Ystanbulda Qazaqstan Táýelsizdiginiń 30 jyldyǵyna arnalǵan estelik monetanyń tusaýkeseri ótti

Túrkıa

16 qyrkúıek 2021

Ystanbulda Qazaqstan Táýelsizdiginiń 30 jyldyǵyna arnalǵan estelik monetanyń tusaýkeseri ótti

Ystanbulda Qazaqstan Táýelsizdiginiń 30 jyldyǵyna arnalǵan estelik monetanyń tusaýkeseri ótti. Bul týraly Qazaqstannyń Túrkıadaǵy Elshiligi habarlady.

İs-sharaǵa Qazaqstannyń Túrkıadaǵy Elshisi Abzal Saparbekuly, Qazaqstannyń Ystanbuldaǵy Bas konsýly Álim Baıel, Túrkıa Teńge saraıynyń dırektory Abdýllah Iasır Shahın, zıaly qaýym ókilderi men jýrnalıser qatysty.

Kúmisten soǵylǵan monetanyń dızaınyn Teńge saraıymen birlesip ázirlegendikterin aıtqan Bas konsýl Álim Baıel onda elimizdiń tereń tarıhy men Túrki áleminiń qara shańyraǵy retindegi rolin aıqyndaǵandyqtaryn aıtty.

Elshi Abzal Saparbekuly monetanyń baýyrlas Túrkıanyń qasterli Táýelsizdigimizdiń mereıli toıyna jasaǵan erekshe syıy retinde túrik eliniń Qazaqstanǵa degen ystyq yqylasynyń belgisi ekendigin málimdedi.

Óz kezeginde, Abdýllah Iasır Shahın ózi basqaryp otyrǵan Túrkıa Respýblıkasy Teńge saraıynyń 1467 jyldan bastaý alatynyn aıta kele, Qazaqstan Táýelsizdiginiń 30 jyldyǵyna osyndaı tartý jasaýdyń ózderi úshin úlken qýanysh ekendigin jetkizdi. Monetanyń bet jaǵynda Qazaqstannyń memlekettik týy men túrikshe «Qazaqstan táýelsizdiginiń 30 jyldyǵy» jazýy oryn alǵan. Syrt jaǵynyń ortasynda Qazaqstannyń kartasy beınelengen. Kartanyń ishinde latyn áripterimen qazaqsha «Qazaqstan» dep jazylǵan.

Sondaı-aq, kartada qazaq jerindegi birqatar tarıhı memleketterdiń ataýlary túrikshe jazylǵan. Atap aıtqanda, olar: saqtar, ǵundar, Túrik qaǵandyǵy, Altyn Orda men Qazaq handyǵy. Reverstiń ústingi jaǵynda Orhon-Enıseı eskertkishterindegideı kóne túrki jazýymen «Túrik» dep jazylǵan.

Astynǵy jaǵynda qoshqarmúıiz oıýy beınelengen. 31 gram kúmisten quıylǵan jáne quny áldeqaıda joǵary monetanyń nomınaldy baǵasy 30 túrik lırasy. Á. Baıel ádette mundaı monetalardyń 20 lıralyq nomınalǵa ıe bolatynyn, alaıda túrik tarapynyń Táýelsizdiktiń 30 jyldyǵyna oraı Qazaqstan úshin bul erejeni ózgertkendigin aıtty.

Estelik moneta Túrkıa Teńge saraıynyń resmı saıtynda satylymǵa shyǵady. A. Saparbekuly men Á. Baıel shekteýli sanmen shyqqan monetanyń otandyq, túrik jáne álemdik kolleksıonerlerdiń úlken qyzyǵýshylyǵyna ıe bolatynyna degen senimderin bildirdi.

RELATED NEWS

Túrkıa

15 mamyr 2024

Túrkıada taǵy memlekettik tóńkeris bolýy múmkin ekeni aıtylýda

Túrkıada memlekettik tóńkeris bolýy múmkin. Osyǵan baılanysty el prezıdenti Rejep Taıyp Erdoǵan Túrkıanyń barlaý jáne Ádilet mınıstrliginiń basshylarymen shuǵyl otyrys ótkizdi, dep habarlaıdy Ulys túrkıalyq basylymdarǵa silteme jasap.

