«100 جاڭا ەسىم» جوباسىنىڭ ءۇشىنشى ماۋسىمىنىڭ جەڭىمپازدارى انىقتالدى. «قازاقپارات» حالىقارالىق اگەنتتىگىنىڭ حابارلاۋىنشا، بيىل جوباعا قاتىسۋ ءۇشىن 1673 انكەتا قابىلدانىپ، قاتىسۋشىلارعا 700 مىڭنان اسا داۋىس بەرىلگەن. بارلىق كەزەڭنىڭ قورىتىندىسى بويىنشا 32 جەڭىمپاز انىقتالدى.
«قازاقستاننىڭ 100 جاڭا ەسىمى» جوباسىنا وراي ۇيىمداستىرىلعان سالتاناتتى جيىندا جەڭىمپازداردىڭ ءبىرى – ەلىمىزدەگى ەڭ جاس مەكتەپ ديرەكتورى شاكارىم سەيسەمباي ءسوز باستادى. ول - ەلىمىزدەگى ەڭ جاس مەكتەپ ديرەكتورى. «ءبىزدىڭ مەكتەبىمىزدە 213 قىزمەتكەر، 2700 وقۋشى بار. ۇستازدىق قىزمەتتەگى ماقساتىم – مەملەكەتىمىزدىڭ ءبىلىم سالاسىن برەندكە اينالدىرىپ، مارتەبەسىن ارتتىرۋ. قازىرگى تاڭدا وكىنىشكە قاراي، جاستاردىڭ ىشىندە، ءبىلىمدى ازاماتتاردىڭ اراسىندا مەكتەپكە بارىپ، ۇستاز بولىپ ءبىلىم بەرۋ – ۇردىسكە اينالماعان. ال ءبىزدىڭ نەگىزگى بايلىعىمىز – جەر استىنداعى التىن ەمەس، حالقىمىزدىڭ ۇشان-تەڭىز ءبىلىمى. سول سەبەپتەن، بىزگە مىقتى ۇستازدار كەرەك. سەبەبى، حاننىڭ دا، قارانىڭ دا ومىرلىك ۇستازدارى بولعان»، - دەدى ول. ەلورداداعى №54ء-شى مەكتەپتىڭ ديرەكتورى شاكارىم سەيسەمباي ماعجان جۇمابايەۆتىڭ «التى الاشتىڭ باسى قوسىلسا – توردەگى ورىن ۇستازدىكى» دەگەن ءسوزىن ەسكە سالدى. «ءبىزدىڭ مەكتەپتەرگە بەلگىلى ءبىر بالانس كەرەك. ياعني، ەر مۇعالىمدەردىڭ سانىن ارتتىرۋ كەرەك. مەكتەپ – وتباسى سەكىلدى. جانۇيادا اكەدەن، انادان تاربيە كورگەن بالا جامان بولمايدى. سوندىقتان، ەر ازاماتتاردى مەكتەپكە قىزمەتكە شاقىرامىن. وسى بىرەگەي جوبا اياسىندا جاستارعا وي سالىپ، ۇستازدىق مارتەبەسىن ارتتىرامىن دەگەن ءۇمىتىم بار»، - دەدى ول.
