Keshe Almatydaǵy Halyk IMAX Kinopark 16 kınoteatrynda "Malaı" atty jańa otbasylyq komedıanyń aýqymdy premerasy ótti. İs-sharaǵa 800-den astam qonaq shaqyryldy, olardyń arasynda tanymal kınogerler, blogerler men jýrnalıser boldy. Qonaqtardy ulttyq kıimdegi qyzdar qarsy alyp, zalda halyq aspaptar orkestri oınady, al fılmniń kórsetilimi alty zalda uıymdastyryldy. Qatysýshylar atap ótkendeı, bul Qazaqstandaǵy eń iri kıno tusaýkeserlerdiń biri boldy.
Aldaǵy Naýryz merekesiniń basty fılmine aınalatyn «Malaı» atty jańa otbasylyq komedıa otandyq kınoteatrlardan 13 naýryzdan bastap kórsetiledi. Bul «Holop» atty tabysty halyqaralyq franshızanyń resmı adaptasıasy – 2019 jyly shyqqan alǵashqy fılm reseılik prokattyń ózinde 62 mıllıon dollardan astam paıda tapqan, al týyndyny beıimdeý quqyǵy kóptegen elderge, sonyń ishinde Fransıa, Túrkıa, Meksıka, Úndistan jáne Japonıa sekildi iri kınonaryqtarǵa satylǵan.
Fılmniń otandyq nusqasynyń rejıseri – «Kelinjan», «Hotá by v kınoda 2» jáne «Jezdýha» sıaqty tabysty hıtterdi túsirgen Ernar Nurǵalıev. Rejıserdiń aıtýynsha - bul búkil otbasymen kórýge arnalǵan, janǵa jylý syılaıtyn kóńildi hıkaıa. Otandyq “Malaı” qazaq tilinde túsirilip, fılmde jergilikti mentalıtet pen ázil erekshelikteri eskerildi.
Sújet Chına esimdi baı balasy týraly, ol dúnıede barlyq nárseni ákesiniń aqshasyna satyp alýǵa bolatynyna senimdi. Bir sátte ákesiniń shydamy taýsylyp, ol ulyn erekshe ádispen qaıta tárbıeleýge sheshim qabyldaıdy – olıgarh XIX ǵasyrdaǵy qazaq aýylyn qaıta qurastyrtyn arnaıy adamdardy jaldap, Chınany sol jaqqa jiberedi. Ol endi aýqatty ákeniń balasy emes, jańa jaǵdaıda kún kórýge májbúr bolǵan qarapaıym jigit bolyp shyǵa keledi.
“Álemdik kınoda sátti týyndylardy negizge alyp, olardyń adaptasıasyn usyný – keń taralǵan ári tanymal ádis. Biz de osy baǵytty qoldanyp, ózimizge úlken talap qoıdyq. Qazaqstan qoǵamynda majorlardyń taqyryby óte ózekti, sol sebepti “Holop” franshızasy bizge sáıkes keldi. Bizge qazaq mentalıtetin, qundylyqtary men ázilin eskere otyryp, beıimdeý óte mańyzdy boldy. Sonymen qatar, “Malaı” – tolyqtaı qazaq tilinde túsirilgen fılm”, – dep atap ótti Unico kompanıasynyń bas prodúseri Anara Jýnýsova.
Basty rólde Zheka Fatbelly degen laqap atymen tanymal bloger Jeńis Omarov oınaıdy - onyń Instagram jelisinde 3,1 mıllıon oqyrmany bar. Bul onyń kınodaǵy alǵashqy úlken róli. Jeńistiń aıtýynsha, ol túsirilim kezinde qınalǵan, óıtkeni fızıkalyq sahnalar óte kóp bolǵan - ásirese, at ústinde otyrý, atpen shabý degen sekildi. Biraq, qıyndyqtarǵa qaramastan, ol óz rólinde oınaı bilip, keıipkerin túsinýge tyrysqan.
«Meniń keıipkerim - toıynǵan baıdyń balasy. Eshkimdi tyńdamaıdy, eshkimnen qoryqpaıdy. Kóp jamandyq jasaıdy jáne ákesiniń qudyretimen bárin sheshemin dep úmittenedi. Asa jaǵymsyz keıipker, biraq, sonymen birge, onyń ishinde bir muń bar. Onyń ózin osylaı kórsetkeni - ony eshkim estip, kórmegen soń, bul onyń narazylyq bildirýi, bylaı aıtqanda protesty», - deıdi Jeńis Omarov.
Fılmde, sonymen qatar, Aıda Qurmanǵalıeva, Dýlyǵa Aqmolda, Laýra Myrzahmet, Ermek Shynbolatov, Sábına Movlaeva, Jandarbek Sadyrbaev, Hamıt Erdehan sekildi tanymal juldyzdar oınaıdy.
Fılmdi «Qazaqfılm» kınostýdıasymen birlese otyryp, Unico kompanıasy shyǵarǵan. «Malaı» otbasylyq komedıasy 13 naýryzdan bastap, elimizdiń barlyq kınoteatrlarynda kórsetiledi. Fılm týraly barlyq ózekti aqparat @malay_film paraqshasynda qoljetimdi.
