Ázerbaıjan astanasy Bakýde Túrki áleminiń ortaq álipbıi jónindegi komısıasynyń ekinshi otyrysy ótti, dep habarlaıdy Ulys ulttyq portaly QazAqparatqa siltep jasap.
Atalǵan jıyndy Túrki Akademıasy Ázerbaıjan Ulttyq Ǵylym akademıasy Nasımı atyndaǵy Til bilimi ınstıtýtynyń qoldaýymen, Atatúrik atyndaǵy mádenıet, til jáne tarıh joǵary keńesi janyndaǵy Túrik tili qoǵamymen birlesip uıymdastyrdy. Onda baýyrlas memleketterdiń ókilderi ortaq álipbı ıdeıasyn ilgeriletý jáne osy baǵyttaǵy jańa qadamdardy talqylady. Komısıa otyrysynyń ashylý saltanatynda sóz sóılegen Shahın Mustafaev ortaq álipbı máselesi — túrki halyqtary yntymaqtastyǵynyń mańyzdy baǵyty ekenin atap ótti.
«Túrki áleminiń birligin nyǵaıtý úshin álipbı birligine de mán berilýi tıis. Sońǵy jyldary túrki memleketteri arasyndaǵy yntymaqtastyq ınstıtýsıonaldy sıpatqa ıe bolǵan saıyn, ortaq álipbı máselesi kún tártibinde jıi kóterile bastady, - dedi Mustafaev.
Basqosýǵa Túrik tili qoǵamynyń prezıdenti Osman Mert, Ázerbaıjan Ulttyq ǵylym akademıasynyń prezıdenti Isa Gabıbbeılı, Atatúrik ortalyǵynyń tóraǵasy Nızamı Djafarov jáne TMU aqsaqaldar keńesiniń múshesi Gasan Gasanov, sonymen qatar Túrki memleketteri uıymyna múshe elderden jáne baqylaýshy memleketterden kelgen komısıa músheleri men til bilimi salasyndaǵy ǵylymı-zertteý ınstıtýttardyń ǵalymdary qatysty.
Aıta keteıik, Túrki Akademıasynyń bazasynda jumys isteıtin komısıa ár taraptan lıngvısıkalyq salaǵa jaýapty eki músheniń qatysýymen qurylǵan edi. Komısıanyń alǵashqy otyrysy 2023 jyldyń 29 mamyrynda Astana qalasynda ótip, birqatar mańyzdy sheshim qabyldanǵan bolatyn.
