ءرامىز دەگەن بىلايعى كەزدە قاراپايىم ادامنىڭ ومىرىمەن تىكەلەي بايلانىسى جوق، سيمۆوليكالىق ماندەگى، ابستراكسياعا جاقىن دۇنيە سياقتى كورىنۋى مۇمكىن. ال شىن مانىندە مەملەكەتتىك رامىزدەردىڭ ءار ازاماتتىڭ ومىرىنە تىكەلەي اسەرى بار. شەتەلگە شىققاندا جەكە باستى كۋالاندىراتىن ءتولقۇجات مۇقاباسىنىڭ قانداي تۇسپەن بويالعانى، ونىڭ ىشىندەگى ەلتاڭبانىڭ بەدەرى ءسىزدىڭ حاقىڭىز قاي ەلدىڭ كونستيتۋسياسىمەن قورعالاتىنىنان حابار بەرىپ تۇرادى.
ەلىڭىزدىڭ اسكەري قۋاتى مەن ەكونوميكالىق الەۋەتى قانشالىقتى زور بولسا، ءسىز ۇستاپ جۇرگەن پاسپورتتىڭ جات ەلدەگى سالماعى دا سوعۇرلىم ەلەۋلى بولادى. مەملەكەتىڭىزدە ادام قۇقىقتارى بارىنشا مۇقيات قورعالىپ، ءسوز بوستاندىعى مەيلىنشە ساقتالسا، وتانىڭىزدىڭ عىلىم مەن تەحنولوگيا بايگەسىندەگى ءباسى قانشالىقتى جوعارى بولسا، مۇلىك پەن مەنشىك قۇقىعى قانشالىقتى قاتاڭ ساقتالسا، ءسىز ۆيزاسىز ساياحات قۇرىپ، تۋريست رەتىندە ەشبىر شەكتەۋسىز ارالاۋعا بولاتىن شەت ەلدەردىڭ سانى سوعۇرلىم كوپ بولادى.
ءبىز بۇدان ەلدىڭ بايراعى حالىقارالىق ارەنادا نەعۇرلىم بيىك تۇرعانى ونداعى ءار ازاماتتىڭ ءومىر ساپاسىنا تىكەلەي اسەر ەتەتىنىن كورەمىز. ياعني، مەملەكەت رامىزدەرىنىڭ بارىنشا بيىكتەن جەلبىرەۋىنە ءاربىر ازامات مۇددەلى. ەلدىڭ جالاۋىن جەلبىرەتۋ، ابىرويىن اسقاقتاتۋ دەگەن ۇعىمدار ادەتتە حالىقارالىق دەڭگەيدەگى سپورتتىق جارىستار مەن مادەني بايقاۋلارعا، عىلىم مەن تەحنولوگيا سالاسىنداعى سايىستارعا قاراتىپ ايتىلادى. ال نەگىزى ءار ازاماتتىڭ وزىنە جۇكتەلگەن شارۋانى شاشاۋىن شىعارماي تىندىرىپ، كاسىبي مىندەتىن مۇلتىكسىز ورىنداۋى، وتباسىنىڭ بەرەكەسىن ۇيىتىپ، اينالاسىنا پايدالى ارەكەت ەتۋى ەلدىڭ ىرگەتاسىن بەكىتىپ، تۇعىرىن بيىكتەتەدى. سوندىقتان رامىزگە دەگەن قۇرمەتتى مەملەكەتتىك تۋدىڭ جەردە جاتقان جالاۋشا ماكەتىن ءيىلىپ الۋ نەمەسە ءانۇران شىرقالعاندا تىك تۇرىپ قۇرمەت يشاراسىن جاساۋ عانا دەپ ءتۇسىنۋ تايازدىق بولار ەدى. رامىزگە دەگەن قۇرمەت – ءاربىر ىسىڭە جاۋاپكەرشىلىكپەن قاراۋ، ساپالى ءارى سانالى ادام سيپاتىنا ۇزدىكسىز ۇمتىلۋ.
بيىل تۋ، ەلتاڭبا، ءانۇران ۇشتىگىن بەكىتىپ، قازاقستان مەملەكەتتىلىگىنىڭ سيمۆولدارىن ايقىنداعانىمىزعا 32 جول تولىپ وتىر. سول 32 جىلدىڭ ىشىندە ەڭ كوپ وزگەرىسكە ۇشىراعان ءرامىز – ءانۇران.
1992 جىلدىڭ باسىندا ءانۇران نۇسقالارىنا بايقاۋ جاريالانىپ، 6 ايدىڭ ىشىندە 132 ولەڭ، ءانى مەن ءسوز دايىن 51 جوبا تۇسەدى. دەگەنمەن جوعارعى كەڭەس (قازىرگى ءماجىلىس پەن سەناتتىڭ باستاۋىندا تۇرعان ءبىر پالاتالى پارلامەنت) 1944 جىلدان بەرى قولدانىلىپ كەلە جاتقان مۇقان تولەبايەۆ، ەۆگەنيي برۋسيلوۆسكيي، لاتيف حاميدي ۇشتىگى جازدى دەلىنەتىن ءماتىندى تاڭدايدى. ال ول سازعا مۇزافار الىمبايەۆ، قادىر مىرزالييەۆ، تۇمانباي مولداعالييەۆ، جادىرا دارىبايەۆا بىرلەسىپ جازدى دەلىنەتىن ءماتىن بەكىتىلەدى.
