Memleket basshysy Sybaılas jemqorlyqqa qarsy is-qımyl agenttiginiń tóraǵasy Asqat Jumaǵalıdy qabyldady. Bul týraly Aqordanyń baspasóz qyzmeti habarlady. 

Prezıdentke Sybaılas jemqorlyqqa qarsy is-qımyl agenttiginiń elimizde qabyldaǵan sharalary týraly esep berildi.

Qasym-Jomart Toqaevqa Antıkor qyzmetiniń bıylǵy jospary, sonyń ishinde «Zań men tártip» qaǵıdatyn iske asyrý jónindegi negizgi mindetteri tanystyryldy.

Asqat Jumaǵalıdyń aıtýynsha, byltyr 1641 jemqorlyqqa qatysty qylmys tirkelip, júıeli túrde jemqorlyq jasaýdyń 68 faktisi anyqtalǵan. Eki uıymdasqan qylmystyq toptyń áreketi áshkerelenip, sonymen qatar eki topqa úkim shyǵarylǵan. Sybaılas jemqorlyqqa jol bergen 1493 adam ustaldy. Olardyń ishinde túrli deńgeıdegi 229 basshy bar. 914 adam sottaldy.

Agenttik 2022 jyldan beri memleketke jalpy somasy 1,12 trıllıon teńgege baǵalanǵan múliktik aktıvter men qarajattyń qaıtarylýyn qamtamasyz etken. Byltyr somasy 486,5 mıllıard teńge bolatyn múliktik aktıvter men qarajat qaıtarylǵan.

Prezıdentke vedomstvonyń memlekettik satyp alý men qarjynyń maqsatty ıgerilýine monıtorıń júrgizip, 87,7 mıllıard teńgeniń tıimsiz jumsalýyna jol bermegeni jóninde aıtyldy. Mańyzdy ınfraqurylymdyq jáne áleýmettik jobalardyń qurylysyn baqylaý jumystary jalǵasyp jatyr. Agenttiktiń qadaǵalaýynda 182 nysan bar, onyń ishinde 81 qurylystyń jumysy aıaqtalǵan.

Sybaılas jemqorlyqqa qarsy qyzmettiń basshysy Prezıdent tapsyrmalarynyń oryndalýy jaıynda baıandady. Atap aıtqanda, jol salasyndaǵy jemqorlyqty joıý úshin taldaý júrgizilip, ýákiletti organdarǵa birqatar usynym berildi. Agenttik qyzmetkerlerinen arnaıy qurylǵan toptar óńirlerdegi jol qurylysy men jóndeý jumystaryna monıtorıń júrgizip jatyr. Baqylaýǵa alynǵan 258 jobanyń jalpy uzyndyǵy 1,8 myń shaqyrym bolatyn 119 ýchaskesi paıdalanýǵa berilip, olarda anyqtalǵan aqaýdyń 95 paıyzy retke keltirildi.

«Sıfrlyq teńge» platformasynda «aqshany boıaý» pılottyq jobasy iske asyrylýda. Bul tetik aýyl sharýashylyǵy men jol salalarynyń jekelegen baǵyttarynda qoldanylyp jatyr. Keıinnen ony sıfrlyq júıemen birge búdjet qarjysyn jumsaýdyń barlyq kezeńine engizý josparlanǵan.

Budan bólek, medısına, sport jáne áleýmettik qoldaý salalarynda sybaılas jemqorlyq táýekelderine syrtqy taldaý jumystary aıaqtaldy.

Qasym-Jomart Toqaevqa densaýlyq saqtaý sektoryndaǵy taldaý qorytyndysy boıynsha dári-dármektiń ústeme baǵasy arzandaǵany jóninde aqparat berildi. Bul azamattardyń qajettiligin ótep, áleýmettik máselelerin sheshýge oń áser etedi. Elimizde naýqastarǵa QR-kod arqyly tegin dári-dármek berý jobasy iske qosyldy. Atalǵan bastama jalǵan reseptter jazyp berý, dári-dármekterdi urlaý táýekelderin azaıtyp, búdjet qarjysyn únemdeıdi.

Prezıdentke halyqaralyq yntymaqtastyqtyń nátıjeleri, sonyń ishinde Ázerbaıjan, Reseı, Gonkong, Iordanıa jáne Qatar elderiniń sybaılas jemqorlyqqa qarsy vedomstvolarymen memorandýmdarǵa qol qoıylǵany týraly aıtyldy.

Ekonomıkalyq yntymaqtastyq jáne damý uıymy men Sybaılas jemqorlyqqa qarsy kúres jónindegi memleketter tobynyń usynymdaryn iske asyrý boıynsha jumys jalǵasýda. Onyń aıasynda ozyq halyqaralyq tájirıbeni engizýdi kózdeıtin 2 zań jobasy Májilistiń qaraýyna usynyldy.

Kezdesý sońynda Memleket basshysy elimizdegi sybaılas jemqorlyqpen kúresti odan ári jalǵastyrý jóninde birqatar tapsyrma berdi.