Demokratıa – úzdiksiz júretin úderis. Oǵan turaqty túrde atsalysý qajet. Bul Prezıdent Qasym-Jomart Toqaev barlyq deńgeıdegi máslıhattar depýtattarynyń İİ respýblıkalyq forýmynda aıtty, dep habarlaıdy Ulys.
«Osyny qaperden shyǵarmaýymyz kerek. Álemdegi kez kelgen tabysty demokratıalyq qoǵam aınalasyna beı-jaı qaramaıtyn azamattardyń arqasynda ǵana damıdy, ómirsheń bolady. Ár azamattyń ál-aýqaty men Otanymyzdyń taǵdyry tek ózimizdiń qolymyzda. Balalarymyz ben nemerelerimiz bizdiń jetistikterimizdi eseleýi úshin keler urpaqqa qajetti jaǵdaı jasaý — ortaq paryzymyz.
Qazaqstannyń bolashaǵy — jastardyń qolynda. Men bul týraly únemi aıtyp júrmin. Jerimizge egilgen ár taldyń ıgiligin kóretin de — jas urpaq. Bir sózben, ne istesek te, bárin elimizdiń erteńi úshin isteımiz. Sondyqtan biz balalardyń densaýlyǵyna, olardyń bilimi men tárbıesine búkil el bolyp erekshe kóńil bólýimiz kerek. Memleket osy baǵytta naqty sharalar qabyldady, ıaǵnı qarajat bólip, qajetti ınfraqurylym salýda. Jalpy, bul jumys qarqyndy júrip jatyr deýge bolady, biraq, aldymyzda turǵan mindetter aýqymdy, áli de atqaratyn sharýa kóp», — dedi Memleket basshysy.
Prezıdent balalardyń qaýipsizdigin qamtamasyz etý, quqyqtaryn qorǵaý, olardyń jan-jaqty damýy úshin qolaıly jaǵdaı jasaý — memlekettik saıasattyń eń basty basymdyǵy ekenin alǵa tartty.
«Salalyq mınıstrlik bolsyn, ákimdik nemese quqyq qorǵaý qurylymy bolsyn, ýákiletti organdardyń bári óz qyzmetin múltiksiz oryndap, jumysyn úılestirýi kerek. Baqytty balalyqtyń negizi otbasy ınstıtýty ekenin jáne solaı bolyp qala beretinin túsingen jón.
Bizdiń qoǵam qazir betpe-bet kelgen kóptegen másele men keseldiń túp-tamyry ata-analardyń bala tárbıesine óz deńgeıinde aralaspaýynan bastalady. Urpaqtyń sıfrlyq dúnıelerge táýeldi bolýy men vırtýaldy álemge shekten tys qumartýy naǵyz dertke aınaldy. Balalarǵa qatysty kez kelgen qaıǵyly jaǵdaı meniń janyma batady. Memlekettik organdardyń nazaryn dereý osyndaı jaǵdaılarǵa aýdaryp, tıisti tapsyrmalar berip, oryndalýyn turaqty baqylaýymda ustaımyn», — dedi Qasym-Jomart Toqaev.