi sýdyń kútilip otyrǵany týraly baıandady.

Batys Qazaqstan oblysynda jańbyr jaýady. Saqmar ózeniniń deńgeıi kóterile bastady. Boljam boıynsha, Jaıyq jáne Saqmar ózenderiniń joǵarǵy jaǵynan sáýir aıynyń ekinshi onkúndiginde Batys Qazaqstan oblysynyń aýmaǵyna sý keledi. Qazirgi ýaqytta Oral qalasyndaǵy Jaıyq ózenindegi sý deńgeıi – 728 sm, ol 850 sm qaýipti mejege jaqyndaıdy dep boljanyp otyr.

Batys Qazaqstan oblysynan sýdyń kelýine baılanysty Atyraý oblysynda ótken táýlikte Jaıyq ózenindegi gıdrobeketterde de sý deńgeıiniń shamaly kóterilýi baıqalady. Sáýirdiń úshinshi onkúndiginde úlken sýdyń kelýi kútiledi.

Úkimet basshysy Oljas Bektenovtiń tapsyrmasy boıynsha onyń Batys Qazaqstan jáne Atyraý oblystaryna jumys saparlarynyń qorytyndysyna sáıkes ákimdikterdiń, TJM, İİM jáne Ulttyq ulannyń, Qorǵanys mınıstrliginiń kúshteri men quraldary jumyldyryldy.

Batys Qazaqstan oblysynda avarıalyq-qutqarý jumystaryn júrgizý úshin kúshtik qurylymdar 6 myń adamǵa, Atyraý oblysynda 4 myń adamǵa deıin jetkiziledi. Elimizdiń ár óńirinen 4 myńǵa jýyq tehnıka jiberildi.

Premer-Mınıstr qorǵanys jáne ishki ister mınıstrlerine qajet bolǵan jaǵdaıda qosymsha jeke quram men tehnıka jiberýdi tapsyrdy.

«Oral men Atyraý boıynsha kúshter men quraldardy barynsha jumyldyrý qajet. Qazir úlken sýdy eldi mekenderge jetkizbeı, buryp áketý mańyzdy. Búgin qosymsha áskerı qyzmetshiler men tehnıka jiberile bastady. Sý aǵysynyń qarqynyn eskere otyryp, birinshi kezekte Oraldy, odan ári Atyraýdy kúsheıtemiz», — dedi Oljas Bektenov.

Úkimet basshysy eki oblys ákimdikterine kelgen áskerı qyzmetshilerdi barlyq qajetti zattarmen qamtamasyz etý, sondaı-aq tehnıkaǵa janarmaı quıý máselesin sheshý jóninde tapsyrma berdi.

Búgingi tańda segiz oblysta jergilikti aýqymdaǵy tótenshe jaǵdaı rejımi jalǵasýda. Sý basqan aımaqtardan barlyǵy 97 myń turǵyn evakýasıalandy. 11 sáýirdegi jaǵdaı boıynsha Pavlodar jáne Abaı oblystarynda sý tasqyny jaǵdaıynyń turaqtanýyna baılanysty TJ rejımderi alynyp tastaldy.

RELATED NEWS

Sý tasqyny

05 aqpan 2025

Qazaqstannyń 20-dan astam eldi mekeninde sý tasqany bolýy múmkin

Májilistiń jalpy otyrysynyń kýlýaryndaTótenshe jaǵdaılar mınıstri Shyńǵys Árinov sý tasqyny qaýpi bar aımaqta 23 eldi meken bar ekenin aıtty, dep habarlaıdy Ulys.

