Valúta baǵamy
  • USD -

    452.9
  • EUR -

    490.5
  • RUB -

    5.09
SHETELDEGİ QANDASTARǴA ANA TİLİN ÚIRENÝ MÚMKİNDİGİ
06 naýryz 2019
SHETELDEGİ QANDASTARǴA ANA TİLİN ÚIRENÝ MÚMKİNDİGİ

Shetelde ómir súrip jatqan qandastardyń ana tilin erkin meńgerýine jaǵdaı jasalady. Osy maqsatta «Otandastar Qory» men QR Tuńǵysh Prezıdenti – Elbasy qory janyndaǵy Memlekettik tildi damytý Qory yntymaqtastyq týraly memorandýmǵa qol qoıdy. «Otandastar Qory» baspasóziniń habarlaýynsha, qujatta sondaı-aq memlekettik tildiń rólin arttyrý men  til saıasatynyń tıimdi iske asýyna atsalysý máseleleri de qarastyrylǵan.

«Otandastar Qorynyń» Birinshi vıse-prezıdenti Talǵat Adýovtyń aıtýynsha, jaqyn arada sheteldegi qandastarǵa arnalǵan qazaq tilin qashyqtyqtan úırenýdiń tegin kýrstary bastalady. Sabaqtar Skype arqyly onlaın rejımde ótetin bolady.

"Osy maqsatta biz ár eldegi múddeli qazaq etnomádenı jáne qoǵamdyq birlestiktermen tyǵyz baılanys ornatpaqpyz. Solardyń kómegimen ınteraktıvti taqtalarmen jabdyqtalatyn arnaıy qazaq tili kabınetterin uıymdastyramyz. Bul bastamamyz jeksenbilik mektepter jelisi sıaqty bolady. Iaǵnı, tildi úırenýshiler óz betinshe oqyp qana qoımaı, ózi sıaqty basqa da tálimgerlermen birge jınalyp, aralasa alady, sabaqty birigip óte alady. Tildi kez kelgen ýaqytta kabınetten tys onlaın oqı alý múmkindiginen bólek, olardyń betpe-bet jolyǵý alańyn uıymdastyrýymyz kerek dep sanadyq".

Memlekettik tildi damytý qorynyń basshysy Azat Sháýeevtiń sózine súıensek, sheteldik otandastar úshin qazaq tilin ıgerýdiń ınovasıalyq ádisterge negizdelgen tıimdi júıesi ázirlenýde.

"Qashyqtyqtan oqytý júıesi týraly aıtar bolsaq, bizdiń «Soyle.kz» portaly negizindegi mol tájirıbemiz bar. Bul qazaq tilin ınternet arqyly onlaın rejımde úıretetin Qazaqstandaǵy alǵashqy tegin joba. Ol úlken zertteý men taldaýdyń, osy saladaǵy basqa da elderdiń tájirıbesine úńilýdiń nátıjesinde júzege asty. Sonymen qatar, sheteldik qandastardyń da suranystaryn barynsha eskerýge tyrysyp jatyrmyz. Máselen, olardyń yńǵaılylyǵy úshin biz portaldyń aǵylshyn-latyn nusqasyn da jasap shyǵardyq. Endi qazaq tilin latyn álipbıimen úırenýge bolady".

Sonymen qatar, kelisim aıasynda til saıasaty jónindegi is-sharalardy birlesip uıymdastyrý, elektrondyq aqparattyq keńistikte memlekettik tildi damytýǵa yqpal etetin otandyq saıttar jumysyna járdemdesý jáne sheteldegi otandastarǵa arnalǵan qazaq tili boıynsha oqý quralyn ázirleý kózdelgen.

RELATED NEWS
EKİ APTADA EKİ ALTYN
17 qańtar 2019
EKİ APTADA EKİ ALTYN

Sheteldegi qandastar arasynda qara úzip júrgen talaı talant bar. Solardyń biri Mońǵolıa elinde turatyn jas palýan — Serik Berdimuratuly. Qazaqstandaǵy jarystarǵa jıi qatysyp, jarqyrap kórinip kele jatqan sportshyny muqym qazaq jaqsy tanıdy. Endi mine, KAZNEWS.MN saıtynyń jazýynsha, búgin Ýlaanbaatar qalasynda sambodan eresekter arasynda ótken Mońǵolıa birinshiliginde óz salmaǵynda chempıon atanǵan.

