Premer-mınıstrdiń orynbasary – Ulttyq ekonomıka mınıstri Serik Jumanǵarın Májilis depýtattarynyń saýalyna joldaǵan jaýapta Reseı tarapy Qazaqstanǵa Eýropadan tranzıtteletin taýarlardyń nege keshigip jatqanyn túsindirdi.
- Reseılik keden qyzmetteriniń qazaqstandyq tasymaldaýshylardy ustaýy Reseı Federasıasy Úkimetiniń 2022 jylǵy 9 naýryzdaǵy № 313 qaýlysynyń 2024 jylǵy 15 qazandaǵy túzetýleriniń qoldanylýyna baılanysty júrgiziledi. Buǵan deıin tizbege sáıkes jekelegen taýar túrlerin elderge (EO elderi jáne t.b.) áketýge tyıym salý qosymsha taýarlarǵa taratylǵan. Atalǵan ózgerister birqatar taýarlardy (ushqyshsyz ushý apparattary, áskerı kıim, elektr generatorlary, akýmýlátorlar jáne t.b.) Reseı aýmaǵynan belgili bir memleketter men aýmaqtarǵa (Eýropa, AQSH, Ýkraına jáne t. b.) áketýge qosymsha shekteýler engizedi. Bul rette Reseı tarapy osy túzetýler engizilgenge deıin qazaqstandyq tarapty habardar etpeı, osy shekteýlerdi birjaqty tártippen engizdi, - dep jazady vıse-premer.
Shekteý saldarynan Qytaıdan Eýropalyq Odaq elderine Qazaqstan men Reseı Federasıasynyń aýmaqtary arqyly tranzıtpen ótetin 20 kólik shekarada qańtarylǵan.
- Bul taýarlar ótken jyldyń qazan aıynda áketýge tyıym salynǵan taýarlar tizimine qosyldy. Aıta ketý kerek, Reseı Federasıasynyń aýmaǵynan taýarlardy áketýge salynǵan tyıymdar men shekteýlerdi saqtamaý Reseı zańnamasyna sáıkes 50 myńnan 300 myń rúblge deıin ákimshilik aıyppul túrinde, taýarlardy tárkileýmen nemese onsyz ákimshilik jaýapkershilikke ákep soǵady. Osy jaǵdaıdy sheshý úshin Qazaqstannyń Saýda jáne ıntegrasıa, Syrtqy ister mınıstrlikteri Reseı Federasıasynyń ýákiletti organdarymen kelissózder júrgizýde. Saýda jáne ıntegrasıa mınıstrligi Reseı Federasıasynyń Ekonomıkalyq damý mınıstrligine atalǵan kólik quraldaryn mejeli jerge shyǵarý nemese olardy Qazaqstanǵa qaıtarý máselelerin sheshý týraly hat joldady. EAEO kedendik aýmaǵynan ketken kezde ustalǵan taýarlar deklarantqa nemese ózge de tulǵalarǵa qaıtarylady, - dep jazylǵan jaýapta.
