اتىراۋ وبلىسى اكىمىنىڭ ورىنباسارى جاسۇلان بيسەمباي قۇلسارىدا بولىپ جاتقان احۋال وتە كۇردەلى ەكەنىن ايتتى.
ونىڭ ايتۋىنشا ورىنبور وبلىسىنداعى يريكلا سۋ قويماسىنان جايىققا جىبەرىلگەن سۋ قازاقستان اۋماعىندا باتىس قازاقستان وبلىسى ارقىلى اتىراۋعا وبلىستىڭ يندەر، ماحامبەت اۋداندارىنىڭ اۋماعىمەن اعىپ كەلەدى.
يندەر اۋدانى بويىنشا جاعا بەكىتۋ جۇمىستارىنا 54 ارنايى تەحنيكا، 408 قىزمەتكەر جۇمىلدىرىلعان. ءقازىر اۋداندا جايىق وزەنىنىڭ جاعالاۋىنداعى ءقاۋىپتى اۋماقتارعا جالپى ۇزىندىعى 10 كم بوگەت سوعىلدى. ول جۇمىستارعا 37950 دانا قاپشىق پايدالانىلدى. تاسقىنعا قارسى كۇرەس جۇمىستارى جالعاسۋدا.ماحامبەت اۋدانى بويىنشا ەلدى مەكەندەردىڭ سۋدان قورعانۋ بوگەتتەرىنىڭ جالپى ۇزىندىعى – 80 كيلومەتر. جايىق وزەنى بويىندا ورنالاسقان 17 ەلدى مەكەننىڭ ىشىندە 9 قورعانۋ بوگەتى وسال.
بۇدان بولەك جىلىوي اۋدانىندا توتەنشە جاعداي جاريالانىپ، تۇرعىنداردى ەۆاكۋاسيالاۋ جۇمىستارى جان-جاقتى جۇرگىزىلىپ جاتىر.
«قۇلسارى قالاسىنان 12 مىڭنان استام ادام ءقاۋىپسىز ورىنعا كوشىرىلدى. ەۆاكۋاسيالانعان ادامداردىڭ 5 مىڭى – بالالار. تۇرعىندار اتىراۋ قالاسىنا، جىلىوي اۋدانىندا ورنالاسقان «تەڭىز كەن ورنىنداعى ۆاحتالىق قالاشىققا جانە ماڭعىستاۋ وبلىسىنىڭ بەينەۋ اۋدانىنا ەۆاكۋاسيالاندى»، - دەپ حابارلادى وبلىستىق شتابتان.
بۇگىن پرەزيدەنت اتىراۋ وبلىسىنىڭ اكىمىمەن تەلەفون ارقىلى سويلەستى. وبلىس اكىمى سەرىك شاپكەنوۆپەن سويلەسۋ بارىسىندا پرەزيدەنت ەشقانداي وتباسى، بىردە ءبىر تۇرعىن مەملەكەتتىڭ نازارىنان تىس قالمايتىنىن مالىمدەدى جانە ولارعا ءوزىنىڭ جىلى لەبىزىن ءبىلدىرىپ، ءاردايىم قولدايتىنىن جەتكىزۋدى تاپسىردى.
پرەزيدەنت وبلىستاعى سۋ تاسقىنى جاعدايىن باقىلاۋدا ۇستاپ وتىر. سۋ باسۋ ءقاۋپىن سەيىلتۋ ءۇشىن بارلىق شارا قابىلدانىپ جاتىر جانە بۇل جۇمىستار ودان ءارى كۇشەيتىلەدى.
ۇكىمەت قارعىن سۋدان زارداپ شەككەن ازاماتتارعا كومەك كورسەتەدى، سونداي-اق ماتەريالدىق شىعىندار وتەلەدى.
فوتو ۆيدەودان الىنعان سكرين
