8 mamyr kúni qyrǵyz-tájik memlekettik shekarasynda qarýly qaqtyǵys boldy. Oqys oqıǵa barysynda Qyrǵyz tarapynan 30-40 adam jáne Tájikstan tarapynan 30-40 adam bir-birine tas ata bastap, sońynda ańshy myltyǵynan oq atylǵan. Janjaldyń ýshyǵyp ketýine jol bermeý úshin Qyrǵyzstannyń jáne Tájikstannyń shekara kezekshiligi áýege birneshe márte eskertý oǵyn atýǵa májbúr boldy.
Osy jaǵdaıdan keıin Qyrǵyzstan men Tájikstan shekarasyndaǵy qarýly qaqtyǵysqa baılanysty eki el narazylyq notalarymen almasty.
Qyrǵyzstandyq Kabar agenttiginiń habarlaýynsha, Tájikstannyń Qyrǵyz Respýblıkasyndaǵy Tótenshe jáne Ókiletti Elshisi N.Alızoda Qyrǵyzstannyń memlekettik shekarasynda 8 mamyr kúni qyrǵyz-tájik memlekettik shekarasynda bolǵan qarýly qaqtyǵysqa baılanysty Qyrǵyzstan syrtqy ister mınıstrligine shaqyrylǵan. Tájik dıplomatyna Qyrǵyz Respýblıkasynyń Syrtqy ister mınıstrligi áskerı qyzmetshiler men Qyrǵyzstan azamattaryn uńǵyastylyq granata oqtary bar avtomattardan, sonyń ishinde toptyq mınomet qarýlarynan maqsatty atylyp, saldarynan shekara qyzmetiniń úsh áskerı qyzmetshisi jáne Qyrǵyzstannyń bir jergilikti turǵyny atylǵan oqtan aýyr jaraqat alýyna baılanysty narazylyq notasyn tapsyrdy.
Sondaı-aq, bolǵan jaǵdaıǵa baılanysty Qyrǵyz Respýblıkasynyń Tájikstan Respýblıkasyndaǵy Tótenshe jáne Ókiletti Elshisi Janysh Rústenbekov Syrtqy ister mınıstrligine shaqyryldy.
Tájikstandyq «Hovar» agenttiginiń habarlaýynsha, Elshige Tájikstan Respýblıkasynyń Syrtqy ister mınıstrligi qarýly qaqtyǵysqa alyp kelgen Qyrǵyzstan azamattary men áskerı qyzmetkerleriniń arandatýshylyq áreketterine baılanysty narazylyq notasyn tabys etti.
Onda Qyrǵyz Respýblıkasynyń azamatynyń oq atýy, sondaı-aq qyrǵyz shekarashylarynyń keıingi áreketteri, Tájikstan shekara bólimshelerin kek qaıtarý sharalaryn qabyldaýǵa májbúr etkeni týraly aıtylǵan.
