«Qazaqstan» teleradıokorporasıasy Ulystyń uly kúnin joǵary deńgeıde atap ótpek. Máselen, korporasıa quramyna kiretin «Qazaqstan», «Qazsport», «balapan», «Tamasha Tv», jáne aımaqtyq 14 fılıal bıyl Áz Naýryzǵa erekshe tartý jasamaq. Búgin Ortalyq komýnıkasıalar qyzmetinde «Naýryz merekesine tartý» atty arnaıy baspasóz-konferensıasynda jan-jaqty aıtyldy.
Brıfıńke «Qazaqstan» telearnasynyń dırektory Erkin Muhamedjanov, «Qazsport» telearnasynyń dırektory Pavel Sybýlın, «Tamasha Tv» telearnasynyń dırektory Esen Eleýken, «balapan» telearnasynyń dırektory Maqpal Jumabaı jáne aımaqtyq habar taratýdy damytý dıreksıasynyń dırektory Erjanar Ásheıhan qatysty. «Ulystyń uly kúni - Naýryz halqymyzdyń ejelden kele jatqan berekeli merekesi. Bul salt-dástúrimiz ben ádet-ǵurpymyzdy ulyqtaıtyn, rýhanı mádenıetimizdi asqaqtatatyn erekshe meıram. Ulttyq arna osy ataýly kúndi dástúr boıynsha erekshe atap ótýge tyrysady. Sondyqtan, aldyn-ala birneshe arnaıy jobalar josparlanady. Naýryzdyń 21-inen bastap, úsh kún qatarynan adamzat tarıhyndaǵy jylqynyń róli men Ortalyq Azıa dalalaryndaǵy jylqynyń shyǵý tegi týraly baıandaıtyn halyqaralyq «Equus: Jylqy tarıhy» atty derekti trılogıanyń tusaýkeseri bolmaq. Sondaı-aq, naýryzdyń 22-si kúni, Naýryz merekesine oraı ulttyq arna Túrkıa, Qyrǵyz Respýblıkasy, Ózbekstan sekildi baýyrlas memlekettermen halyqaralyq telekópir arqyly baılanys ornatyp, ár eldegi merekelik atmosferamen bólisip, sol elderdegi naýryz merekesin toılaý dástúri jaıly sújetter men arnaıy suhbattar usynatyn bolamyz. Sonymen qatar, mereke kúnderi «Kúnnen týǵan bala...», «Amal aıshyqtary» sekildi derekti sıpattaǵy arnaıy jobalar úsh kún qatarynan efırge shyǵady. Taǵy bir erekshe aıta ketetin aqparat – bıyl biz «Naýryz-dýman» atty arnaıy joba josparlap, efırge ázirledik. Uzaqtyǵy 2,30 saǵatqa sozylatyn jańa joba Naýryz merekesine oraı kórermenderge arnaǵan úlken tartýymyz. Merekelik konsertimiz birneshe sújet jelisimen órilip otyrmaq. Qazaq óneriniń jaryq juldyzdary sol keshte óner kórsetedi. Bul óz jańa-jylymyzdy ulyqtaýdyń bir kórinisi dep kesip aıta alamyz»,- dedi «Qazaqstan» telearnasynyń dırektory Erkin Muhamedjanov.
