Elordadaǵy Nazarbaev ýnıversıtetinde jyl saıyn «Naýryz meıramy» sharasy ótip turady. Ol oqý orny qyzmetkerleri men qonaqtaryna jáne stýdentterge arnalǵan. Bıyl merekelik baǵdarlama aıasynda alǵash ret atalǵan ýnıversıtettiń halyqaralyq stýdentteriniń jármenkesi ótip, Qazaqstandaǵy dıplomatıalyq mısıa ókildikteri men elshilikterdiń qoldaýymen túrli eldiń mádenıeti tanytyldy.
Nazarbaev ýnıversıtetinde 55 eldiń profesorlary jumys isteıtinin, 17 elden jastary kelip bilim alyp jatqanyn aıta ketken abzal. Sondyqtan túrli eldiń ókilderi óz memleketin, mádenıetin men salt-dástúrin tanytýǵa kúsh salady. Ázirbaıjannyń Qazaqstandaǵy Elshiginiń qoldaýymen Nazarbaev ýnıversıtetiniń magıstranttary Indjı Gasanova men Safýra Alıeva óz elderin tanytatyn erekshe stend qurdy. Olar qonaqtarǵa Ázirbaıjanda Naýryz meıramynyń qalaı toılanatynyń túsindirip, atalǵan merekege qatysty jasalatyn salt-dástúr týraly keńinen baıandady. Meımandar mol aqparatqa qanyǵyp qana qoımaı, ázirbaıjannyń merekelik palaýy men dámi til úıiretin gýtaby men pahlavasynan da aýyz tıdi. Sonymen qatar, stendtegi ulttyq mýzykalyq aspaptar men jibek kilemder, Ázirbaıjannyń ásem astanasy Bakýdyń ǵajap sýretteri qonaqtardyń qyzyǵýshylyǵyn oıatpaı qoımady. Shara barysynda ázirbaıjandyq jastar ózge elderdiń stýdentteriniń qoldaýymen ázirbaıjannyń halyq bıi «Iallyny» bılep, «sátsizdikterdiń bári osy otpen birge janyp ketsin» degen tilekpen sımvolıkalyq ottan birinen keıin biri sekirdi. Osylaısha ázirbaıjandyq stýdentter óz eliniń dástúrin ózgelerge barynsha tanytty. Myńdaǵan jyldardan beri toılanyp kele jatqan shyǵystyń ortaq merekesi jastardy tipti jaqyndata tústi.