QR Prezıdenti Qasym-Jomart Toqaev ustazdar qaýymyn quttyqtaý barysynda elimizde bilim salasyndaǵy úzdik mamandardy, ıaǵnı naǵyz kóshbasshylardy irikteý jobasy júzege asyrylyp jatqanyn aıtty. Bul týraly Aqorda habarlaıdy.
Qazirdiń ózinde atalǵan jobaǵa qatysqan 134 pedagog mektep dırektory bolyp taǵaıyndalǵan. Budan bólek, Prezıdent bilim sapasyn arttyrý, balalardy úılesimdi jáne jan-jaqty damytý úshin memleket tarapynan qolǵa alynǵan júıeli sharalarǵa nazar aýdardy.
– «Jaıly mektep» ulttyq jobasy aıasynda kelesi jyly 460 myńnan astam balaǵa arnalǵan 217 jańa mektep salý josparlanǵan. Olar zamanaýı talaptarǵa saı jabdyqtalǵan ozyq bilim oshaǵy bolady. Mektepterde erekshe qajettilikteri bar balalardyń kedergisiz bilim alýyna qolaıly jaǵdaı jasalady. Atalǵan aýqymdy joba úsh aýysymdy mektepter máselesin sheshýge, qala men aýyl mektepterindegi bilim alshaqtyǵyn azaıtýǵa múmkindik beredi. Budan bólek, elimizde jyl saıyn keminde myń mekteptiń ǵımaratyna jańǵyrtý jumystary júrgiziledi. Bilim berý prosesin sıfrlandyrýǵa basa nazar aýdarylady. Barlyq mektepti jyldamdyǵy joǵary ınternetke qosý boıynsha keshendi jumys qolǵa alynady. Qosymsha bilim berýge erekshe mán beriledi. Onyń aıasynda úsh mıllıonnan asa adamdy qamtý josparlanyp otyr. Bıyl otandyq mektepterdiń oqýshylary halyqaralyq olımpıadalardan 360-tan astam medal jeńip aldy. Bul – ustazdarymyzdyń jankeshti eńbegi men kásibıliginiń jemisi, – dedi Memleket basshysy.
Prezıdent ulaǵatty ustazdar tutas ultty tárbıeleıtinin atap ótip, jastardyń boıyna adal azamatqa tán qasıetterdi sińirý óte mańyzdy ekenin jetkizdi.
– Oqýshylardy bilimpazdyqqa, otanshyldyqqa, eńbekqorlyqqa baýlý qajet. Árıne, qazirgi zamanda bul ońaı sharýa emes. Sońǵy kezde ınternettiń teris baǵyttaǵy shyrmaýyna túsken jastar kóbeıip ketti. Biz balalardy túrli qaterden qorǵaı bilýimiz kerek. Osyǵan baılanysty naqty sharalar qabyldanyp jatyr. Meniń tapsyrmammen «Birtutas tárbıe» atty arnaıy baǵdarlama daıyndaldy. Bul qujatta Ulttyq quryltaıda aıtylǵan usynys-pikirler eskerildi. Mektepterde ata-analardy pedagogıkalyq qoldaý ortalyqtary ashyldy, – dedi Memleket basshysy.
Qasym-Jomart Toqaev sanaly urpaq tárbıeleý isine ustazdarmen birge ata-analar da atsalysýy qajet dep sanaıdy. Bul oraıda, Prezıdent muǵalimderdiń pandemıa, sý tasqyny kezinde oqý úderisin toqtatpaı, mindetin adal atqaryp, elge janashyrlyq tanytqanyn mysal etti.
– Muǵalimniń mártebesi qashanda bárinen bıik. Uly tulǵalardyń ózi ustazynyń aldynda shákirt bolyp qala beredi. Bir sózben aıtsaq, barsha jetistiktiń bastaýynda ustaz tur. Ulttyń bolashaǵy – ustazdyń qolynda. Meniń maqsatym – ustazdy qoǵamymyzdyń basty keıipkeri retinde dáripteý. Sebebi sizder bala oqytý arqyly keleshektiń kirpishin qalaısyzdar. Qazaqstannyń damyǵan el bolýyna zor úles qosyp júrsizder. Sizderdiń tabandy eńbekterińiz erekshe qurmet pen joǵary marapatqa laıyq, – dedi Prezıdent.
Memleket basshysy Qazaqstannyń túkpir-túkpirinde eńbegi eren muǵalimder jetkilikti ekenin atap ótip, aldaǵy ýaqytta olar da nazardan tys qalmaıtynyn aıtty.
– Ustazdar áýletine aıryqsha mán beriledi. Búgin men bilim berý isinde 350 jyl eńbek ótili bar Asylaevtar otbasy týraly maqalany oqydym. Olar Abaı oblysynda turady eken. Mundaı ónegeli áýletter elimizde kóp dep oılaımyn, – dedi Qasym-Jomart Toqaev.