بۇل ءانۇران 2006 جىلعا دەيىن قولدانىستا بولدى. ونىڭ ورنىنا ءشامشى قالداياقوۆ پەن جۇمەكەن ناجىمەدەنوۆتىڭ «مەنىڭ ەلىم» ءانى تاڭداپ الىندى. ج.ناجىمەدەنوۆ ماتىنىندەگى «ءدان ەگىپ تەرلەگەن
قازاعىم مىقتى عوي»، - دەگەن جولدار جاڭا ءانۇران ماتىنىندە:
«نامىسىن بەرمەگەن
قازاعىم مىقتى عوي» دەپ رەداكسيالاندى.
ال «مەنىڭ ەلىم، مەنىڭ جەرىم» دەپ كەلەتىن تارماق «مەنىڭ ەلىم، مەنىڭ ەلىم» دەپ وزگەرتىلدى. وسى وزگەرىستەردىڭ يەسى رەتىندە سول كەزدەگى پرەزيدەنت نۇرسۇلتان نازاربايەۆ جاڭا ءانۇران اۆتورلارىنىڭ ءبىرى بولىپ تىركەلدى.
قاڭتار وقيعاسىنان كەيىن ەل اراسىندا ءانۇران اۆتورلىعىنان ن.نازاربايەۆتىڭ ەسىمىن الىپ، ماتىنگە «مەنىڭ جەرىم» تىركەسىن قايتارۋ تۋرالى ۇسىنىستار ايتىلىپ ءجۇر.
تۋ مەن ەلتاڭبا ءانۇرانعا قاراعاندا ايتارلىقتاي وزگەرىسكە تۇسكەن جوق. تۋدىڭ جيەگىندەگى ورنەكتى، ەلتاڭباداعى «قازاقستان» جازۋىنىڭ لاتىنشا قارىپتەلۋىن ايتپاساق، باسقا وزگەرىس ەنگىزىلمەگەن.
حالىق ءانۇران ءماتىنى مەن اۆتورلىعىنا بايلانىستى ادىلەتتى قالپىنا كەلتىرەيىك دەپ جۇرگەندە ەلتاڭبانىڭ كەسكىنىن وزگەرتسەك دەگەن ۇسىنىستار جىلت ەتە قالدى. باستاما يەسى – «جاڭا ادامدار» دەيتىن جاستار قوزعالىسى. اقىرى ول ۇسىنىس پرەزيدەنت قاسىم-جومارت توقايەۆتىڭ الدىنا جەتەدى. اتىراۋدا وتكەن ۇلتتىق قۇرىلتايدا مەملەكەت باسشىسى ول ۇسىنىستىڭ قانشالىقتى ورىندى ەكەنىن قوعام تالقىلاپ شەشۋ كەرەكتىگىن، قاجەت دەپ تاپسا جاڭا نۇسقاعا كونكۋرس جاريالاۋعا بولاتىنىن ايتتى.
كەيىن وسى توڭىرەكتەگى اڭگىمەلەرگە مەملەكەتتىك كەڭەسشى ەرلان قارين Jibek Joly تەلەارناسىنا سۇحبات بەرىپ وتىرىپ نۇكتە قويدى.
«مەملەكەت باسشىسى ەلتاڭبانى مىندەتتى تۇردە اۋىستىرۋ كەرەك دەگەن پىكىر ايتقان جوق. وكىنىشكە وراي، كوپشىلىگى مالىمدەمەنى دۇرىس قارامايدى، وقىمايدى، تىڭدامايدى. شىن مانىسىندە، پرەزيدەنت ول جەردە قوعامدا كەيبىر ازاماتتىڭ ەلتاڭباعا قاتىستى ءارتۇرلى پىكىر ايتىپ جۇرگەنىن، ماسەلەگە قاتىستى ۇستانىم قالىپتاسسا، وندا اشىق تۇردە تالقىلاۋ» كەرەكتىگى تۋرالى پىكىر ايتتى»، - دەدى مەملەكەتتىك كەڭەسشى.
«جاڭا ادامدار» قوزعالىسىنىڭ ەلتاڭبانى اۋىستىرۋ تۋرالى ۇسىنىسىنا قوعامنىڭ ءبىر اۋىزدان قارسى تۇرۋى رامىزدەرگە دەگەن ىقىلاستىڭ نىعايىپ، تۇتاسقانىن كورسەتسە كەرەك. مەملەكەتتىلىك سيمۆولدارىنىڭ زاڭمەن عانا ەمەس، قوعام تالابىمەن قورعالۋىن مەملەكەتشىلدىك سانا قالىپتاسۋىنىڭ باستاۋى دەپ توپشىلاۋعا دا بولادى.