«Bul statısıkany mamandar beredi. Keıbir depýtattar osy óńirdiń barlyǵyn sý basady dep shoshyp jatyr eken. Olaı bolmaıdy. Belgili bir jumys júrgizemiz. Keıbir óńirden ol qaýipter joıyldy. Al óńirler boıynsha sý tasqyny qaýpi tónip turǵan TOP-5 aımaqty aıtatyn bolsaq, BQO, Qaraǵandy, Aqmola, Shyǵys Qazaqstan jáne Soltústik Qazaqstan oblystary bolyp otyr», - dedi Shyńǵys Árinov

Sý tasqyny

11 naýryz 2025

Sý tasqynyna daıyndyq: el aýmaǵynyń 71%-ynda qar jatyr

Úkimet otyrysynda ekologıa jáne tabıǵı resýrstar mınıstri Erlan Nysanbaev el aýmaǵynyń 71%-ynda qar jatqanyn habarlady.

Ol 11 naýryzdaǵy jaǵdaı boıynsha qar astynda jatqan aýmaq 71%-dy quraıtynyn, degenmen bul ótken aptaǵa qaraǵanda 15%-ǵa az ekenin atap ótti. Elimizdiń ońtústiginde: Qyzylorda, Túrkistan jáne Jambyl oblystarynda, batysynda: Batys Qazaqstan, Atyraý jáne Mańǵystaý oblystarynda qar erip jatyr.
«Naýryz aıynda temperatýra kóterilip, jaýyn-shashyn kóp bolsa erigen qar sýynan taý ózenderinde tasqyn júrýi múmkin. Ortalyq, soltústik jáne shyǵys aımaqtarda qar qalyń, naýryz aıynda jaýyn-shashyn mólsheri aılyq normadan eki jáne odan da kóp túsedi dep kútilip otyr. Mysaly, Astanada birinshi onkúndiktiń ózinde aılyq jaýyn-shashyn mólsheri tústi»,
— dep atap ótti Erlan Nysanbaev.

Sý tasqyny

08 tamyz 2024

Sý tasqynymen kúres: 5 myńnan asa otbasy qonys toıyn toılady

Sý tasqynynan zardap shekken 5 239 otbasyǵa arnaıy salynǵan jáne satyp alynǵan úıler men páterler berildi, dep habarlady Úkimettiń baspasóz qyzmeti.

Úkimet sý tasqynynan zardap shekken otbasylarǵa turǵyn úı salý jáne satyp alý, sondaı-aq olarǵa jan-jaqty kómek kórsetý boıynsha óńirlerde júrgizilip jatqan jumystardy turaqty baqylaýda ustap otyr.

Qıraǵan baspanasynyń ornyna 4769 otbasy jańa úıler men páterlerge ıe boldy. Sonymen qatar zardap shekken óńirlerde 2568 jańa úıdiń qurylysy qarqyndy túrde júrgizilip jatyr, onyń ishinde 470 nysan boıynsha jumystar tolyǵymen aıaqtalyp, turǵyndarǵa kiltter tabystaldy.

Soltústik Qazaqstan oblysynda qurylysy aıaqtalǵan 285 úı, Qostanaı oblysynda 57, Batys Qazaqstan oblysynda 80, Aqtóbe oblysynda 43 jáne Pavlodar oblysynda 5 úı paıdalanýǵa berildi.

Barlyq oblysta sý basqan turǵyn úılerdi tekserý jáne baǵalaý jumystary 100% aıaqtaldy. Jalpy somasy 49,3 mlrd teńgege 8 853 otbasy turǵyn úıdi jóndeýge jáne qalpyna keltirýge tıisti tólem aldy.

34 216 otbasyǵa 12,6 mlrd teńgege 100 AEK mólsherinde birjolǵy ótemaqy tólendi. Sondaı-aq joǵalǵan birinshi qajettiliktegi zattaryn satyp alý úshin 150 AEK-ke deıin qosymsha tólemder berilýde. Búgingi tańda 9,9 mlrd teńgege 21 869 otbasy osyndaı kómek aldy.

Zardap shekken bızneske keltirilgen zalaldy óteý jumystary jalǵasýda. Óńirlik komısıalar jalpy somasy 7,9 mlrd teńgege SHOB sýbektileriniń 455 ótinimin qarap, maquldady.

Sýǵa ketken mal úshin berilgen memlekettik kómek kólemi 2,8 mlrd teńgeden asty.

Jańalyqtar

24 maýsym 2025