Prezıdent Astana qalasyndaǵy «Atameken» etno-memorıal kesheninde ótken Memlekettik tý kóterý rásimine qatysty, dep habarlaıdy Aqorda.
Qurmet qaraýyly rotasynyń bastyǵy saltanatty sharaǵa daıyndyǵy jóninde Memleket basshysyna raport berdi. Sodan keıin elimizdiń ánurany shyrqalyp, kók baıraǵymyz kóterildi.
Qasym-Jomart Toqaev jınalǵan jurtshylyqty Memlekettik rámizder kúnimen quttyqtap, bul eldigimizdi nyǵaıta túsetin mereıli mereke ekenine nazar aýdardy.
– Osy merekege oraı biz jańa ǵana elimizdiń bas baıraǵyn kóterdik. Kók týymyz árdaıym bıikte jelbireı bersin! Týymyzdy tik ustaý – ár azamattyń perzenttik paryzy. Aspan tústes kók baıraǵymyz – bizdiń maqtanyshymyz. Sportshylarymyz týymyzdy talaı ret jeńis tuǵyryna kóterdi. Jaqynda qazaqtyń qaısar qyzdary Everestke shyqty. Týymyz álemniń eń bıik shyńynda taǵy da jelbiredi. Alda Olımpıada oıyndary kele jatyr. Namysty órenderimiz Parıj tórinde týymyzdy tik ustaıdy dep senemin, – dedi Prezıdent.
Memleket basshysy baıraǵymyz aspandaǵan saıyn ult mereıi asqaq bolatynyn aıtyp, týdy táýelsizdigimizdiń tumary ári yntymaǵymyzdyń bastaýy dep atady.
– Batyr babalarymyz el taǵdyry synǵa túsken sátte bir týdyń túbinen tabylǵan. Birligin bekem ustaǵan, eli men jerin qorǵaǵan. Baıtaq dalany kóziniń qarashyǵyndaı saqtap, urpaǵyna mıras etken. Sol amanatqa adal bolý – urpaqtyń uly muraty, – dedi Qasym-Jomart Toqaev.
Prezıdenttiń aıtýynsha, Qazaqstan beıbit memleket retinde tatýlyq pen kelisimdi qashanda basty orynǵa qoıady jáne barlyq memleketpen dostyq qatynas ornatqan.
– Sonyń arqasynda týymyz jer júzine birlik pen beıbitshiliktiń baıraǵy retinde tanyldy. Biz dostyq qaǵıdatyn árdaıym berik ustanamyz. Qazir bárimiz bir kisideı jumylyp, Ádiletti Qazaqstandy quryp jatyrmyz. Barshaǵa birdeı múmkindik beretin qoǵam ornata bastadyq. Az ýaqyt ishinde aýqymdy saıası reforma jasadyq. Jańa ekonomıkalyq baǵytymyzdy aıqyndadyq. Sondaı-aq jas urpaqtyń sana-sezimin jańǵyrtyp, sapaly ult bolýǵa bet burdyq. Munyń bárin júzege asyryp, túbegeıli ornyqtyrý – ońaı sharýa emes. Ol úshin, eń aldymen, yrysty yntymaq kerek. Barsha Qazaqstan halqynyń taǵdyry – ortaq, bolashaǵy – bir. Sondyqtan bir el, bir halyq bolyp, tý túbinde tutasa bilsek, kózdegen maqsatqa mindetti túrde jetemiz, – dedi Qasym-Jomart Toqaev.
Prezıdent memlekettik rámizder negizgi qundylyqtarymyz ben murattarymyzdy aıshyqtap, árqaısymyzdyń boıymyzda elimizge degen shynaıy maqtanysh sezimin oıatatynyn jetkizdi. Sonymen qatar basty eldik nyshandar syn saǵatta da, jeńisti kúnderde de barsha azamatty biriktiretinine toqtaldy.
Qasym-Jomart Toqaev Memlekettik rámizder kúni áskerı shen tapsyrý ıgi dástúrge aınalǵanyn atap ótip, jas sarbazdar Otan qorǵaý isin ómirlik mısıa retinde tańdap alǵanyn aıtty.
– Er-azamat úshin el tynyshtyǵyn kúzetý – eń abyroıly mindet. Áıgili batyrymyz Baýyrjan Momyshuly «Erdiń týy – namys» degen. Ózderińiz sıaqty otanshyl ári namysty ulandary bar Qazaqstannyń keleshegi jarqyn ekeni anyq. Barshańyz antqa adal bolyp, el shebin qyraǵy qorǵaısyzdar dep senemin. Áskerı shen alý – ár sarbazdyń ómirindegi mańyzdy beles. Armıa generaly Saǵadat Nurmaǵambetov «Ataqty alǵannan góri, ony arqalap júrgen qıyn» degen. Áıgili qolbasshynyń bul sózi sizderge zor jaýapkershilik júkteıdi. Qazaq sarbazy degen atqa árqashan laıyq bolyńyzdar, – dedi Memleket basshysy.
Saltanatty rásimde joǵary áskerı oqý oryndarynyń 12 úzdik túlegi Qazaqstan Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysynyń qolynan ofıserlik shen aldy.
Shara sońynda Memlekettik kúzet qyzmetiniń, Qorǵanys jáne İshki ister mınıstrlikteriniń Qurmet qaraýyly rotalary Prezıdent pen jınalǵan qaýym aldynan saltanatty túrde sap túzep ótti.
Tý kóterý rásimine Parlament Senatynyń Tóraǵasy Máýlen Áshimbaev, Parlament Májilisiniń Tóraǵasy Erlan Qoshanov, QR Memlekettik keńesshisi Erlan Qarın, Prezıdent Ákimshiliginiń Basshysy Aıbek Dádebaı, sondaı-aq memlekettik organdardyń basshylary, Úkimet músheleri, Parlament depýtattary, joǵary áskerı oqý oryndarynyń kýrsanttary men olardyń týystary qatysty.
