Bıyl Qazaqstannyń basym óńirlerinde bolǵan kóktemgi sý tasqyny qazaqstandyqtarǵa aýyr tıdi. Eldiń soltústigi men batys aımaqtary qatty zardap shekti, myńdaǵan úıler qırap, mal basy qyrylyp, júzdegen myń adamdar bas saýǵalap, qaýipsiz jerge ýaqytsha kóshýge májbúr boldy. Ol týraly talaı aıtyldy, jazyldy. El bolyp qıyn kúnderde bir-birimizge qoldaý kórsetip, aıtyp kelmeıtin tabıǵat apatyn eńserdik.
Sý tasqyny kezinde qazaqstandyqtar bir jaǵadan bas, bir jeńnen qol shyǵaryp, óziniń birlikti el ekenin kórsetti. Eńbektegen baladan, eńkeıgengen qarıaǵa deıin apatpen kúresti. Mysal retinde aıtsaq, Atyraý oblysy Mahambet aýdany, Beıbarys aýylynyń 92 jastaǵy turǵyny Orynsha Qojıeva jaǵany bekitýge keldi. 90-nan asqan qarıanyń «erligi» kópshilikke úlgi boldy. Orynsha apa tasqyn qaýpi tóngende qol qýsyryp otyra almaǵan.
«Men biraz jasqa kelip qaldym. Sondyqtan, meniń qolymnan keletini qum toltyrýǵa qapshyqtardy jedel daıyndap otyrý. Tabıǵattyń tosyn minezin boljap bilý múmkin emes, osy jasyma deıin mundaıdyń talaıyn kórdik qoı. Sondyqtan, sý tasqynyna aldyn - ala daıyndalý kerek»,-degen edi keıýana.
Qıyn sátte kómekke kelgenderdiń arasynda eresekterden bólek mektep oqýshylary da óz úlesterin qosty. Oqýshylar sabaqtan keıin, Jaıyq ózenin bekitýge qolushyn sozdy.
Kentaý qalasynda turatyn Gaýhar Shaımerden ózi jınap júrgen qarjysyn Qulsary qalasynyń turǵyndaryna aýdardy. Onyń qaıyrymdy isi kópshiliktiń júregine izgilik syılady. Álemde qaıyrymdylyq, izgilik ornaǵan kezde kez- kelgen qıynshylyqty jeńýge bolatynyn pash etti.
50 myńnan asa eriktiler, myńdaǵan belsendiler, qutqarýshylar, memlekettik qyzmetkerler, bılik ókilderi kún-tún demeı jumys jasap, zardap shekken halyqqa qoldan kelgenshe kómek qolyn sozdy. Ásirese Atyraý qalasyn alapat tasqyn qaýpinen kúres erekshe este qaldy. Halyqtyń kópshiligi kúni-túni jaǵany bekitti. Eki-úsh aptanyń ishinde Atyraý qalasy aýmaǵynan 200 shaqyrymnan asatyn bóget salyndy.
Budan bólek Qazaqstannyń basqa jaǵynda turatyn turǵyndar zardap shekken aımaqtarǵa kezeń-kezeńmen kómekter jóneltti. Kóptegen erikti uıymdar men belsendi azamattar, qoǵamdyq birlestikter osyndaı ıgi isterdiń basy-qasynda bolyp, qıyn-qystaý kezeńde taǵy da uıymshyldyq, birliginiń myǵym ekenin tanytty. Tek Qazaqstan halqy Assambleıasy sý tasqynynan zardap shekken azamattarǵa kómek berý úshin, arnaıy Respýblıkalyq shtab quryp, odan ári qaraı óńirlerde shtabtardy quryp gýmanıtarlyq kómek berý boıynsha jumystardy úılestirdi. Assambleıa músheleri sýdan zardap shekken oblystarǵa «Júrekten júrekke» aksıasy aıasynda 227 tonna gýmanıtarlyq kómek jiberip, 277 mıllıon teńge jınap, qarjylaı kómek kórsetti. Sonymen qatar óńirlerde 10 myńǵa jýyq eriktiler zardap shekken azamattarǵa, qutqarýshylarǵa, áskerı qyzmetkerlerge, qurylysshylarǵa óz kómekterin bergen.
Mundaı mysaldar júzdep sanalady. Barlyǵynyń maqsaty bir boldy, el men jerdi tasqyn sýdan aman alyp qalý edi. Maqsatqa halyq bolyp jetip, apattyń zardabymen bútin el bolyp kúrese aldyq
Keıin jaǵdaı rettelip, etek-jeńdi jınaǵannan keıin Prezıdent Aqordada sý tasqynymen kúreske belsene atsalysqan azamattardy saltanatty túrde marapattady.
«Syn saǵatta elimiz yrysty yntymaǵyn tanytty. Biz tabıǵı apat kezinde jurt bolyp jumyldyq. Birtutas el ekenimizdi kórsettik. Qutqarýshylar, áskerıler, ishki ister organdary men ákimdik qyzmetkerleri táýlik boıy jumys istedi. Olar Otan aldyndaǵy paryzyn minsiz atqardy. Bir sózben, antqa adal boldy... Alapat sý tasqyndap kelip qalǵanda otandastarymyz tabıǵat apatymen kúresip jatqan qutqarýshylarǵa kómek qolyn sozdy. Olar sý basqan aımaqtarda jaýapty qyzmet mekemelerine járdemdesip, janqıarlyqpen áreket etti ári batyldyq tanytty. Kóbi adamdar men janýarlardy óz kólikterimen qaýipsiz jerge alyp shyqty. Myńdaǵan janashyr azamat tasqyn sýdan qorǵaıtyn bógen salýǵa qatysty. Ortaq kúsh-jigerdiń arqasynda biz jaǵdaıdyń ýshyǵyp ketýine jol bermedik», – dedi Memleket basshysy 19 maýsymda ótken saltanatty jıynda.
Prezdentten alǵys hat alǵandar kóp boldy. Olardyń arasynda veterınar Ǵabıt Mýsınde boldy. Ǵabıt Mýsın Soltústik Qazaqstan oblysy, Qyzyljar aýdanynyń Iakorskıı aýyldyq okrýginde 35 jyldan beri veterınarlyq feldsher bolyp jumys istep keledi. Ol sý tasqyny kezinde joǵary kásibılik pen kóregendik tanytqan. Sý tasqyny kezinde táýliktep jumys istep, óz aýmaǵyndaǵy maldyń barlyǵyn aman alyp qalǵan. Onyń arqasynda erekshe qaýipti aýrýlardyń paıda bolýy men taralýyna jol berilmedi.
«Men ózim mal aýyrsa taǵat tappaıtyn adammyn. Meniń qaramaǵymda 4 aýyldyń maly bar. Onyń barlyǵyna ýaqtyly ekpe salyp, tekserip otyrý qajet. Veterınarıa salasynda jumys istegenime 30 jyldan asty. Talaı qıyn kezeńderdi bastan ótkerdik. Sý tasqyny kezinde jaǵdaı kúrdeli boldy. Alaıda jumyla atqarǵan jumystar nátıjesin berip jatyr. Eńbegimiz de baǵalanyp jatyr», - deıdi Ǵabıt Mýsın Ulys tilshisine.
Qoryty aıtqanda, joǵaryda Prezıdent aıtyp ketkendeı syn saǵatta elimiz yrysty yntymaǵyn tanytip, birtutas el ekenimizdi kórsettik. Yrysy ortaımaıtyn, birligi myǵym el ǵana kez kelgen qıynshylyqqa tótep bere alady.
