"Kók Tý" qazaq mádenıeti qoǵamynyń múshesi, jas talant sýretshi Kárim Baıǵutovtyń "Ónertapqysh qoldar" atalatyn sýret kórmesiniń ashylý saltanaty ótti. Qazaqstanda jastar jylynyń jarıalanýyna oraı uıymdastyrylǵan kórmeniń ashylýyna Qazaqstan Respýblıkasynyń Túrkıadaǵy Elshisi Abzal Saparbekuly men óner janashyrlary jáne Ankarada bilim alyp jatqan qazaqstandyq stýdentter qatysty. Ashylý saltanatynyń alǵashqy quttyqtaý sózin sóılegen Elshi Abzal Saparbekuly, Elshilik retinde Qazaqstannyń Túrkıada keń tanystyrylýyna erekshe mán beretindikterin atap ótip, aıryqsha túrde mádenı jumystardyń bel ortasynda belsendilik tanytyp júrgen "Kók Tý" qazaq mádenıeti qoǵamyna alǵysyn bildirdi. Talantty sýretshi Kárim Baıǵutovtyń jastar jyly aıasynda uıymdastyrylǵan kórmesi bul turǵyda mańyzdy ekendigin salmaqtaı sóılegen Elshi myrza, qonaqtardy Naýryz merekesimen quttyqtady. Budan soń sóz alǵan qurmetti qonaqtardyń biri, profesor Húlıa Kasapoǵlý Chengel hanym bolsa, Qazaqstannyń Tuńǵysh Prezıdenti Nursultan Nazarbaevtyń sarabdal saıasatyna joǵary baǵa berip Elbasymyzdyń uly aqyn Maǵjan Jumabaıdyń "Men jastarǵa senemin!" muratymen úndes qadam jasaǵanyn atap ótti. "Elbasy Nazarbaevtyń sarabdal saıasaty arqasynda qazaq jastarymen naýryzdy Ankara tórinde qarsy alyp otyrmyz. Bir ǵasyr buryn qazaqtyń ataqty birtýar aqyny Maǵjan Jumabaı:
"Men senemin jastarǵa.
Alash atyn aspanǵa
Shyǵarar olar bir tańda,
Men jastarǵa senemin! " degen edi. Maǵjannyń jastar týraly ıdeıasy Nazarbaevtyń jastar jylymen jalǵasyn tapty. Men de jastarǵa senemin! Jastar jyly qutty bolsyn!",-dep sózin túıindedi.
Kórmeden keıin Naýryz merekesine oraı uıymdastyrylǵan merekelik is-shara konsertke ulasty. Ónerpazdar ulttyq áýenderdi asqaqtatyp, ásem án men áýezdi jyrdan shashylǵan shashý kópshiliktiń kóńilinen shyqty.
