ÁZERBAIJAN ELSHİLİGİ DÓŃGELEK ÚSTEL ÓTKİZDİ

Ázerbaıjan

12 jeltoqsan 2019

ÁZERBAIJAN ELSHİLİGİ DÓŃGELEK ÚSTEL ÓTKİZDİ

Ázerbaıjannyń Qazaqstandaǵy elshiliginiń muryndyq bolýymen M.S. Nárikbaev atyndaǵy KAZGÚÝ Ýnıversıtetinde dóńgelek ústel bolyp ótti. Shara «Ázerbaıjan jáne Qazaqstan kóshbasshylarynyń mýltıkýltýralızm men toleranttylyq jáne zań ústemdigi negizinde quqyqtyq ınstıtýttardy nyǵaıtýdaǵy róli» degen taqyryp negizinde uıymdastyrylǵan.

Qazaqstannyń Táýelsizdigi kúni men Ázerbaıjannyń jalpyhalyqtyq kóshbasshysy Geıdar Álıevti eske alý kúni qarsańynda ótken dóńgelek ústeldi QR Prezıdenti janyndaǵy strategıalyq zertteýler ınstıtýtynyń bólim basshysy PhD, Alýa Joldybalına júrgizip otyrdy. Ashylýynda sóz alǵan Ázerbaıjan elshiliginiń ýaqytsha senim bildirilgen ókili Agadjvıd Ramazanov baýyrlas elderdiń tereń tamyrlastyǵy men senimge negizdelgen strategıalyq áriptestigine erekshe toqtaldy. Eki el yntymaqtastyǵynyń bastaýynda turǵan, qarym-qatynasynyń turaqty damýyna zor yqpal etken Ázerbaıjannyń jalpyhalyqtyq kóshbasshysy Geıdar Álıev pen Qazaqstannyń tuńǵysh prezıdenti, Elbasy Nursultan Nazarbaevtyń róline M.S. Nárikbaev atyndaǵy KAZGÚÝ ýnıversıtetiniń ókili Mıras Dálenov te toqtaldy. Sóz alǵandardyń aıtýynsha, sonyń arqasynda Nur-Sultan men Baký arasyndaǵy baılanys arnasy keńeıip keledi. Dóńgelek ústel kezinde eki eldiń quqyqtyq memleket retinde qalyptasýy, ata-zańnyń memlekettilikti qalyptastyrýdaǵy róli, kóp ult ókilin birlikke jumyldyra otyryp damýdaǵy baýyrlas elderdiń tájirıbeleri týraly mazmundy baıandamalar jasaldy. Atap aıtqanda, «Pravo ı gosýdarstvo» jýrnalynyń bas redaktory KAZGÚÝ ýnıversıtetiniń PhD, Sergeı Ýdarsev, táýelsiz sarapshy Naılá Álmuhamedova, KAZGÚÝ ýnıversıtetiniń aǵa ǵylymı qyzmetkeri, PhD Mýslım Hasenov, EUÝ halyqaralyq qatynastar fakúltetiniń 3-kýrs stýdenti Ánel Alybekovalar túrli taqyrypta tolymdy baıandama jasady. Al «Qazaqstan tarıhy» portalynyń shyǵarýshy redaktory Arman Súleımenov bolsa, «Ázerbaıjandaǵy mýltıkýltýralızmniń tarıhy» atty baýyrlas elde úsh aı boıy júrgizgen zertteý jumysynyń nátıjesimen tanystyrdy. Ol Baký halyqarlyq mýltıkýltýralızm ortalyǵynyń jumystary týraly keń aýqymda aıtyp berdi. Jobasyn tanystyryp bolǵan Arman Súleımenov KAZGÚÝ ýnıversıtetinde atalǵan ortalyqtyń bólimshesin ashý týraly óz usynysyn da jetkizdi.

RELATED NEWS

Ázerbaıjan

30 jeltoqsan 2024

Azerbaijan Airlines ushaǵyn jerden atqylaǵan - Ázerbaıjan prezıdenti

“Azamattyq ushaq Reseı aýmaǵynda, Groznyı qalasynyń mańynda syrttan zaqymdanyp, is júzinde basqarýdan aıyrylǵan. Biz sonymen birge ushaqty radıoelektrondy kúres quraldary arqyly basqara almaıtyndaı jaǵdaıǵa jetkizgenin de bilemiz. Bul ushaqqa keltirilgen alǵashqy zaqym” dedi Álıev ázerbaıjan telearnasyna bergen suhbatynda.

Ol atqylaýdyń saldarynan ushaqtyń artqy bóligi qatty zaqymdanǵanyn aıtty.