قازاقستان رەسپۋبليكاسىنىڭ قارۋلى كۇشتەرىنىڭ وفيسەرى، مەديسينا قىزمەتىنىڭ پودپولكۆونيگى ساۋلەت قالداشوۆ تا «قازاقستاننىڭ 100 جاڭا ەسىمى» جوباسىنىڭ ءۇشىنشى كەزەڭىنىڭ جەڭىمپازى اتاندى. وفيسەر جاقىندا عانا ليۆانداعى بىتىمگەرشىلىك ميسسيادان ورالعان. ساۋلەت قالداشوۆ 2002 جىلدان بەرى اسكەري مەديسينا سالاسىندا قىزمەت ەتەدى. كوپبالالى وتباسىنىڭ وتاعاسى. «مەن بۇۇ ميسسياسىنا ەلىمىزدىڭ تاريحىندا العاشقى بولىپ قاتىسۋشى اسكەري دارىگەرمىن. ءبىز سەرجانتتار مەن وفيسەرلەردەن، اسكەري دارىگەرلەردەن قۇرالعان 120 ادام – قازاق روتاسى جاقىندا عانا ليۆانداعى بىتىمگەرشىلىك ميسسيادان ءساتتى ورالدىق. ميسسيا باسشىلىعى تاراپىنان قىزمەتىمىزدىڭ ناتيجەسىندە جوعارعى ناتيجەدەگى شەبەر جانە باسقالارعا ۇلگى تۇتارلىق قازاق جاۋىنگەرى دەگەن ءىلتيپاتقا يە بولدىق»، - دەدى ول. ساۋلەت قالداشوۆتىڭ ايتۋىنشا، اسكەري دارىگەرلەر ۇرىس دالاسىندا موينىنا قارۋ اسىنىپ، قاراپايىم مەديسينالىق سومكەمەن ساربازداردىڭ جانىندا جۇرەدى. «ميسسياداعى ءبىر جىل ىشىندە جەرگىلىكتى ليۆان حالقىنا، شەتەلدىك اسكەريلەرگە العاشقى مەديسينالىق كومەك كورسەتتىك. مەديسينالىق ەۆاكۋاسيانى ۇيىمداستىردىق. ءبىر سوزبەن ايتقاندا، جەرگىلىكتى حالىقتىڭ جەدەل جاردەمى بولا بىلدىك. مەن كورگەن ليۆان جەتپىسىنشى جىلداردىڭ اياعىنا دەيىن گۇلدەنگەن ەل بولسا، ءقازىر دىندەر مەن كونفەسسيالاردىڭ ارازدىعىنان حالقى جىك-جىككە ءبولىنىپ، كورشى مەملەكەتتەرمەن قارىم-قاتىناسىن ورناتا الماي، بەرەكەسى قاشقان ەل. دارىگەر رەتىندە بىلەتىنىم: سوعىس زاردابىنان العان پسيحولوگيالىق جاراقات حالىقتىڭ ساناسىنان كەتپەيتىنى راس. وسىنىڭ ءبارىن كورىپ، تۇيگەنىم: ءبىزدىڭ قازاقستاننىڭ باستى بايلىعى - بەيبىتشىلىك پەن تاتۋلىق ەكەن»، - دەدى ول.
سونىمەن قاتار، بيىلعى «100 جاڭا ەسىمگە»: رەسەيدە 48 ادامدى ورتتەن قۇتقارعان سەمەي تۇرعىنى ەرجان امارحانوۆ تا ەندى. وتكەن جىلدىڭ تامىز ايىندا تىركەلگەن وقشاۋ وقيعانى سول تۇستا قازاقستاندىق جانە رەسەيلىك ب ا ق وكىلدەرى مەن الەۋمەتتىك جەلى قولدانۋشىلارى جارىسا جازعان ەدى. 28 جاستاعى ەرجان كولىك ساتىپ الۋ ءۇشىن «سەمەي - ءنوۆوسىبىر» باعىتىنداعى اۆتوبۋسپەن جولعا شىققان. ءبىراق تۇنگى ساعات ۇشكە تاياۋ الەيسك قالاسىنىڭ تۇسىندا اۆتوبۋستان ءورت شىققان. بۇل ۋاقىتتا جولاۋشىلاردىڭ بارلىعى تىنىش ۇيقىدا جاتقان