Búgin Qyzylordada «Anaǵa taǵzym» respýblıkalyq analar forýmy ótti. Bul týraly Mádeneıt jáne aqparat mınıstrligi habarlaıdy.
İs-sharaǵa QR Prezıdenti janyndaǵy Áıelder isi jáne otbasylyq-demografıalyq saıasat jónindegi Ulttyq komısıanyń tóraǵasy Aıda Balaeva, qoǵam qaıratkerleri, óńirlerden kelgen delegasıalar, Qyzylorda oblysynyń kópbalaly analary qatysty.
Ulttyq komısıamen birigip uıymdastyrylǵan forýmda Qyzylorda oblysy ákimi Nurlybek Nálibaev qatysýshylarǵa arnap sóz sóıledi. Forýmnyń maqsaty – áıel men anany qurmetteý, óskeleń urpaqty rýhanı-adamgershilik tárbıe berý, izgi qundylyqtardy qoǵamda nasıhattaý.
Egemen elimizdiń damýy men gúldenýine qyz-kelinshekterdiń de úlesi óte zor. Sondyqtan áıelderdiń qoǵamdaǵy rólin, múmkindikterin arttyrý – memlekettik saıasattyń basym baǵyttarynyń biri.
Bul salada Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy iske asyrylýda. Onda otbasy ınstıtýty men genderlik teńdikti damytýdyń qazaqstandyq modeli aıqyndalǵan. Áıelder isteri jáne otbasylyq-demografıalyq saıasat jónindegi Ulttyq komısıa óziniń tıimdiligin kórsetti. Memleket basshysy belgilegen basymdyqtarǵa sáıkes, onyń qyzmeti áıelder men balalardyń quqyǵyn qorǵaý salasyndaǵy ózekti máselelerdiń aýqymyn pysyqtaýǵa. Genderlik teńdikti qamtamasyz etýdiń quqyqtyq jáne ınstıtýsıonaldyq negizi qalyptasty. Áıelderge qatysty kemsitýshilikti joıý jáne teńdikti saqtaý boıynsha zańnamalyq normalar jumys isteıdi.
Ulttyq komısıanyń baqylaýynda on shaqty mańyzdy másele bar. Olardyń qataryna áıelder arasyndaǵy jumyssyzdyqty azaıtý máselesi de kiredi.
Osyǵan baılanysty óńirlerde áıelder kásipkerligin damytý maqsatynda 20 ortalyq ashyldy. «TECHNOWOMEN» qaýymdastyǵymen, «BTS Education» kompanıasymen birlesip, elektrondy komersıa mektebi ashyldy, 1400 qazaqstandyq qolónershige marketpleısterde satý úıretildi.
Astana Hub-pen birlesken «IT Ayel» jobasy sheńberinde Qazaqstannyń 17 óńirinen 2000 jumyssyz áıel IT mamandyqtary boıynsha bilim alyp, alǵashqy jobalaryn jasady.
Abaı, Jetisý, Ulytaý oblystaryndaǵy áıelderdiń áleýmettik jaǵdaıyn keshendi zertteý nátıjeleri boıynsha aýyl áıelderin jumysqa tartý boıynsha naqty sharalar ázirlendi.
BUU Halyq qorymen (IýNFPA) birlesip, Astana jáne Shymkent qalalarynda nekege deıingi tegin keńes berý jáne nekeni tirkeýge ótinish bergen azamattarǵa otbasyn josparlaý men otbasylyq psıhologıa, otbasylyq búdjetti josparlaý jáne basqa da mańyzdy máseleler boıynsha oqytýdyń pılottyq jobasy iske qosyldy.
Óńirlerde jumys isteıtin 68 otbasyn qoldaý ortalyqtaryna transformasıalaý júrgizilýde. Otbasyn qolaısyz áleýmettik ortadan shyǵarýda, áıelderge qatysty zorlyq-zombylyqtyń aldyn alýda vedomstvoaralyq ózara baılanys ornatý maqsatynda otbasyn qoldaý ortalyqtary úshin biryńǵaı tujyrymdama jobasy ázirlendi.
Ulttyq komısıa tóraǵasy barlyq baǵyttar boıynsha jumystar jalǵasatynyn erekshe atap ótti.
Forýmǵa qatysýshylar óskeleń urpaqty tárbıeleý, otbasy mártebesin kóterý, adamgershilik-otbasylyq qundylyqtardy qalyptastyrýda ózekti máselelerdi talqylady.
Sonymen qatar Mınıstr Qyzylordadaǵy «Óner ortalyǵynyń» ashylýyna qatysyp, «Syr óńiri óneri tulǵalarynyń ekspozısıalyq kartınasy» kórmesimen tanysty.
Mádenıet nysanynyń qurylysy Qyzylordada 2022 jyldyń qyrkúıeginde bastaldy. Munda sımfonıalyq, estradalyq konsertterdi, túrli formattaǵy is-sharalardy ótkizý úshin jaǵdaı jasalǵan.