Ótken apta ǵana dzúdo kúresinen Selenge aımaǵynyń Súhbaatar qalasynda erler men áıelder arasyndaǵy ótken Mońǵolıa  chempıonatynda 100 keli salmaqta beldesken Serik Berdimuratuly qarsylas shydatpaı altyn medal alǵan bolatyn. Serik Berdimuratuly jartylaı fınalda 2017, 2018 jylǵy el chempıony G.Altanabaganadan basym túsip, fınaldyq kezdesýde qarsylasy D.Serennámdy aıaqtan ilip shalý ádisi boıynsha vazarı upaıymen jeńgen edi. Al búgin mine, sambodan Mońǵolıa chempıony atandy. Esterińizge sala ketsek, Serik Berdimuratuly sambodan eresekter arasynda úshinshi ret el chempıony atanyp otyr. Ol, buǵan deıin 2014, 2017 jyldary chempıon bolǵan edi. Al dzúdo kúresi boıynsha Serik Berdimuratuly 100 keli salmaq boıynsha el birinshiliginiń 2017 jyly qola júldesine ıe bolǵan bolatyn. Osylaısha, ol Baıan-Ólgıı sport tarıhynda alǵash ret dzúdodan eresekter arasynda El chempıony atandy. Eki aptada eki salmaq boıynsha Mońǵolıa chempıony atanǵan qazaq balasyna ázirshe teń keler qarsylas joq.

 

ÁLEMNİŃ TABYSTY QAZAQTARY BAS QALADA BAS QOSTY
03 sáýir 2019
ÁLEMNİŃ TABYSTY QAZAQTARY BAS QALADA BAS QOSTY

Qordyń baspasóz qyzmetiniń habarlaýynsha, qazaq dıasporasy ókilderimen «Otandastar Qory» KEAQ Prezıdenti Nurtaı Ábiqaev pen Dúnıejúzi qazaqtary qaýymdastyǵy Tóraǵasynyń birinshi orynbasary Zaýytbek Turysbekov kezdesti. Olar elge kelgen qonaqtarǵa merekelik lebiz-tilegin arnap, Elbasy tapsyrmasymen qurylǵan «Otandastar Qorynyń» maqsat-múddesin túsindirdi.

«Álemge tarydaı shashylǵan qazaq balasyn biz esh ýaqyt umytqan emespiz, umytpaımyz da. Barlyq qandasty tarıhı otan tóńireginde birlestirý, qoldaý úshin Dúnıejúzi qazaqtarynyń 5-shi quryltaıyndaǵy Elbasy tapsyrmasymen «Otandastar Qory» komersıalyq emes aksıonerlik qoǵamy quryldy. Elge oralǵan jáne shetelde turatyn qazaqtardy qoldaý maqsatyndaǵy jobalarymyzdy qazir júıelep, ázirlep jatqan jaıymyz bar. Búgingi kezdesýimizdiń maqsaty da sol – qıyrdaǵy qandastarymyzdyń shoqtyǵyn asyrý, sondaı-aq olardyń ulttyq bolmysyn saqtap qalý jolynda ózderińizben kúsh biriktirý», - dedi Nurtaı Ábiqaev.

Otandastar kezdesýinde áıgili qazaq boksshysy Qanat Islam álemniń túkpir-túkpirinde júrgen qandastardy qazaqtyń birigýi jolynda aıanbaı eńbek etýge shaqyrdy. Óz kezeginde, kásipqoı sportshy boksty qazaq balalary arasynda damytýǵa baǵyttalǵan jobalardy qolǵa alyp, júzege asyryp jatqandyǵyn baıan etti.

Kezdesýdiń taǵy bir keıipkeri – qobyzshy, Taraz qalasynyń týmasy Áıgerim Ersaıynova Fransıadaǵy «Qorqyt» qazaq mádenıet ortalyǵyn basqarady. Onyń aıtýynsha, ortalyqty qurbysy ári attasy Áıgerim Mataeva ekeýi úsh jyl buryn ashqan. Tuńǵysh qazaq mádenıet ortalyǵyn ashýǵa Fransıadaǵy asyrandy qazaq balalary sebep bolypty.

