QR Premer-Mınıstri Asqar Mamın Túrkıa Respýblıkasyna jumys sapary aıasynda Prezıdent Rejep Erdoǵanmen jáne Vıse-prezıdent Fýat Oktaımen kelissózder júrgizdi. «Sonymen qatar, Qazaqstan–Túrkıa úkimetaralyq ekonomıkalyq komısıasynyń Hİ otyrysyna, ekijaqty bıznes-forýmnyń ashylýyna jáne túrik bıznesiniń kapıtandarymen kezdesýge qatysty» dep habarlaıdy úkimet basshysynyń baspasóz qyzmeti.
«Elderimiz arasyndaǵy yntymaqtastyq barlyq salada qarqyndy túrde damyp jatyr, ekijaqty qatynastardy sapaly jańa deńgeıge shyǵarýdyń negizi salyndy. Qazaqstannyń Tuńǵysh Prezıdenti – Elbasy N. Nazarbaev pen Memleket basshysy Q. Toqaev Túrkıany Qazaqstannyń mańyzdy ári strategıalyq seriktesteriniń biri retinde qarastyrady», — dedi A. Mamın Ankara qalasynda R. Erdoǵanmen kezdesýde.
Qazaqstanda túrik kapıtalynyń qatysýymen 4200-den astam kompanıa tirkelgen, olar energetıka, kólik, agroónerkásip, mashına jasaý sektorlarynda, ınfraqurylymdyq qurylysta jáne basqa da salalarda qyzmet kórsetedi. Osy jyldyń 9 aıynyń qorytyndysy boıynsha ekijaqty taýar aınalymy $2,3 mlrd-qa jetti, bul 2018 jyldyń sáıkes kezeńindegi kórsetkishten 68%-ǵa artyq. Osy jyldyń sońyna qaraı ekijaqty saýda-sattyq kólemi $3 mlrd asady dep kútilýde. Qazirgi kezde túrik tarapymen birlesip pysyqtalyp jáne iske asyrylyp jatqan ınvestısıalyq jobalar pýly $6 mlrd-tan asady.
Kelissózder barysynda saýda-ekonomıkalyq, ınvestısıalyq, kólik-logıstıka, aýyl sharýashylyǵy jáne basqa da salalardaǵy yntymaqtastyqty odan ári damytý máseleleri talqylandy.
A. Mamın QR Tuńǵysh Prezıdenti – Elbasy N. Nazarbaevtyń monýmentine baryp, Atatúrik kesenesine gúl shoǵyn qoıdy jáne R. Erdoǵanmen birge Túrkıada ótkizilip jatqan «Bolashaqqa tynys ber» ekologıalyq naýqany aıasynda aǵashtar otyrǵyzdy. Sonymen qatar, Úkimet basshysy TR Saýda-ónerkásip palatasynyń jumysymen tanysty, onyń ishinde Túrkıanyń memlekettik organdaryn sıfrlandyrý jumystary da bar.
QR Premer-Mınıstri A. Mamın TR Vıse-prezıdenti F. Oktaımen Stambýlda Qazaqstan–Túrkıa úkimetaralyq ekonomıkalyq komısıasynyń Hİ otyrysyna qatysty.
Shara qorytyndysy boıynsha saýda jáne ınvestısıalar, ónerkásip, kólik, bilim berý, densaýlyq saqtaý, týrızm tárizdi jáne t.b. salalarda 65 pýnktten turatyn Birlesken is-qımyldar jospary qabyldandy. Budan ózge, halyqaralyq aralas júkterdi tasymaldaý týraly úkimetaralyq kelisimge, 2019-2021 jyldarǵa arnalǵan «Jańa sınergıa» birlesken ekonomıkalyq baǵdarlamasy boıynsha is-qımyldar hattamasyna, sondaı-aq, QR Saýda jáne ıntegrasıa mınıstrligi men TR Saýda mınıstrligi arasyndaǵy «halal» sanatyndaǵy ónimder boıynsha yntymaqtastyqty damytýǵa baǵyttalǵan ózara túsinistik týraly memorandýmǵa qol qoıyldy.
A. Mamın men F. Oktaı 500-ge jýyq túrik jáne 100 qazaqstandyq iskerlik ortalardyń ókilderiniń qatysýymen Qazaqstan–Túrkıa bıznes-forýmyn ashty. Forým aıasynda ınfraqurylym, ındýstrıa, kólik-logıstıka salalarynda, densaýlyq saqtaýda, qarjy naryǵyn damytýda, memlekettik-jekeshelik áriptestikte tájirıbemen almasý jáne t.b. salalarda birlesken jobalardy iske asyrýdy qarastyratyn, jalpy $1,5 mlrd somasyna 18 qujatqa qol qoıyldy.
Atap aıtqanda, Qazaqstanda qatparkarton qaptama, lak-boıaý ónimderi óndiristerin, «Aqtóbe–Gebze» ındýstrıalyq aımaǵyn ashý, Túrkistan qalasyn ınfraqurylymdyq damytý, sondaı-aq, Almaty men Qaraǵandyda ýnıversıtettik klınıkalar salý, Kókshetaý, Qyzylorda, Aqtaý, Atyraý, Aqtóbe, Tarazda kópbeıindi aýrýhanalar salý, Shymkent pen Aqtóbede dıagnostıkalyq ortalyqtar salý týraly ýaǵdalastyqtarǵa qol jetkizildi.
Qazaqstan Premer-Mınıstri Túrkıanyń 41 iri kompanıasynyń basshylarymen – QR ekonomıkasynyń qazirgi jáne áleýetti ınvestorlarymen kezdesti. Asqar Mamın túrik bıznesiniń kapıtandarymen ekijaqty kelissózder, sonymen qatar, «dóńgelek ústel» formatynda ortaq kezdesý ótkizdi. Úkimet basshysy túrik bıznesmenderin Túrkistan qalasynyń túrki áleminiń mádenı-rýhanı ortalyǵy retinde jańǵyrýy men damýyna úles qosýǵa shaqyrdy.
Túrkıaǵa sapary aıasynda A. Mamın Qaıseri qalasyna baryp, onda 2018 jyldan bastap qyzmet kórsetetin, memlekettik-jekeshelik áriptestik modeli boıynsha júzege asyrylǵan Túrkıanyń densaýlyq saqtaý salasyndaǵy alǵashqy jobasyna aınalǵan qalalyq aýrýhana qyzmetimen tanysty.
Sýretter primeminister.kz saıtynan alyndy.
