FOTO: TJM
Qazirgi ýaqytta Atyraý, Aqtóbe, Aqmola, Qostanaı, Soltústik Qazaqstan oblystarynda 3 444 jer úıdi, 336 aýla aýmaǵyn sý basyp qaldy. Bul týraly QR Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıseri Erasyl Saıpash OKQ baspasóz máslıhatynda aıtty.
Sý tasqyny bastalǵaly beri 96 myńnan astam adam qutqarylǵan.
«Sý shaıǵan 105 avtojol, onyń ishinde 8 kópir men 97 jol tósemi baqylaýda tur. Kólik qatynasynsyz qalǵan 69 eldi meken baqylaýǵa alyndy. Respýblıkalyq jáne jedel shtabtar jumysyn jalǵastyryp jatyr. Barlyq kúsh pen quraldar tótenshe jaǵdaılardyń aldyn alý men joıýǵa jumyldyryldy», - dedi Erasyl Saıpash.
Onyń aıtýynsha, tartylǵan áýe kemelerimen 2 823 adam, onyń ishinde 865 bala qutqaryldy. Ýaqytsha ornalasý pýnktterine 7 605 adam, onyń ishinde 3 474 bala ornalastyryldy. 82 559 aýyl sharýashylyq janýar qaýipsizdik jerge aıdaldy. Zardap shekken óńirlerge 167 935 kg gýmanıtarlyq kómek jetkizildi. Birlesken kúshtermen 8,5 mln astam tekshe metr erigen qar sýy soryldy. 2 750 turǵyn úı men 1 816 aýla aýmaǵynan sý buryldy.
Táýlik boıy avarıalyq-qutqarý jumystaryna 24 295 adam, 2 655 birlik tehnıka, 469 sý sorý tehnıkasy jáne 139 júzý quraly, 10 áýe kemesi jumyldyryldy. Respýblıkalyq jáne jedel shtabtar jumys isteıdi. TJM azamattardy sý tasqyny kezinde muqıat bolýǵa jáne qaýipsizdik sharalaryn qatań saqtaýǵa shaqyrady.