Qazaq tarıhynyń tereńdigi men babalar jasaǵan órkenıettiń óresiniń bıiktigin kórsetetin «Altyn adam» Anadoly jerinde. Túrkıanyń astanasy Ankara qalasyndaǵy Anadoly órkenıetter mýzeıiniń kórme zalynda QR Ulttyq mýzeıiniń «Uly dala: tarıh jáne mádenıet» kórmesi ashyldy. «Altyn adamnyń álem mýzeılerine sherýi» atty halyqaralyq joba aıasynda júzege asty.
Qazaqstannyń Túrkıadaǵy elshiliginiń aqparatyna qaraǵanda, Eýropanyń eń úzdik mýzeıi dep tanylǵan Anadoly órkenıetter mýzeıinde ótken kórmeniń ashylý saltanatyna Túrkıa Respýblıkasy mádenı qundylyqtar jáne mýzeıler basqarmasy dırektorynyń orynbasary Seıit Ahmet Arslan, Qazaqstannyń Túrkıadaǵy Elshisi Abzal Saparbekuly, Qazaqstannyń Ulttyq mýzeıi dırektory Arystanbek Muhamedıuly men TÚRKSOI Bas hatshysy Dúısen Qaseıinov qatysqan. Qazaqstannyń Túrkıadaǵy Elshisi Abzal Saparbekuly óz sózinde «Qazaqstannyń «Rýhanı jańǵyrý» memlekettik baǵdarlamasy aıasynda Ankaranyń tórinde, Túrkıanyń eń mańyzdy mýzeıleriniń birinde ótkizilip otyrǵan osy maǵynaly sharaǵa qosh keldińizder!
«Altyn adamnyń álem murajaılaryna sherýi» halyqaralyq kórme jobasynyń baýyrlas Túrkıaǵa kelip jetkeni barshamyzdy erekshe qýantyp otyr. «Uly dala tarıhy jáne mádenıeti» atty osy kórme arqyly ultymyzdyń baǵa jetpes qazynasyn tamashalaýdyń taptyrmas múmkindigine ıe bolyp otyrmyz. Osy is-shara arqyly túrik kórermeniniń de qazaqtyń baı tarıhı jáne mádenı murasymen tanysyp, tánti bolaryna kúmánim joq» -dedi.
Qazaqstan Respýblıkasy Ulttyq mýzeıi halyqaralyq «Altyn adamnyń álem mýzeılerine sherýi» týrnesi aıasynda kórme buǵan deıin Belarýs, Reseı, Ázirbaıjan, Qytaı, Polsha, Ońtústik Koreıa, Tatarstan, Ózbekstan jáne Soltústik Makedonıa mýzeılerinde ótken bolatyn. Qazaqstan Respýblıkasy Ulttyq mýzeı dırektory Arystanbek Muhamedıuly, kórmege kıimi altyn japsyrmalary jáne jebe, qar barysy, arqar, jylqy jáne qus túrindegi altyn tilimsheler áshekeılep turǵan konýs pishindi erekshe bas kıimdi Altyn adamnyń rekonstrýksıasyn jáne osy jas saq jaýyngerimen (arheologtar pikirinshe, 17-18 jastaǵy) birge jerlengen erte temir dáýirindegi (b.d.d. V-IV ǵasyr) arheologıalyq jádigerler qoıylǵanyn óz feısbýk paraqshasyna jazdy. Sondaı-aq ol kórmege Qazaqstan Respýblıkasynyń Ulttyq mýzeı qorlarynan 207 zat usynylǵanyna toqtala kele, «kórmege qoıylǵan Qazaqstannyń ejelgi jáne ortaǵasyrlyq óneriniń jaýharlary - bul Eýrazıa dala mádenıeti murasynyń ózindik ereksheligin burynǵynyń esimderi belgisiz sheberleriniń týyndylarynyń az ǵana bóligi. Kórmege kelgen qonaqtar Qazaqstannyń kóne mádenıetine, sheberlerdiń ónerine tamsanyp, erekshe áserlenip shyǵýda»,-dep jazdy. Shara aıasynda Qazaqstan men Túrkıanyń bas mýzeıleri arasynda yntymaqtastyq týraly hattamaǵa qol qoıyldy. Kórme 12-shi qazanǵa deıin bolady.
Sýretter Qazaqstannyń Túrkıadaǵy Elshiginiń feısbýk paraqshasynan alyndy.