«Tarıhı otanǵa, ata-analaryna birshama jaqyn bolǵysy kelgendikten, asyrap alynǵan qazaq balalary orys mádenı ortalyqtaryna baryp júrgen eken. Osy nárse bizdiń namysymyzǵa tıdi. Sol úshin óz qarajatymyzdy quıyp, tuńǵysh qazaq mádenıet ortalyǵyn ashtyq. Alǵashqy eki jyly, tar bolsa da kishkentaı ǵımarattyń bir bólmesin jalǵa berip, túrik aǵaıyndar qol ushyn sozdy. Qazirgi tańda Fransıadaǵy Qazaqstan elshiligindegi mádenıet, ǵylym jáne bilim bólimindemiz. Qazaq dıasporasy kóp shoǵyrlanǵan Fransıa memleketinde bizdiń ónerimiz ben ana tilimizge degen qushtarlyq óte zor. Qazaqtyń ulttyq aspaptary men fortepıanony,  ana tilimiz ben qolónerdi taǵdyr tálkegimen fransýz shańyraǵynda ósip-ónip jatqan ózimniń qarakóz baýyrlarymnan bólek, fransýzdarǵa da úıretip jatyrmyz. Qazirgi ýaqytta qazaq ádebıetine kóp kóńil bólgimiz keledi. Ol úshin bizge latyn álipbıindegi kitaptar qajet», - deıdi Áıgerim Ersaıynova.

Elorda tórinde ótken kezdesýge Ýkraınadan kásipker-qandasymyz Nurtaı Kenjebekov te qatysty. Ol óz sózinde qandastarymyzdyń arasyndaǵy jaǵdaıy nashar otbasylardyń balalaryn mamandandyrý jobasyn qazaqstandyq tarappen birigip júzege asyryp jatqandyǵy týraly aıtty. Maltanyń joǵarǵy oqý orny negizinde mamandanatyn túlekter joba aıaqtalǵan soń Qazaqstanda jumyspen qamtylady eken. Sondaı-aq, kásipker tarıhı otanda «Úmit» Qorynyń negizin qalap, «Otandastar» Qorymen seriktesý arqyly «Astana Hab» negizinde IT-mamandaryn oqytý mektebi dep atalatyn jańa jobanyń tusaýyn kespek nıeti týraly da aıtyp ótti.

Reseıden kelgen Torǵyn Áshenova – Omby qalasynyń týmasy. RF İİM qarasty Omby akademıasynda Quqyq jáne memleket tarıhy men teorıasy kafedrasynyń aǵa oqytýshysy bolyp qyzmet etetin qandasymyz zań ǵylymdarynyń kandıdaty, sondaı-aq ıdeolog ári belsendi qaıratker eken. Ózi negizin qalaǵan jergilikti «Omby qazaqtary» uıymyn basqarady. Aıtýynsha, reseılik qandastar úshin týǵan til máselesi ótkir bolyp tur. Osyǵan «Otandastar Qory» men Qaýymdastyqtyń kóp kóńil bólýin surady. Torǵynnyń basqarýyndaǵy uıym da qazir qazaq tiliniń qoldaný aıasyn keńeıtý, ulttyq mádenıetti nasıhattaý maqsatynda eńbektenip jatqandyǵyn aıtty.

Al Qytaı elindegi qandasymyz Talaphan Pátihanuly sol til máselesin sheshýdiń utymdy jolyn oılap taýypty. Ol kezdesý barysynda balalardyń qazaq tilin ońaı úırenýine arnalǵan avtorlyq jobasy «Qasterli qalam» oqý quralymen tanystyrdy. Aıtýynsha, ol arqyly bala qazaqtyń ertegi-ańyzdaryn, maqal-mátelderin, óleń-jyrlaryn, esep-qısabyn, jańyltpashtaryn, tipti Alash ardaqtylarynyń sýreti, aty-jóni, eńbegine deıin meńgerip shyǵady.

Kezdesý aıasynda «Otandastar Qory» shaqyrylǵan qonaqtarmen ekijaqty seriktestik memorandýmdarǵa qol qoıyp, sheteldegi qazaq dıasporalary men elge oralǵan otandastardy qoldaý, qandastardy tarıhı otan tóńireginde birlestirý baǵytynda kúsh biriktirýge kelisti.