Túrik ultshyldarynyń jetekshisi Devlet Bahchelı2016 jyldyń shildesinde eldi dúrliktirgen memlekettik tóńkeris qaıtalanýy múmkin ekenin eskertti.

Bir kún buryn Ankara Bas prokýratýrasy "Aıhan Bora Kaplan" qylmystyq uıymyna qatysy bar degen kúdikpen úsh polıseıge qatysty tergeý bastady. Olardyń úılerinde tintý júrgizildi.

Türkiye gazeti óz kezeginde "Aıhan Bora Kaplan" uıymymen baılanysta boldy dep aıyptalǵan Ankara qaýipsizdik basqarmasynda birqatar polısıa qyzmetkerleriniń jumystan shyǵarylýyna baılanysty Túrkıada úlken qarsylyq kórsetilgenin jazady. Olardyń úılerinde sıfrlyq materıaldardy alý maqsatynda tintý júrgizildi.

"Prezıdent Erdoǵan Ádilet mınıstri Iylmaz Týndjmen jáne Ulttyq barlaý uıymynyń basshysy Ibragım Kalynmen Bahchelıdiń málimdemesinen keıin Memleket basshysynyń rezıdensıasynda shuǵyl túngi otyrys ótkizdi", — dep jazady Türkiye.

Erdoǵan el Parlamentinde sóz sóıleıdi dep kútilýde.

Túrkıa

10 naýryz 2025

AQSH Túrkıaǵa qarsy zań qabyldamaq

AQSH-tyń Ókilder palatasy Túrkıanyń demokratıalyq statýsyn qaıta qaraýǵa jáne ony Eýropanyń emes, Taıaý Shyǵystyń eli dep tanýǵa baǵyttalǵan arnaıy zań jobasyn qaraýǵa aldy. Bul týraly Fox News habarlady.

Zań Túrkıany Eýropa men Eýrazıa isteri jónindegi búrosynyń quzyrynan alyp tastap, ony Taıaý Shyǵys isteri jónindegi búroǵa aýystyrýdy qarastyrady.

Fox News habarlaýynsha, mundaǵy maqsat "AQSH-tyń jaýy sanalatyn eldermen baılanys jasaıtyn Túrkıany tosqaýyldap ustaýǵa talaptaný". Vashıngton Ankarany "AQSH pen NATO odaqtastarynan alystap bara jatqan memleket" dep esepteıdi.

"Bul Úkimet HAMAS sodyrlaryn jasyryp otyr. Ekonomıkalyq odaqtastyq arqyly Pýtınniń áskerı mashınasyna qoldaý kórsetedi. Sonymen birge, Batys odaqtasynan artyqshylyq talap etýin jalǵastyra otyryp, NATO-nyń birligine kedergi keltiredi. Amerıkalyq dıplomatıa kózboıaýshylyq jasaýyn doǵaryp, Túrkıany burynǵydaı Eýropanyń bir bóligi dep sanaýyn qoıýy kerek", – dedi jobany Kongres qaraýyna engizgen topty basqaratyn kongresmen Bred Shnaıder.

Bul ustanymǵa Túrkıa Úkimeti narazylyǵyn bildirdi jáne túriktiń syrtqy saıasaty men eýropalyq baǵdaryn Kongres músheleriniń durys túsinbeı otyrǵanyna nusqady.

Aıta ketsek, Túrkıa – NATO-nyń AQSH-tan keıingi eń qýatty múshesi.

Túrkıa

24 qazan 2024

Túrkıada terakt bolyp, 5 adam kóz jumdy

Keshe keshkisin Túrkıa Ankaradaǵy TUSAŞ aeroǵarysh kompanıasy shtab-páteriniń mańynda qatty jarylys bolǵan. Bul týraly Anadoly agenttigi habarlady.

Túrkıa İİM jarylystan qaza tapqandar men jaralanǵandar baryn aıtady. Al el bıligi oqıǵany "terakt" dep atady.

Túrkıanyń ishki ister mınıstri Alı Ierlıkaıa habarlaýynsha, terakt saldarynan 5 adam qaza taýyp, taǵy 22 adam jaraqat alǵany aıtylǵan.

Shabýyldy jasaǵan eki lańkes óltirildi. Lańkesterdiń biri áıel.

Jańalyqtar

24 maýsym 2025