Búgin Qazaqstan Respýblıkasynyń Premer-Mınıstri Oljas Bektenovtiń tóraǵalyǵymen Zańsyz ıemdenilgen aktıvterdi memleketke qaıtarý jónindegi komısıanyń kezekti otyrysy ótti, dep habarlaıdy Úkimettiń baspasóz qyzmeti.
Komısıa jalpy kólemi 40 mlrd teńgeden astam somaǵa zańsyz ıemdenilgen aktıvterdi memleketke erikti túrde qaıtarý jónindegi kelisimderdi maquldady, onyń 38 mlrd teńgeden astamy – aqshalaı qarajat, sondaı-aq Astanadaǵy quny 2 mlrd teńge turatyn bıznes-ortalyq bar. Qaıtarylǵan qarajat áleýmettik maqsattarǵa, onyń ishinde sý tasqyny saldaryn joıýǵa baǵyttalady.
Buǵan qosa 7 mlrd teńge somasyna ınvestısıalyq kelisimderge qol qoıý maquldandy, onyń aıasynda «Zańsyz ıemdenilgen aktıvterdi memleketke qaıtarý týraly» QR Zańy qoldanylatyn tulǵalar Astana jáne Shymkent qalalarynda eki ınfraqurylym nysanyn salady. Atalǵan jobalardy iske asyrý jumys oryndaryn qurýǵa múmkindik beredi jáne qosymsha salyq túsimderin qamtamasyz etedi.
«Aktıvterdi qaıtarý jumystary – bul Memleket basshysynyń áleýmettik ádilettilikti qalpyna keltirý jónindegi saıasatynyń tikeleı iske asyrylýy. Barlyq qaıtarylǵan qarajat Qazaqstan halqynyń ıgiligine jumsalady», - dep atap ótti Oljas Bektenov.