 

SHETELDEGİ QANDASTARDYŃ JOǴARY BİLİM ALÝYNA QOLDAÝ JASALADY
26 aqpan 2019
SHETELDEGİ QANDASTARDYŃ JOǴARY BİLİM ALÝYNA QOLDAÝ JASALADY

Búgin «Otandastar» Qory birinshi vıse-prezıdenti Talǵat Adýov pen Halyqaralyq baǵdarlamalar ortalyǵynyń prezıdenti Janbolat Meldeshov kezdesti. Taraptar bilim salasyndaǵy yntymaqtastyq týraly memorandýmǵa qol qoıdy. Bul týraly qordyń baspasóz qyzmeti aqparat taratty.

DIDAR BOLAT – «OTANDASTAR» QORY PREZIDENTİNİŃ KEŃESSHİSİ:  «Bolashaq» – stýdent jastardy Qazaqstanǵa jáne kerisinshe Qazaqstannan sheteldik joǵary oqý oryndaryna tartatyn negizgi uıymdardyń biri. Osyny negizge ala otyryp, biz kúsh biriktirgeli otyrmyz. Mundaǵy maqsat – shetelde turatyn qandastarymyzdyń qalaýynsha Qazaqstanda nemese sheteldiń áıgili joǵary oqý oryndarynda bilim alý múmkindigin qamtamasyz etý».

Jaqyn kúnderi «Otandastar» qory men Halyqaralyq baǵdarlamalar ortalyǵy ókilderiniń Mońǵolıa, Ózbekstan jáne Reseı Federasıasyna birlesken sapar jasaıdy.  Olar sheteldegi qandastarmen, dálirek mektep oqýshylarymen kezdesip, Qazaqstanda jáne sheteldik jetekshi joǵarǵy oqý oryndarynda bilim alý múmkindikteri jaıly aqparattandyratyn bolady.

DIDAR BOLAT – «OTANDASTAR» QORY PREZIDENTİNİŃ KEŃESSHİSİ:  «Kelesi aıda biz Mońǵolıaǵa, 120 myńǵa jýyq qazaq turatyn Baıan-Ólgeı aýdanyna attanamyz. Ondaǵy qandastarymyzdyń shamamen bir jarym myńy - bıylǵy mektep bitirýshi túlekter. Iaǵnı qazaqstandyq bilim ordalaryna túse alatyn áleýetti stýdentter. Máselen, ótken jyly Ózbekstannan Qazaqstanda bilim alýǵa 12 myń bala kelse, onyń 5 myńǵa jýyǵy – etnıkalyq qazaqtar. Olarǵa yńǵaıly tıimdi jaǵdaıdyń barlyǵy jasaldy. Aqtóbe ýnıversıteti bir jyl boıy tegin oqý múmkindigin usyndy. Mundaı baǵdarlamalar bizde kóp, tek qandastarymyzǵa aqparat kóp jaǵdaıda jetpeı jatady. Biz osy aqparattandyrý baǵytynda jumys isteıtin bolamyz».

«Otandastar» qory 2017 jyly Elbasynyń Dúnıejúzi qazaqtarynyń V-shi quryltaıynda aıtqan tikeleı tapsyrmasymen qurylǵan bolatyn. Qor qandastardy tarıhı otan tóńireginde birlestirýdi maqsat tutady. Jumys josparyndaǵy basym baǵyttarynyń biri – bilim salasy.

Biz týraly
ulys.kz — aqparattyq, saraptamalyq jáne tanymdyq baǵyttaǵy materıaldardy beredi.
 
Mýltımedıalyq joba zaman talabyna saı jasalǵan. Qazaqstannyń aqparattyq naryǵyn sapaly
kontentpen qamtamasyz etýge úles qosýǵa baǵyttalǵan. Mundaǵy saraptamalyq, tanymdyq
maqalalar san salany qamtıdy. Geostrategıa, geoekonomıka, geosaıasat, halyqaralyq
qatynastar men eldiń ishki-syrtqy saıasaty, ekonomıka, jahanda bolyp jatqan tektonıkalyq
ózgerister men trend taqyryptar ulttyq múdde turǵysynan tereń taldanyp qazaq
oqyrmandaryna jetkiziledi. Ortalyq Azıa men Túrki álemine erekshe kóńil bólinedi.