قاسيەتتى رامازاننىڭ بىرتىندەپ جاقسىلىق جاساۋ جارىسىنىڭ قىزاتىن ايىنا اينالارىنا سەنىم مول. بايىرعى ءدىنىمىز قايتا جاندانىپ، ەجەلگى مۇسىلمانداعىمىز ويانىپ كەلەدى.

اۋىز اشۋ مادەنيەتى دە جىل ساناپ قالىپتاسىپ، ءدىني ساۋاتىمىز دا تولىعىپ كەلەدى. كەشكە قاراي اۋىز اشاتىن اسحانا، كافە، رەستوران تابۋ قيىنداپ بارادى. سونىمەن قاتار، كوپتەگەن تاماقتانۋ ورىندارى، قوناق ۇيلەر مەن رەستورانداردىڭ رامازان ايى ءۇشىن ارنايى اس مازىرلەرىن جاساۋى دا قۋانتادى. ال ەندى قاسيەتتى اي سايىن وتكىزىلىپ كەلە جاتقان «Ramazan Challenge» قايىرىمدىلىق شاراسىنىڭ ءجونى تىپتەن بولەك. باستاپقىدا 300 ادامعا اۋىز اشتىرۋدان باستاعان بەلسەندى جاستار بىلتىر 3 مىڭ، بيىل 5 مىڭنان استام ادامعا اۋىز اشتىرماق. باسى-قاسىندا جۇرگەندەر  اسىپ-تاسىپ بارا جاتقان داۋلەتتى جاندار ەمەس، شاعىن كاسىپكەرلەر نەمەسە جالاقىمەن جان باعىپ جۇرگەن قاراپايىم ازاماتتار. ەڭ باستىسى ولاردىڭ نيەتتەرى كۇشتى. بۇرناعى كۇنى ولار قالام ۇستاعان قاۋىمعا— جۋرناليستەرگە اۋىز اشتىردى. بارىپ كورىپ، ءدام تاتتىق. باسى-قاسىندا جۇرگەن «Ramazan Challenge» ۇيىماستىرۋشىلارىنىڭ ءبىرى، كاسىپكەر ازامات اماندىق داۋلەتبەك ۇلىنىڭ ايتۋىنشا، كوبىنە ستۋدەنتتەرگە اۋىز اشتىرادى ەكەن. باستاپقى جىلدارداعى اۋىز اشارلارعا قاتىسقان ستۋدەنتتەردىڭ الدى بۇگىندە وقۋىن ءبىتىرىپ، جۇمىسقا تۇرعان. كوبى ءقازىر وسى قايىرىمدىلىق شاراسىنىڭ ءبىر شەتىنە شىعىسىپ ءجۇر. ەڭ باستى ەرەكشەلىگى — وزدەرى مۇلدە تانىمايتىن، كورمەگەن، بىلمەگەن  جاستاردى شاقىرىپ، اۋىز اشتىرادى. سوسىن تانىسادى، سۇحباتتاسادى، بىرتىندەپ باۋىرعا اينالادى. قاسيەتتى اي ارقىلى قازىرگى جات تۇگىلى جاقىنىڭ جاتسىنىپ بارا جاتقان قوعامدا ادامنىڭ بىرى-بىرىنە دەگەن مەيىرىمىن، باۋىرمالدىعىن وياتۋعا تاپتىرمايتىن ادەمى امال. يگىلىك پەن قايىرىمدىلىققا نەگىزدەلگەن «Ramazan Challenge» جوباسىنىڭ الداعى ۋاقىتتا تۇتاس ەلىمىزگە جايىلىپ، بارشانى مەيىرىمىنە بولەيتىنىنە سەنىم مول.