Al, «Qazsport» telearnasy meıram kúnderi tikeleı efırde fýtboldan Qazaqstan Ulttyq quramasynyń Eýropa chempıonatyna irikteý oıyndaryn, birqatar qyzyqty baǵdarlamalar, derekti fılmder men sport sańlaqtarynyń suhbattaryn kórsetedi. Pavel Sybýlınniń aıtýynsha: «Kórermenderimiz 21 naýryz kúni HHİH qysqy Ýnıversıada oıyndarynyń qola júldegeri Janbota Aldabergenniń «Qazsport» qonaǵy baǵdarlamasyndaǵy suhbatyn, odan bólek, birneshe derekti fılmder, atap aıtqanda: aty ańyzǵa aınalǵan qazaq qaqpashysy Quralbek Ordabaev jaıynda - «Qazaqtyń №1 qaqpashasy», qazaq boksynyń damýyna úlken úles qosqan jattyqtyrýshy Myrzaǵalı Aıtjanov týraly - «Bolmysy bólek bapker», al, 22 naýryzda talantty bylǵary qolǵap sheberi, 2005 jylǵy álem chempıony Erdos Jańabergenov jaıynda «Daraboz»,halyqaralyq «Atlant» festıvaliniń jeńimpazy atanǵan «Istorıa malenkoı rýsalkı» derekti fılmderin tamashalaı alady. Al, 23 naýryz kúni «Absent - Olımpııskıı chempıon ız kazahskıh stepeı!» atty derekti fılm kórsetiledi. Bul fılmde qazaq jerinde dúnıege kelgen, aty ańyzǵa aınalǵan, asyl tuqymdy ahalteke – Absenttiń jetistikteri baıandalady. Almaty ıpodromyn álemge pash etip, dańqyn asqaqtatqan jylqyǵa Lýgovoe jylqy zaýytynda eskertkish ornatyldy. Odan basqa, 2020 jyly ótetin Eýropa chempıonatynyń irikteý kezeńindegi Qazaqstan quramasynyń Shotlandıamen kezdesýi tikeleı efırde ótedi. Aıta keteıin, «QAZAQ PROMOTION» atty kásipqoı boks keshin de kórsetetin bolamyz. Fýtbol súıer qaýym úshin jaǵymdy jańalyq: Chempıondar lıgasynyń pleı-off kezeńindegi tartysty ári qyzyqty machtar «Real Madrıd»-«Aıaks» jáne «PSJ» men «Manchester Iýnaıted» arasyndaǵy machtardy qaıtalaımyz. Atyraý qalasynda ótken «M-1 Challenge 100» aralas jekpe-jek týrnırin kórsetemiz. Al, 24 naýryzda kásibqoı rıngte qazaqtyń atyn shyǵaryp júrgen sańlaqtar – Jánibek Álimhanuly men Sadrıddın Ahmedovtyń jekpe-jekteriniń qaıtalaýlaryn usynamyz. Sonymen qatar,fýtbolsúıer qaýym «EURO 2020-ǵa» irikteý kezeńindegi Qazaqstan quramasy men Reseı arasyndaǵy machty tikeleı efırde kóretin bolady,»-dedi.
Al «balapan» telearnasynyń da balalarǵa bazarlyǵy daıyn. Kishkentaı kórermenderdiń nazaryna kóktemgi telemaýsymda barlyǵy 22 joba usynylǵan. Onyń ishinde 6-y ishki ónim, al 10-y sheteldik úzdik anımasıalar men derekti fılmder toptamasy, 3 telehıkaıa jáne 3 You Tube-qa arnalǵan jobalar. «Bıyl balalar arnasynda tuńǵysh ret tańǵy baǵdarlama jaryqqa shyqty. Oıyn-saýyq jáne aqparattyq baǵyttaǵy «Tańjaryq» habaryn kishkentaı kórermender senbi jáne jeksenbi kúnderi tamashalaı alady. Al «Balamen suhbat» baǵdarlamasynda balalar elimizge belgili, ómiri men eńbek joly urpaqqa úlgi bolarlyq tulǵalarmen áńgime-dúken túrinde suhbat qurady. «balapan» arnasy bıyl 22 naýryz – Ulystyń uly kúnine oraı arnaıy merekelik jobalar da daıyndady. Telearnamen únemi shyǵarmashylyq baılanysta bolyp, belsendilik tanytqan Elorda mektepteri arasynda «Naýryz-dýman» atty ulttyq oıyndar ótkizildi. Munda 8-9 jasar mektep oqýshylary «buqa tartys», «kúı tartys», «qazaqsha kúres», «jamby atý», «asyq atý» sıaqty ulttyq oıyndar boıynsha saıysqa tústi. Bul jobanyń televızıalyq nusqasy mereke qarsańynda efırden kórsetiledi. Sondaı-aq, joǵaryda atap ótken ishki ónim jobalarynyń da merekelik shyǵarylymdary bolady. Stýdıalar merekege saı ulttyq úlgide bezendiriledi. Ulttyq dástúr, ádet-ǵuryp barynsha nasıhattalady. Erekshe atap óterligi, «Tańjaryq» baǵdarlamasynda elimizdegi «eń kúshti bala» atanǵan, 6 jasar rekordshy Bekmansur Tımýruly júrgizýshilermen asyq atyp saıysady. Al aspaz balaqaılar ulttyq taǵam túrlerin daıyndap, óz sheberlikterin ortaǵa salady. «Bala Time» habarynyń arnaıy qonaǵy, Maıra İlıasova stýdıamyzǵa kelgen kishkentaı kórermenniń tusaýyn kesip, baǵdarlamada ulttyq dástúrimizden úzindi kórsetiledi. «Balamen suhbat» baǵdarlamasynda belgili etnograf Jambyl Artyqbaev balalarǵa halqymyzdyń umyt bola bastaǵan kóne oıyndaryn úıretip, salt-dástúrden syr shertedi. Sonymen qatar, demalys kúnderi «Belldiń tańǵjaıyp álemi» jáne «Sulý men qubyjyq» atty tolyqmetrajdy anımasıalyq fılmder kórermen nazaryna tuńǵysh ret qazaq tilinde usynylady»,-dedi «balapan» telearnasynyń dırektory Maqpal Jumabaı.