ەكەن. ءورت تۇتانعانىن تەك ەرجان عانا بايقاپتى. ول بىردەن جۇرگىزۋشىگە اۆتوبۋستا ءورت شىققانىن حابارلاپ، كولىكتى توقتاتقانشا جولاۋشىلاردىڭ ءبىرازى تۇتىنگە ۋلانىپ ۇلگەرگەن. ەرجان وسىلايشا، اشىلماعان ەسىكتى تەۋىپ اشىپ، ساناۋلى سەكۋند ىشىندە بالادان قارتتارعا دەيىن ءبارىن سىرتقا الىپ شىققان. اۆتوبۋس تولىعىمەن جانىپ كەتكەن. «ءقازىر ويلانىپ وتىرسام، بالا كەزدەن سپورتپەن اينالىسقانىمنىڭ ارقاسىندا سول تۇستا ادامداردى قۇتقارا الدىم دەپ ويلايمىن. باپكەرلەرىمىز ادامدارعا كومەكتەسىڭدەر، مۇقتاجعا قول ۇشىن سوزىڭدار دەپ ۇيرەتتى. سپورتتىڭ ارقاسىندا امان قالدىق»، - دەيدى ەرجان امارحانوۆ
ال تاعى ءبىر جەڭىمپاز «قازاقستاننىڭ اۋىر اتلەتيكاسىنىڭ ءۇمىتى» اتانعان جاتتىقتىرۋشى يۆان سنەگۋروۆ شاكىرتتەرىمەن بىرگە تاباندى ەڭبەك ەتىپ، كەلەشەكتە ەل ابىرويىن اسقاقتاتۋعا ۋادە بەردى. قاراعاندىلىق يۆان سنەگۋروۆ «مەنىڭ اتام مەن اكەم – اۋىر اتلەتيكادان باپكەر بولعان كىسىلەر. مىنە، سوندىقتان اكە جولىن جالعاستىرۋ كەرەك دەپ ۇيعاردىم. 28 جاسىمدا قازاقستان رەسپۋبليكاسىنىڭ ەڭبەك سىڭىرگەن باپكەرى اتاندىم. قازىرگى تاڭدا مەنىڭ شاكىرتتەرىمنىڭ ىشىنەن الەم جانە ازيا چەمپيوندارى، رەسپۋبليكالىق دەڭگەيدەگى رەكوردسمەندەر دە شىقتى. تاباندى تۇردە ەڭبەكتى جالعاستىرىپ، ستارتقا دايىندالا بەرەمىز. الايدا ءقازىردىڭ وزىندە 2024 جىلى اماندىق بولسا، قازاقستانعا وليمپيادانىڭ التىن مەدالىن الىپ كەلەمىز»، - دەدى ەلوردادا «قازاقستاننىڭ 100 جاڭا ەسىمى» جوباسىنىڭ ءۇشىنشى كەزەڭىنە وراي وتكىزىلگەن جيىندا.
«قازاقستاننىڭ جاڭا ەسىمدەرى» جوباسىنىڭ ماقساتى - تاۋەلسىزدىك جىلدارى قازاقستاننىڭ دامۋىنا ەلەۋلى ۇلەس قوسقان ادامداردىڭ تاريحى مىسالىندا تابىستىلىق، باسەكەگە قابىلەتتىلىك، پراگماتيزم جانە بىلىمگە تابىنۋ يدەيالارىن ىلگەرىلەتۋ. «قازاقستاننىڭ 100 جاڭا ەسىمى» جوباسىنا 1 673 ءوتىنىم كەلىپ تۇسكەن. «قازاقستاندىق جاس كاسىپكەرلەر اراسىنان – 129 ادام، اق حالاتتى ابزال جاستاردان – 106 ادام، مادەنيەت جاستارىنان – 373 ادام، قوعام بەلسەندىلەرىنەن – 307 ادام، سالاۋاتتى ءومىر سالتىن ۇستاناتىن – 411 ادام، ءعىلىم-بىلىم جولىندا ەڭبەك ەتىپ جۇرگەن – 336 ادام، جانە ت.ب. قازاقستاندىق جاستىڭ جانە جۇڭگو مەن رەسەيدەگى قازاق جاستارىنىڭ ءوتىنىمى قابىلدانعان ەكەن.
سۋرەتتەر inform.kz سايتىنان الىندى.