Onyń sózinshe, túpkilikti qorytyndy qara jáshikti ashqannan keıin belgili bolady. Ázerbaıjan prezıdentiniń sózinshe, ushaqty qasaqana atqylamaǵan.

Álıev sonymen birge "qandaı da bir gaz balony jaryldy" dep málimdegen Reseı bıligi kinásin moıyndap, Ázerbaıjannan keshirim suraýdyń ornyna "máseleni jasyrýǵa" tyrysty dedi.

“Reseıdiń resmı qurylymdarynyń qandaı da bir gaz balony jarylǵany jóninde boljamdy alǵa tartýy bizdiń kóńilimizdi qaldyrdy ári tańǵaldyrdy. Iaǵnı, Reseı jaǵy máseleni jasyrǵysy keletinin aıqyn kórsetti jáne bul árıne, abyroı ákeletin nárse emes” dedi Álıev.

Ázerbaıjan

25 jeltoqsan 2024

Ázerbaıjanda aza tutý kúni jarıalandy

Baký-Groznyı reısin oryndaǵan Embraer 190 jolaýshylar ushaǵynyń apatqa ushyraýyna baılanysty 26 jeltoqsanda Ázerbaıjanda aza tutý kúni jarıalandy, dep habarlaıdy Azertag agenttigi.

Ázerbaıjan Respýblıkasynyń Prezıdenti Ilham Álıev tıisti jarlyqqa qol qoıdy.

Eske salaıyq, búgin Bakýden Groznyıǵa bet alǵan «Ázerbaıjan áýe baǵyttary» kompanıasyna tıesili ushaq Aqtaý mańynda qulap tústi. Bortta 37 Ázirbaıjan, 6 Qazaqstan, 3 Qyrǵyzstan, 16 RF azamaty bolǵan. Ázirge 28 adam aman qalǵany aıtylýda.

Ázerbaıjan

26 qyrkúıek 2024

Ázerbaıjannyń Qazaqstandaǵy mádenıet kúnderi aýqymdy ótti

Ázerbaıjannyń Qazaqstandaǵy mádenıet kúnderine oraı ótken gala-konsertke myńǵa jýyq adam qatysty, dep habarlaıdy Ulys Mádenıet jáne aqparat mınıstrligine silteme jasap.

Ázerbaıjannyń Qazaqstandaǵy mádenıet kúnderi Q.Qýanyshbaev atyndaǵy memlekettik akademıalyq qazaq mýzykalyq-drama teatrynda ótken gala-konsertpen qorytyndylandy. Aýqymdy is-sharaǵa myńǵa jýyq kórermen - shyǵarmashylyq zıaly qaýym, vedimistik baǵynysty uıymdar ókilderi, sondaı-aq elorda turǵyndary men qonaqtary jınaldy.

Sondaı-aq konsertke QR Mádenıet jáne aqparat mınıstri Aıda Balaeva men Ázerbaıjan Respýblıkasynyń Mádenıet mınıstri Adıl Kerımlı qatysty.

Sahnada Ázerbaıjannyń Halyq ártisteri Samır Djafarov, Alıhan Samedov, Týnzalá Agaeva, Azer Zeınalov, Gýláz Mamedova, Ázerbaıjannyń eńbek sińirgen ártisteri Rashad Ilásov, Lala Mamedova jáne basqa da tanymal ónerpazdar óner kórsetti. İs-sharada Qazaqstan mádenıetin Qazaqstannyń eńbek sińirgen ártisi Álisher Kárimov pen halyqaralyq jáne respýblıkalyq baıqaýlardyń laýreaty Aıaýlym Qajymuhanqyzy Jýmkenova tanystyrdy.

Konsert barlyq qatysýshylardyń Qazaqstan men Ázerbaıjan arasyndaǵy mádenı birlik pen dostyqtyń sımvolyna aınalǵan Mýslım Magomaevtyń áıgili «Ázerbaıjan» ánin oryndaýymen aıaqtaldy.

Aıta keteıik, 24-26 qyrkúıek aralyǵynda Qazaqstanda Ázerbaıjannyń mádenıet kúnderi ótti. Onyń aıasynda Astanada kitaptardyń tusaýkeseri, etno-djaz konserti, eki eldiń Ulttyq kitaphanalary arasyndaǵy memorandýmǵa qol qoıý, sondaı-aq «Ázerbaıjan óneriniń injý-marjandary» kórmesiniń ashylýy jáne Ázerbaıjan memlekettik bı ansambliniń konserti ótti.

2023 jyldyń jeltoqsan aıynda Bakýde Qazaqstannyń Ázerbaıjandaǵy Mádenıet kúnderi joǵarǵy deńgeıde ótip, eki memleket arasyndaǵy mádenı baılanysty nyǵaıtýdaǵy mańyzdy qadam bolǵan edi.