كەشە الماتىداعى Halyk IMAX Kinopark 16 كينوتەاترىندا "مالاي" اتتى جاڭا وتباسىلىق كومەديانىڭ اۋقىمدى پرەمەراسى ءوتتى. ءىس-شاراعا 800-دەن استام قوناق شاقىرىلدى، ولاردىڭ اراسىندا تانىمال كينوگەرلەر، بلوگەرلەر مەن جۋرناليستەر بولدى. قوناقتاردى ۇلتتىق كيىمدەگى قىزدار قارسى الىپ، زالدا حالىق اسپاپتار وركەسترى وينادى، ال ءفيلمنىڭ كورسەتىلىمى التى زالدا ۇيىمداستىرىلدى. قاتىسۋشىلار اتاپ وتكەندەي، بۇل قازاقستانداعى ەڭ ءىرى كينو تۇساۋكەسەرلەردىڭ ءبىرى بولدى.
الداعى ناۋرىز مەرەكەسىنىڭ باستى فيلمىنە اينالاتىن «مالاي» اتتى جاڭا وتباسىلىق كومەديا وتاندىق كينوتەاترلاردان 13 ناۋرىزدان باستاپ كورسەتىلەدى. بۇل «حولوپ» اتتى تابىستى حالىقارالىق فرانشيزانىڭ رەسمي اداپتاسياسى – 2019 جىلى شىققان العاشقى فيلم رەسەيلىك پروكاتتىڭ وزىندە 62 ميلليون دوللاردان استام پايدا تاپقان، ال تۋىندىنى بەيىمدەۋ قۇقىعى كوپتەگەن ەلدەرگە، سونىڭ ىشىندە فرانسيا، تۇركيا، مەكسيكا، ءۇندىستان جانە جاپونيا سەكىلدى ءىرى كينونارىقتارعا ساتىلعان.
ءفيلمنىڭ وتاندىق نۇسقاسىنىڭ رەجيسسەرى – «كەلىنجان»، «حوتيا بى ۆ كينودا 2» جانە «جەزدۋحا» سياقتى تابىستى حيتتەردى تۇسىرگەن ەرنار نۇرعالييەۆ. رەجيسسەردىڭ ايتۋىنشا - بۇل بۇكىل وتباسىمەن كورۋگە ارنالعان، جانعا جىلۋ سىيلايتىن كوڭىلدى حيكايا. وتاندىق “مالاي” قازاق تىلىندە ءتۇسىرىلىپ، فيلمدە جەرگىلىكتى مەنتاليتەت پەن ءازىل ەرەكشەلىكتەرى ەسكەرىلدى.
سيۋجەت چينا ەسىمدى باي بالاسى تۋرالى، ول دۇنيەدە بارلىق نارسەنى اكەسىنىڭ اقشاسىنا ساتىپ الۋعا بولاتىنىنا سەنىمدى. ءبىر ساتتە اكەسىنىڭ شىدامى تاۋسىلىپ، ول ۇلىن ەرەكشە ادىسپەن قايتا تاربيەلەۋگە شەشىم قابىلدايدى – وليگارح XIX عاسىرداعى قازاق اۋىلىن قايتا قۇراستىرتىن ارنايى ادامداردى جالداپ، چينانى سول جاققا جىبەرەدى. ول ەندى اۋقاتتى اكەنىڭ بالاسى ەمەس، جاڭا جاعدايدا كۇن كورۋگە ءماجبۇر بولعان قاراپايىم جىگىت بولىپ شىعا كەلەدى.
“الەمدىك كينودا ءساتتى تۋىندىلاردى نەگىزگە الىپ، ولاردىڭ اداپتاسياسىن ۇسىنۋ – كەڭ تارالعان ءارى تانىمال ءادىس. ءبىز دە وسى باعىتتى قولدانىپ، وزىمىزگە ۇلكەن تالاپ قويدىق. قازاقستان قوعامىندا ماجورلاردىڭ تاقىرىبى وتە وزەكتى، سول سەبەپتى “حولوپ” فرانشيزاسى بىزگە سايكەس كەلدى. بىزگە قازاق مەنتاليتەتىن، قۇندىلىقتارى مەن ءازىلىن ەسكەرە وتىرىپ، بەيىمدەۋ وتە ماڭىزدى بولدى. سونىمەن قاتار، “مالاي” – تولىقتاي قازاق تىلىندە تۇسىرىلگەن فيلم”، – دەپ اتاپ ءوتتى Unico كومپانياسىنىڭ باس پروديۋسەرى انارا جۋنۋسوۆا.
باستى رولدە Zheka Fatbelly دەگەن لاقاپ اتىمەن تانىمال بلوگەر جەڭىس وماروۆ وينايدى - ونىڭ Instagram جەلىسىندە 3،1 ميلليون وقىرمانى بار. بۇل ونىڭ كينوداعى العاشقى ۇلكەن ءرولى. جەڭىستىڭ ايتۋىنشا، ول ءتۇسىرىلىم كەزىندە قينالعان، ويتكەنى فيزيكالىق ساحنالار وتە كوپ بولعان - اسىرەسە، ات ۇستىندە وتىرۋ، اتپەن شابۋ دەگەن سەكىلدى. ءبىراق، قيىندىقتارعا قاراماستان، ول ءوز رولىندە ويناي ءبىلىپ، كەيىپكەرىن تۇسىنۋگە تىرىسقان.
«مەنىڭ كەيىپكەرىم - تويىنعان بايدىڭ بالاسى. ەشكىمدى تىڭدامايدى، ەشكىمنەن قورىقپايدى. كوپ جاماندىق جاسايدى جانە اكەسىنىڭ قۇدىرەتىمەن ءبارىن شەشەمىن دەپ ۇمىتتەنەدى. اسا جاعىمسىز كەيىپكەر، ءبىراق، سونىمەن بىرگە، ونىڭ ىشىندە ءبىر مۇڭ بار. ونىڭ ءوزىن وسىلاي كورسەتكەنى - ونى ەشكىم ەستىپ، كورمەگەن سوڭ، بۇل ونىڭ نارازىلىق ءبىلدىرۋى، بىلاي ايتقاندا پروتەستى»، - دەيدى جەڭىس وماروۆ.
فيلمدە، سونىمەن قاتار، ايدا قۇرمانعالييەۆا، دۋلىعا اقمولدا، لاۋرا مىرزاحمەت، ەرمەك شىنبولاتوۆ، ءسابينا موۆلايەۆا، جانداربەك سادىربايەۆ، حاميت ەردەحان سەكىلدى تانىمال جۇلدىزدار وينايدى.
ءفيلمدى «قازاقفيلم» كينوستۋدياسىمەن بىرلەسە وتىرىپ، Unico كومپانياسى شىعارعان. «مالاي» وتباسىلىق كومەدياسى 13 ناۋرىزدان باستاپ، ەلىمىزدىڭ بارلىق كينوتەاترلارىندا كورسەتىلەدى. فيلم تۋرالى بارلىق وزەكتى اقپارات @malay_film پاراقشاسىندا قولجەتىمدى.
