Búgin Qazaqstan Respýblıkasynyń Túrkıadaǵy Elshiligi Ankara qalasynda Naýryz merekesin joǵary deńgeıde atap ótti. Bul týraly aqparat atalǵan elshiliktiń feısbýk áleýmettik jelisinde (https://www.facebook.com/kzembassy) jarıalandy.
Merekelik sharaǵa Qazaqstannyń Túrkıadaǵy Elshisi Abzal Saparbekuly, Túrkıa Respýblıkasy Prezıdentiniń Bas keńesshileri Ialchyn Topchý jáne I.Shener, Túriksoı Bas hatshysynyń orynbasary F. Pýrtash, Túrkıa Uly Ulttyq Májilisiniń eks-spıkeri Hıkmet Chetın, TUUM depýtaty, burynǵy Premer-Mınıstr orynbasary Iyldyrym Tuǵryl Túrkesh jáne Túrkıanyń memlekettik jáne qoǵam qaıratkerleri, Ankaradaǵy dıplomatıalyq korpýs basshylary, Ystambul, Manısa, Nıǵde, Sakarıa qalalarynyna kelgen qazaq dıasporasy ókilderi, Túrkıada bilim alyp jatqan qazaq jastary men BAQ ókilderi qatysty. Jınalǵan qaýymǵa qazaqtyń salt-dástúrleri kórsetildi. Atap aıtqanda, Qydyr atanyń bata berýi, betashar jáne tusaýkeser dástúrleriniń sahnalyq kórsetilimi shetel qonaqtaryn tánti etti.
Alqaly jıyn Ámre, «Jigitter» toby, Qazaq ulttyq óner Ýnıversıteti «Astana» fólklorlyq mýzyka toby, «Otaý» bı toby jáne «TÚRKSOI» ónerpazdarynyń konserttik baǵdarlamasy jáne resmı qabyldaýmen jalǵasyn tapty.
Naýryz merekesine oraı Elshilik baqshasynda kıiz úı tigilip, qazaqtyń ulttyq taǵamdary men kıimderi qonaqtarǵa tanystyryldy.