«Qazaqstan» teleradıokorporasıasynyń quramyna kiretin aımaqtyq telearnalar da naýryz merekesine oraı birqatar arnaıy jobalar daıyndaǵanyn atap ótti. Aımaqtyq habar taratýdy damytý dıreksıasynyń dırektory Erjanar Ásheıhan birneshe jobalarǵa toqtalyp ótti: «2019 jyldyń 22 naýryzynda Ulystyń uly kúninde Korporasıanyń aımaqtyq arnalarynda bir mezgilde kóktemgi jańa televızıalyq maýsymy bastalady. Aımaqtyq telearnalardy qosyp alǵanda, barlyǵy 61 jańa baǵdarlama efırge josparlanǵan bolatyn. 22 naýryz kúni «ALTAI», «OŃTÚSTIK», «AQTÓBE», «MAŃǴYSTAÝ» arnalary «QAZAQSTAN» ulttyq arnasyna tikeleı efırde qosylyp, aımaqtaǵy Naýryz merekesiniń toılaný týraly qyzyqty málimetter men sújetter beredi. Jalpy, Ulystyń uly kúnine baılanysty aımaqtyq arnalar 56 televızıalyq joba daıyndap otyr. «SARYARQA» arnasy «Naýryzym», «QOSTANAI» arnasy «Aýylǵa baram» atty eki 2 qysqa metrajdy fılm túsirdi. Al, «ATYRAÝ» telearnasy «Nur jaýǵan Naýryz» atty Reseıdiń Astrahan, Ázerbaıjannyń Gánja qalalary arasynda elaralyq telekópir ótkizedi.
2018 jyldyń 1 qyrkúıeginen habar tarata bastaǵan «Tamasha tv» arnasynyń dırektory Esen Eleýken de birneshe jańalyqtarymen bólisti. Onyń aıtýynsha: «Jańa maýsym aıasynda bıyl kórermenderimizge 14 joba tartý etpekpiz. Alǵashqy 8 joba naýryz aıynda shyqsa, qalǵan 6 jobany sáýirge josparlap otyrmyz. Olardyń barlyǵy derlik jańadan shyǵyp jatqan baǵdarlamar, árıne ázilge qatysty. Sondaı-aq, oıyn-saýyqtyq baǵdarlamalar da bar. Eń basty úlken jobalarymyzdyń biri «Tamasha Club», ázilge qatysy bar jastardyń ártúrli obrazdaǵy qysqasha qoıylymdardan quralǵan skech-shoý. «Bir ǵanıbet» jobasyn da erekshe atap ótkim keledi, bizdiń belgili aǵa-ápkelerimiz ózderiniń basynan ótken ázilge toly qyzyqty oqıǵalarymen bólisedi. Sondaı-aq, jalpy qazaq satırasyna, qazaq áziline, qazaq qaljynyna qatysty ómirden ótken jandarǵa arnalǵan «Ázil-Dastan» jobasy shyǵatyn bolady. Bul jobany tanymal satırık - Kópen Ámirbek júrgizedi. Al, «Taýyp kór» tanymdyq baǵdarlamasyna qarapaıym adamdar qatysady. Olar ózderine berilgen 4-5 tapsyrma arqyly kimmen sóılesip otyrǵanyn taýyp alýǵa tyrysatyn bolady. Ázil súıer kórermenderge aıta keteıin, «Tamasha tv» arnasyn «Qazaqstan» teleradıokorporasıasynyń «Qazaqstan tv» mobıldik qosymshasy arqyly kórýge múmkindik týyp otyr. Qazirgi tańda qosymshany androıd nusqalarynda júktep alýǵa blady, jaqynda IOS-qa da qosylady dep josparlanýda. Sonymen qatar,baǵdarlamalardyń bárin tamashakz.tv saıty arqyly tikeleı efırde kórýge bolady. Al, aldaǵy sáýir aılarynda elimizdiń barlyq kabeldik operatorlaryna tolyq qosylady. Qazirgi kezde «Otaý Tv» - dan shyǵyp jatyrmyz. Jaqynda ID TV men Alma Tv-ǵa tolyq qosylamyz degen oıdamyz.»- dep aıaqtady Esen Eleýken.
