Memleket basshysy Reseı hokeı federasıasynyń prezıdenti Vladıslav Tretákty qabyldady, dep habarlaıdy Aqorda.
Kezdesýde TMD elderinde hokeıdi damytý máseleleri talqylandy.
Prezıdent Qasym-Jomart Toqaev sońǵy jyldary Qazaqstanda hokeı sportynyń aýqymy aıtarlyqtaı keńeıgenin atap ótti. Memleket basshysynyń pikirinshe, elordalyq «Barys» klýby bastaǵan otandyq komandalardyń QHL chempıonatyna jáne basqa da týrnırlerge qatysýy, sondaı-aq ulttyq quramanyń álemdik birinshilikterde tabysty óner kórsetýi atalǵan sport túrin keńinen dáripteýge oń yqpal etedi. Atap aıtqanda, Qazaqstanda hokeı mektepteri men jastar komandalary kóbeıip, túrli deńgeıdegi jarystar belsendi uıymdastyryla bastady.
Óz kezeginde Vladıslav Treták qonaqjaılyq tanytqany jáne Astanada ótip jatqan «Qazaqstan Hockey Open 2024» halyqaralyq týrnıriniń joǵary deńgeıde uıymdastyrylǵany úshin rızashylyǵyn bildirdi. Sondaı-aq ol Qazaqstan hokeıiniń ókilderi edáýir tabysqa jetkenine nazar aýdaryp, mundaı jetistik sporttyń komandalyq túrlerine memleket tarapynan laıyqty deńgeıde mán berilýiniń nátıjesi ekenin aıtty.
