Memleket basshysy «Astana» halyqaralyq qarjy ortalyǵynyń basqarýshysy Renat Bekturovty qabyldady, dep habarlaıdy Aqorda.

Prezıdentke AHQO-nyń byltyrǵy jáne bıylǵy I toqsanda atqarǵan jumysynyń nátıjeleri baıandalyp, ortalyqty damytý jospary tanystyryldy. Renat Bekturovtyń aıtýynsha, Qarjy ortalyǵy iske qosylǵan sátten beri elimizge 11 mıllıard dollardan astam (2023 jylǵy jáne osy jyldyń alǵashqy 3 aıyndaǵy 3,5 mıllıard dollar qarjyny qosa alǵanda) ınvestısıa tartýǵa atsalysqan. Bul 2025 jylǵa aldyn ala belgilengen maqsatty kórsetkishten asyp tústi.

Qasym-Jomart Toqaevqa ótken jyly AHQO-da tirkelgen kompanıalardyń sany 670-ten (jalpy álemniń 78 elinen 2600-den asa kompanıa) asqany jóninde málimet berildi. Bul – rekordtyq kórsetkish.

Byltyr jáne osy jyldyń alǵashqy úsh aıynda Ortalyq qatysýshylary memleket búdjetine 48,7 mıllıard teńge salyq tólegen. Daýlardy sheshýde AHQO soty men Halyqaralyq arbıtraj ortalyǵy sıaqty ınstıtýttar tabysty jumys istep jatyr. 2023 jyly 767 komersıalyq is qaralǵan.

Prezıdent Qarjy ortalyǵyn odan ári damytýǵa qatysty birqatar ózekti mindetti aıqyndap berdi. Atap aıtqanda, AHQO-nyń óńir úshin jasyl qor tartý jáne Orta dálizdi damytý isindegi róline toqtaldy. Elimizdegi «jasyl» oblıgasıalar men kredıtterdiń 60 paıyzdan astamy AHQO Jasyl qarjy ortalyǵynyń qoldaýymen berildi. Qarjy ortalyǵynyń ıýrısdıksıasynda Orta dáliz jobasy aıasynda birlesken kásiporyndar jumys istep jatyr.

Sonymen qatar Qasym-Jomart Toqaev qazirgi jaǵdaıda mámileler jasaý úshin AHQO ınfraqurylymyn belsendi paıdalana otyryp, Qazaqstan ekonomıkasyna ınvestısıa tartýǵa kómektesetin barlyq memlekettik organ men oǵan jetekshilik etetin qarjy ınstıtýttarynyń kúsh-jigerin biriktirý qajet ekenine nazar aýdardy.

Qazaqstan men Ońtústik Koreıa elderi arasyndaǵy áýe reısteriniń sany artyp, jańa áýe baǵyttary ashylady. Bul týraly Kólik mınıstrligi habarlaıdy.

QR Kólik vıse-mınıstri Talǵat Lastaevtyń Koreıa Respýblıkasy Jer, ınfraqurylymy jáne kólik mınıstriniń orynbasary Iýn Sang Lımen kezdesti. 

Kezdesý barysynda taraptar Astana men Seýl arasyndaǵy reısterdi qaıta bastaý, Almaty – Seýl baǵyty boıynsha oryndalatyn reısterdi ulǵaıtý, sondaı-aq Shymkentten Seýlge jáne Pýsan men Qazaqstan qalalary arasyndaǵy reısterdi ashý máselesin talqylap ýaǵdalasty. 

Sonymen qatar Talǵat Lastaev T' Way tómen búdjettik áýe kompanıasynyń jáne Sirius Airlines júk áýe kompanıasynyń basshylyǵymen kezdesý ótkizdi. Kezdesý barysynda koreıalyq tasymaldaýshylar Qazaqstanǵa ushýǵa nıetti ekenin bildirdi.

Búgin Májilis Reseı munaıyn Qazaqstan arqyly Qytaıǵa tasymaldaýǵa qatysty qujatty maquldady.

«2014 jyldan 2023 jylǵa deıingi kezeńde Reseı munaıynyń Qazaqstan arqyly Qytaıǵa tasymaly 90 mln tonnadan asty», - dedi Energetıka Almasadam Sátqalıev Parlamentte.

Mınıstrdiń sózine qaraǵanda, Reseı tarapy «Rosneft» qytaılyq SNPS-men aldaǵy 10 jylda munaı tasymalyn 100 mln tonnaǵa deıin jetkizý týraly kelisimdi uzartyp, qol qoıǵan.