جەتىسۋ وبلىسىنىڭ «كوكتال» پوليگونىندا قازاقستاندىق دەسانتشىلار مەن ازەربايجان ارمياسى اسكەري قىزمەتشىلەرىنىڭ قاتىسۋىمەن «التىن قىران-2024» بىرلەسكەن تاكتيكالىق-ارنايى وقۋ-جاتتىعۋلارى جالعاسۋدا. بۇل تۋرالى Ulys قورعانىس مينيسترلىگىنە سىلتەمە جاساپ حابارلايدى.
بىرلەسكەن جاساقتاردىڭ كومانديرلەرى جاۋىنگەرلىك وكىم العان سوڭ باسشىلىق شتابىنا قابىلدانعان شەشىم تۋرالى بايانداپ، بارلاۋ تاپسىرمالارىن ورىنداۋعا كىرىستى. وقۋ-جاتتىعۋدىڭ ەكىنشى كۇنىندە ولار جاۋىنگەرلىك ۇيلەسىمدىلىكتىڭ جوعارى دەڭگەيىن كورسەتتى.
– ءبىرىنشى جاساقتى قازاقستاندىق وفيسەر، ەكىنشىسىن ازەربايجان وكىلى باسقارادى. ەكى ەل اسكەري قىزمەتشىلەرىنىڭ تاۋلى جەردە بارلاۋ جۇمىستارىن جۇرگىزۋ تاجىريبەسى بار. وسى جاتتىعۋلاردا ءبىز ءوز بىلگەنىمىزدى ءبولىسىپ، باۋىرلاس مەملەكەت اسكەري قىزمەتشىلەرىنىڭ تاجىريبەسىن قابىلداۋدى ماقسات ەتەمىز. بۇل وفيسەرلەر مەن سەرجانتتار ءبىر ساپتا يىق تىرەسىپ، ءبىر ۇستەلدە تاماقتانىپ، ءبىر جاۋىنگەرلىك تاپسىرمانى ورىنداعان كەزدە ءتيىمدى، – دەپ ءتۇسىندىردى وقۋ-جاتتىعۋ جەتەكشىسىنىڭ ورىنباسارى پولكوۆنيك اعزام بەردەنوۆ.
تاڭەرتەڭ ەرتە بارلاۋشىلار 25 شاقىرىمدىق باعدار جاسادى. وندا قارسىلاستىڭ لاگەرىنە شابۋىلداپ، اۆتوكولىك لەگىن تورۋىلداپ، تاۋدا جاسىرىنعان زاڭسىز قارۋلى قۇرىلىمنىڭ بازالىق لاگەرىن ىزدەستىرۋى كەرەك.
وتكىزىلەتىن وقۋ-جاتتىعۋلار بارلاۋ بولىمشەلەرى جەكە قۇرامىنىڭ پراكتيكالىق داعدىلارىنىڭ دەڭگەيىن ارتتىرۋعا، ماقسات انىقتالعان جانە ونى سايكەستەندىرگەن كەزدە بىرلەسكەن بارلاۋ ورگاندارىنىڭ ءىس-قيمىل الگوريتمىن سىناقتان وتكىزۋگە، سونداي-اق تاۋلى-شولەيىت جەرلەردە بۇركەمەلەۋ جانە باعدارلاۋ قۇرالدارىن قولدانۋ داعدىلارىن جەتىلدىرۋگە باعىتتالعان.
«التىن قىران-2024» حالىقارالىق تاكتيكالىق-ارنايى وقۋ-جاتتىعۋى 24 تامىزعا دەيىن جالعاسادى.