Premer-Mınıstr Oljas Bektenovtiń tóraǵalyǵymen ótken Úkimet otyrysynda ǵalymdardyń qatysýymen elimizdegi atom energetıkasyn damytý perspektıvalary qaraldy, dep habarlaıdy Ulys Úkimettiń baspasóz qyzmetine silteme jasap.
Máseleni talqylaý qorytyndysy boıynsha energetıka mınıstri Almasadam Sátqalıev «Respýblıkalyq referendým ótkizý týraly» QR Prezıdenti Jarlyǵynyń jobasy týraly» Úkimet qaýlysynyń jobasyn qaraýǵa engizýge usynys jasady.
«Referendým ótkizý atom energetıkasyn damytý jáne elimizdiń energetıkalyq qaýipsizdigin qamtamasyz etý jóninde salmaqty sheshim qabyldaýǵa kómektesedi. Búgin biz tarıhı oqıǵa qarsańynda turmyz. Biz, qazaqstandyqtar, elimizde turaqty, ekologıalyq taza jáne únemdi elektr qýatynyń bolýy úshin mańyzdy sheshim qabyldaýymyz kerek. Bul bizdiń bolashaǵymyzdy aıqyndaıtyn sheshim», — dedi Almasadam Sátqalıev.
Úkimet basshysy Oljas Bektenov Qazaqstanda atom energetıkasyn damytý máselesi kópten beri kóterilip kele jatqanyn jáne bul salanyń keleshegi zor ekenin atap ótti. Búginde elimizde ıadrolyq otyn óndirisi tolyqtaı derlik ıgerilgen, shaǵyn reaktorlardy paıdalaný tájirıbesi jınaqtaldy. Bul baǵytta mamandar men ǵalymdarymyz da bar. Kadr daıarlaýǵa da kóńil bólinip keledi.
Sondyqtan atom energetıkasyn damytýdyń kelesi kezeńine kóshý durys qadam bolyp otyr. Bul ásirese, elimizdiń energetıkalyq ınfraqurylymyna júkteme artýynyń mańyzy aıryqsha.
Premer-Mınıstr búginde Qazaqstan energetıkalyq qýat tapshylyǵyn tartyp otyrǵanyn atap ótti. Eger máseleni osy bastan sheshpese, onda ekonomıkanyń ári qaraı ósýine qajetti elektr energıasyn úlken kólemde satyp alýǵa týra keledi.
Atom energıasy jónindegi halyqaralyq agenttiktiń málimetinshe búginde álemniń 31 elinde 415 ıadrolyq energoblok jumys isteıdi. Qazirgi ýaqytta 15 memlekette, sonyń ishinde Qytaı, Japonıa, Ońtústik Koreıa, Ulybrıtanıa men Túrkıada jańadan 61 atom stansıasynyń qurylysy júrýde.
Óıtkeni jahandyq kún tártibinde kómirtegi beıtaraptyǵy máselesi tur. Osy turǵydan alǵanda da atalǵan máseleniń mańyzy arta beretin bolady.
Bul rette jańartylatyn qýat kózderi turaqty energıamen qamtamasyz ete almaıdy. Qazaqstanda sý elektr stansalarynyń áleýeti shekteýli, óıtkeni energıa óndirý úshin talapqa saı keletin ózender joqtyń qasy. Búginde elimizde JEO-nyń keıbirin gazǵa aýystyryp, jańa bý-gaz qondyrǵylaryn salyp jatyrmyz. Alaıda, ekonomıkanyń damýy men halyq sanynyń ósýin eskersek, keleshekte ol da elektr energıasynyń tapshylyǵyn jabýǵa jetkiliksiz bolady.
Atom energetıkasyn damytý – biz úshin bolashaǵy óte zor baǵyt, dep atap ótti Úkimet basshysy.
Zamanaýı Atom elektr stansalary kóp deńgeıli qaýipsizdik júıesimen jabdyqtalǵan. Qazaqstanda Atom elektr stansıasyn salý týraly sheshim qabyldanǵan jaǵdaıda ony jobalaý, salý jáne paıdalaný kezinde MAGATE-niń halyqaralyq qaýipsizdik standarttary qatań basshylyqqa alynatyn bolady. Sonymen qatar shıkizat bazasy ózimizde, ıaǵnı ýran baǵasynyń aýytqýy bizge áserin tıgizbeıdi. Bul elektr energıasyna turaqty ári boljamdy tarıfterdi qamtamasyz etýge múmkindik beredi.
«Bizdiń elimiz sıaqty eń kóp energıa paıdalanatyn ekonomıkany damytýǵa dál osy atom energetıkasy negiz bolyp, halyqtyń turmys deńgeıin odan ári arttyrýǵa múmkindik berýge tıis. Álemdik tájirıbe kórsetip otyrǵandaı, atom energetıkasy ekonomıkanyń kóptegen salalarynda ınovasıalardy qoldanýǵa yntalandyrady. Ári otandyq ónerkásiptiń damýyna da úlken serpin beredi. Sondyqtan biz ózimizde balamasy joq turaqty jáne senimdi energıa kózinen tys qala almaımyz», — dep atap ótti Oljas Bektenov.
Máseleni qaraý qorytyndysy boıynsha daýys berý júrgizildi. Usynylǵan Úkimet qaýlysynyń jobasy biraýyzdan qoldaý tapty.
Energetıka mınıstrligine Úkimet Apparatymen birlesip Prezıdent Ákimshiligine Jarlyq jobasyn engizý tapsyryldy.
