Qarjylyq monıtorıń agenttigi azamattardy jeke bank kartalaryn paıdalaný arqyly qylmystyq sqemalarǵa tartý faktileri jıilep ketkeni týraly eskertedi, dep habarlaıdy Ulys.
Azamattar qarjylyq operasıalar jasaý úshin bank kartalaryn úshinshi tulǵalarǵa berip, «drop» bolý qaýipin eskermeı, qylmystyq sqemalarǵa tartylýy múmkin.
Aqsha kıber quqyqbuzýshylyqtardan nemese esirtki jáne adam satý sıaqty qylmystyq sqemalardan tartylýy yqtımal.
«QMA júrgizgen taldaýyna sáıkes, esirtki satýmen baılanysty sqemalarda jalpy aınalymy 22 mlrd teńge bolatyn 30 myń bank kartasy paıdalanylǵan. Mundaı zańsyz sqemalarǵa qatysý tulǵalardyń múlkin tárkileý, ákimshilik jáne qylmystyq jaýapkershilik sıaqty aýyr saldarǵa ákeledi», - delingen habarlamada.
QMA sońǵy zertteýlerine sáıkes, qarjylyq qıyndyqtarǵa tap bolǵandardyń, atap aıtqanda jumyssyzdar, stýdentter jáne áleýmettik osal top ókilderiniń alaıaqtardyń jeńil jolmen ońaı oljaǵa kenelý ýádelerine senip, «drop» bolyp qalý qaýipi joǵary ekeni anyqtaldy.
Astana men Qaraǵandy qalasynyń stýdentteri jáne Temirtaýlyq 64 jastaǵy zeınetker «drop» retinde Telegram-dúkeninde esirtki satýdan alynǵan aqshany jylystatý sqemasyna qatysqan. Olardyń shottary arqyly 100 mln teńgeden astam qarjy ótken. Bul narkoshoptyń jalpy aınalymy 2 mlrd teńgeden asqan.
Taǵy bir jaǵdaıda Almatyda 20 jastaǵy stýdenttiń kartasy paıdalanylyp, onyń shotyna 900-den astam adamnan 22,5 mln teńge túsken. Aýdarymdar 7.5 myńnan 15 myń teńgege deıingi aralyqta bolǵan, bul somalar esirtki zattarynyń bir rettik dozalarynyń qunyna sáıkes keledi.