Úkimet Astanada bıznes ókilderimen kezdesýde qosymsha qun salyǵynyń (QQS) saralanǵan mólsherlemesin talqylady. Bul týraly Ulys Úkimettiń baspasóz qyzmetine silteme jasap habarlaıdy.
Qarjy mınıstri Mádı Takıev pen ulttyq ekonomıka vıse-mınıstri Azamat Ámrın bıznes ókilderimen salyq reformasy sheńberinde QQS saralanǵan mólsherlemelerin belgileý jónindegi Úkimet usynystaryn talqylady.
Kezdesý «Atameken» UKP qoldaýymen uıymdastyryldy, oǵan bıznestiń, qaýymdastyqtardyń, qoǵamdyq jáne salalyq birlestikterdiń 150-den astam ókili qatysty. Olardyń qatarynda qazaqstandyq salyq keńesshileri qaýymdastyǵynyń, ózin-ózi retteıtin qoǵamdyq tamaqtandyrý uıymynyń ókilderi, Astana kásipkerler palatasynyń óńirlik keńesteriniń jáne óńdeý jáne farmasevtıka, medısına ónerkásibi komıtetteriniń, «Atameken» UKP, «Alageum Electric» kompanıalar tobynyń, «Petro mining» qaýymdastyǵynyń músheleri jáne basqalar bar.
«Memleket basshysy Qasym-Jomart Toqaev salyq júıesi teńgerimdi bolýy tıis ekenin atap kórsetti. Bul naqty nusqaý boldy. Ol bıznes pen memlekettiń múddelerin eskerýi kerek. Búgin biz basty máselelerdiń birin talqylaý úshin jınaldyq, bul qosylǵan qun salyǵyna qatysty. Biz óńirlerde Ekonomıka, Qarjy mınıstrlikteriniń, «Atameken» palatasynyń ókilderi qatysatyn kóptegen kezdesý ótkizemiz. Jumys úlken jáne jan-jaqty. Bizdiń meken-jaıymyzǵa kelip túsken barlyq usynystar tyńdalady. Biz biryńǵaı ustanymdy qalyptastyramyz, óıtkeni Salyq kodeksi óte qarapaıym, túsinikti, naqty bolýy tıis», — dep atap ótti Mádı Takıev.
QQS – bul búdjetti tolyqtyrýdyń negizgi kózderiniń biri. QQS mólsherlemesin arttyrý jáne saralaý búdjettiń munaıdan túsetin ózgermeli kiristerine táýeldiligin azaıtýǵa jáne memlekettik basym jobalardy qarjylandyrýǵa múmkindik beredi.
Óz kezeginde ulttyq ekonomıka vıse-mınıstri Azamat Ámrın salyq reformasy sheńberinde QQS saralanǵan mólsherlemelerin belgileý jónindegi Úkimettiń usynystaryn aıtty.
«Biz mynadaı tetikti qarastyrýdy usynamyz: jalpy belgilengen QQS mólsherlemesi 16%, aýyl sharýashylyǵy ónimderin óndirýshilerdi QQS-tan tolyq bosatý, al birqatar sala úshin – 10% mólsherindegi aralyq mólsherleme. Osylaısha, Úkimet usynyp otyrǵan mólsherlemelerdi saralaý: 16%, 10%, 0% jáne bosatý», — dep túsindirdi Azamat Ámrın.
Qazirgi ýaqytta agrarlyq sektorda sharýa qojalyqtary QQS tólemeıtini, al zańdy tulǵalar qolda bar jeńildikterge baılanysty búdjetke tóleýge tıisti salyqtardyń tek 30%-yn tóleıtini atap ótildi. Jańa tetikter boıynsha olardyń eshqaısysy QQS tólemeıtin bolady. Bul qazaqstandyq aýyl sharýashylyǵy ónimderin (kartop, qyzanaq, pıaz jáne basqalary) básekege qabiletti etýge múmkindik beredi. 10% mólsherleme qoldanylatyn salalardyń túrleri bıznespen áli de talqylanýda.
Sondaı-aq kezdesýde jeńildetilgen deklarasıa men bólshek salyq rejımin, onyń máni – kiris shegin jylyna 600 myń AEK (2 mlrd 359 mln teńge) mólsherinde saqtaı otyryp, qaıta qaraý boıynsha usynystar aıtyldy. Negizgi ózgeris – bul rejımdi tek B2C segmentinde (bólshek saýdada) júzege asyrý. Jumysshylar sany boıynsha shekteýdi alyp tastaý usynyldy. Kásipkerdiń satýdan túsken tabysy jylyna 100 mln teńgeden asatyn bolsa, salyq salynatyn tabysty eńbekaqy qory (eńbekaqy tóleý qory) somasyna azaıtý múmkindigi kózdelgen. Osylaısha, 100 mln teńge shegi jalaqyny aqtaýǵa yntalandyrýǵa múmkindik beredi. Bul rette bólshek salyqtyń 4% mólsherlemesi (máslıhattardyń 50%-ǵa tómendetý múmkindigimen) saqtalady.
Salyq reformasyn iske asyrý kezinde el búdjetine túsetin salyq túsimderi jyl saıyn 4-5 trln teńgege artady dep kútiledi. Bul qarajat Ulttyq qorǵa táýeldilikti azaıtýǵa; memlekettik qaryz deńgeıin tómendetý jáne ınvestısıalyq jobalardy nesıeleýge, damý ınstıtýttaryn nyǵaıtýǵa, turǵyn-úı komýnaldyq sharýashylyqty, jylý-energetıka júıesin jańǵyrtýǵa qosymsha resýrstardy baǵyttaýǵa kómektesedi.
