Bas prokýratýra azamattardy ońtústikten soltústik óńirlerge erikti túrde qonys aýdarý baǵdarlamasyn iske asyrýǵa bólingen memlekettik qarajattyń jumsalýyna taldaý júrgizdi. Onyń nátıjesinde jalǵan qujattardy paıdalana otyryp, azamattardy jalǵan qonys aýdarý jolymen 1 mlrd teńgeden astam qarajatty jymqyrý jáne ony teris paıdalaný faktileri anyqtaldy, dep habarlaıdy Ulys.
Qonys aýdarýshylar bolyp jalǵan adamdar esepke alynǵan, al qujattar tómen baǵamen satyp alynǵan kórineý turýǵa jaramsyz nemese apatty ǵımarattarǵa rásimdelgen. Keıbir jaǵdaılarda azamattar ózderiniń qujat boıynsha qonys aýdarylǵanyn bilmegen de. Mundaı faktiler SHQO, Qaraǵandy, Aqmola, Qostanaı, Abaı jáne Ulytaý oblystarynda anyqtaldy.
Mysaly, Pavlodar oblysynyń Ýspen aýdanynda «Eńbek mobıldiligi ortalyǵy» KMM-niń qyzmetkeri arzan úılerdi taýyp, qonys aýdarýshylarǵa joǵary baǵamen satýdy usynyp, memleketten alynǵan qarajattyń bir bóligin ózine qaldyryp otyrǵan. Qazir sotqa deıingi tergep-tekserý júrgizilip, ortalyqtyń qyzmetkeri úıqamaqqa alyndy.
SHQO-da qonys aýdarýshylar men satýshylar arasynda sóz baılasý jaǵdaılary anyqtaldy, olar memlekettik kómekti alý úshin jalǵan sharttar jasap, odan keıin bul qarajatty bólisken. Odan ári azamattar burynǵy mekenjaılarynda tura bergen. Soltústik Qazaqstan oblysynyń Mámlút aýdanynda qonys aýdarýshy úıdiń naqty baǵasy men memleketten tólengen qarajattyń arasyndaǵy aıyrmashylyqty ıemdenip alǵan. Kúdikti alaıaqtyq jasaǵany úshin kináli dep tanylyp, bir jylǵa bas bostandyǵyn shekteýge sottaldy.
Jalpy prokýrorlar sotqa deıingi 20 isti bastady.
Transparency International «Sybaılas jemqorlyqty qabyldaý ındeksi» halyqaralyq reıtıńinde 2024 jyly Qazaqstan nátıjelerin taǵy da jaqsartty, dep habarlaıdy Ulys Antıkorǵa silteme jasap.
Álem boıynsha ortasha bal – 43, al «Shyǵys Eýropa jáne Ortalyq Azıa» aımaǵynda (19 el) 35 boldy.
Qazaqstan reıtıńiniń 2016 jyldan bastap aıtarlyqtaı ósken el retinde atap ótildi – 11 balǵa (29 baldan) ósý.
«Ortalyq Azıa óńiri elderiniń ishinde Qazaqstan eń joǵary pozısıany ıelenedi jáne reıtıńti jaqsartqan jalǵyz el bolyp sanalady. Indekste Qazaqstannan keıin Úndistan (38), Indonezıa (37), Argentına (37), Serbıa (35), Ýkraına (35), Brazılıa (34), Taıland (34), Túrkıa (34), Belarýs (33), Reseı (22) jáne t.b. elder ornalasqan. Jemqorlyqty qabyldaý ındeksi Qazaqstannyń reıtıńin shyǵarý úshin 9 túrli uıymnyń derekteri paıdalanylǵan kompozıttik ındeks bolyp sanalady. Reıtıń memlekettik sektordaǵy sybaılas jemqorlyqty qabyldaýdyń saraptamalyq jáne bıznes-baǵalaýlaryna negizdelgen», - delingen Antıkor habarlamasynda.
Parlament Májilisiniń burynǵy tóraǵasy Nurlan Nyǵmatýlınniń aǵasy Arǵyn Nyǵmatýlın tergeý bastalǵanǵa deıin elden ketip qalǵan. Bul týraly Sybaılas jemqorlyqqa qarsy is-qımyl agenttigi tóraǵasynyń orynbasary Darhan Quraqbaev málimdedi, dep habarlaıdy Ulys.
«Biz onyń Qazaqstanda emes ekenin bilemiz. Tergeý bastalǵanǵa deıin elden ketip qalǵan. Ol Qazaqstanda emes. Ony izdeý jáne elge qaıtarý boıynsha sharalar júrip jatyr. İzdeý sharalary barlyq eldi qamtıdy, oǵan memleketaralyq izdeý jarıalanǵan», - dedi Quraqbaev Senat kýlýarynda jýrnalıserdiń suraǵyna jaýap berip.
Esterińizge salaıyq, naýryz aıynyń basynda 69 jastaǵy Arǵyn Nyǵmatýlınge izdeý jarıalanǵany habarlandy. Ony izdeýge prokýratýra bastamashy bolǵan, al izdeý sharalaryn Antıkor júrgizedi.
Qazaqstan fýtbol federasıasynyń burynǵy basshylyǵyna qatysty tergeý júrip jatyr, dep habarlaıdy Ulys.
Qarjy monıtorıńi agenttigi Barmenqulovqa, sondaı-aq federasıanyń birqatar burynǵy qyzmetkerlerine qatysty tergeý áreketteri men tintý jumystaryn júrgizip jatyr.
Barmenqulov 2021-2024 jyldar aralyǵynda QFF basshysy qyzmetin atqarǵan.19 qarashada uıymnyń kezekten tys otyrysynda ol qyzmetinen ketti.
BAQ tarapynan kelip túsken suranystarǵa baılanysty, QMA Qazaqstan fýtbol federasıasynyń buryńǵy basshylyǵyna qatysty sotqa deıingi tergeýdi bastaǵanyn rastaıdy,- delingen Qarjy monıtorıńi agenttigi habarlamasynda.
