Mańǵystaý oblysynda qolyndaǵy qarjysyn eki eselep kóbeıtemin dep almas óndirisine ınvestısıa quıǵan myńdaǵan turǵyn san soǵyp qaldy. Jábirlenýshiler ońbaı aldandyq dep Aqtaýdaǵy prokýratýra ǵımaraty mańyna jınaldy, dep habarlaıdy Ulys Almaty arnasyna silteme jasap.

Kómek suraǵandardyń arasynda baspanasy men kóligin satyp, eń sońǵy tıyn-tebenine deıin salyp jibergender bar eken. Shaǵymdanýshylar alaıaqtyń jasaǵan jarnamasyna senip qalǵandaryn aıtady. Qazir Qarjylyq monıtorıń agenttigi bul is boıynsha sotqa deıingi tergeý júrgizip jatyr.

Jınalǵan jurt osydan 5 jyl buryn bar jıǵan-tergenin Sax Invest kompanıasyna quıǵan eken. Belgili bolǵandaı, uıym halyqty almaz óndirisine aqsha salýǵa úgittegen. Salǵan salymnan aı saıyn 2 paıyz paıda tabasyzdar dep sendiripti. Qoldaryna kepilhat ta berip otyrǵan eken. Keıinnen kópshilikpen baılanysyp otyrǵan álgi adam el syrtyna shyǵyp ketip, jurtshylyqpen hat ta almaspaǵan, habaryn da bermegen.

«Biz ol kisige bala-shaǵamyzǵa dep jınap otyrǵan búkil qarajatymyzdy salǵanbyz. Artynsha ózgerister bolyp, bizge «aqshany osyndaı ýaqytta qaıtaramyz» dep mindetteme qaǵazyn berdi. Sol qaǵaz bizdiń qolymyzda bar. Sodan keıin ol kisi habarsyz ketti. Tek Angolada júrgenin áleýmettik jeliden ǵana baqylaımyz. Soǵan senip osy ýaqytqa deıin otyrdyq. Búgingi kúnde Sátjannan eshqandaı habar joq. Bizdiń aqshamyzdy qaıtarsyn! Alaıaqtyq jolmen aldap, aqshamyzdy qaıtarmaı otyr», - deıdi Aqtaý qalasynyń turǵyny Gúlshar Bergarına.

Jınalǵandardyń kóbi álgi kisiniń shotyna shamamen 10 myń AQSH dollaryna deıin salǵan. Qazir atalmysh kompanıaǵa qatysty is elordada tergelip jatyr. Biraq jınalǵan qaýym onyń Aqtaýda qaralýyn suraıdy. Aldanǵan jurt óńirdiń Polısıa departamentine jazǵan aryzymyz qanaǵattandyrylmaı jatyr dep shaǵymyn jetkizdi.

«Bul kisi bizge kelip, óz kompanıasyn jarnamalap, aksıaǵa ınvestısıa salyńyzdar dep aldady. Onyń sózine senip, kóligimdi satyp, 10 myń AQSH dollaryn quıdym. Qarajatymyzdy qaıtaratyn kepilhatyn da berdi. Mine, bes jyl boıy tabys tappaq túgili, óz aqshamyzdy ala almaı otyrmyz. Qarjyny qaıtar desek, «Angolada jumys istep jatyrmyn» dep qurǵaq ýádege sendirip keldi. Endi quzyrly organdar aryzymyzdy qanaǵattandyryp, istiń Mańǵystaý oblysynda «Alaıaqtyq» baby boıynsha tergelýin suraımyz», - deıdi Aqtaý qalasynyń turǵyny Alla Kapýler.

Bazynasyn arqalaǵan jurtpen óńirdiń prokýrorlary jeke kezdesip, zańdy turǵyda túsinik jumysyn júrgizdik dep otyr.

«Astana qalalyq ekonomıkalyq tergeý departamenti Qylmystyq kodekstiń 217-babynyń 3-bóligi boıynsha sotqa deıingi tergep-tekserý júrgizip jatyr. Osy is boıynsha atalǵan organmen kúdikti tulǵalar ustaldy. Budan basqa tergeý áreketteri taǵy da jalǵasýda. Sonymen qatar búgin Mańǵystaý oblysy prokýratýrasynyń basshylyq quramy salymshylardy jeke qabyldap, tıisti zańdy túsindirme berdi», - dedi Mańǵystaý oblystyq prokýratýrasynyń basqarma basshysy Danıar Tólegenov.

Qarjylyq monıtorıń agenttiginiń málimetinshe, kompanıa halyqtan jalpy 9 mıllıard teńgege jýyq qarajat jınaǵan. Sondaı-aq vedomstvo osydan bir aı buryn «Sax Invest» qarjy pıramıdasyn uıymdastyrýshylardyń biri ustalyp, ýaqytsha ustaý ızolátoryna qamalǵanyn málimdegen edi.