Elordada bolyp ótken «Rýhanı Jibek joly. Islam jáne jastar: qazirgi zaman syn-qaterleri» atty IV Halyqaralyq ǵylymı-dinı konferensıada baıandama jasaǵan Bas múftı Serikbaı qajy Oraz Jibek joly elderiniń rýhanı kartasyn jasaýdy usyndy. Bul týraly QMDB baspasóz qyzmeti habarlady.
«Ótkensiz bolashaq joq. Biz ótkennen ónege alǵan halyqpyz. Osy rette áriptesterime Uly Jibek joly elderiniń «Rýhanı kartasyn» jasaýdy usynamyn. Rýhanı karta óskeleń urpaqtyń tarıh pen rýhanıat salasyna qatysty suraqtaryna jaýap beretin beınebir baǵdarsham, shamshyraq bolýy tıis. Tarıhynan taǵylym alǵan, al tarıhı tulǵalardan tálim kórgen urpaq dini men dástúrin úılestirip, ónegeli ómir sabaqtastyǵyn qalyptastyrmaq. Bul bastama tarıhshy ǵalymdar men din ǵulamalarynyń Jibek joly tarıhyn ǵıbrattyń kózimen qaıta zertteýin qajet etedi», – dep atap ótti óz baıandamasynda Serikbaı qajy Satybaldyuly.
«Rýhanı Jibek joly. Islam jáne jastar: qazirgi zaman syn-qaterleri» atty IV Halyqaralyq ǵylymı-dinı konferensıa Qazaqstan jáne Reseı musylmandary dinı basqarmalarynyń uıymdastyrýymen ótti.
Aıta keteıik, konferensıa jumysyna QR Aqparat jáne qoǵamdyq damý mınıstri Dáýren Abaev, Bas múftı Serikbaı qajy Oraz, Reseı musylmandary dinı basqarmasy jáne Reseı múftıler keńesiniń tóraǵasy, múftı, sheıh Ravıl Gaınýtdın, Ózbekstan múftıi Ýsmonhon Alımov, Qytaı Islam qaýymdastyǵynyń tóraǵasy Hasan Fa Mın, Qyrǵyzstan múftıi Maqsatbek qajy Toqtomýshev, Mońǵolıa múftıi Batyrbek Hadys, Fınlándıadaǵy Islam ortalyǵynyń tóraǵasy Golten Bedretdın, t.b. din qaıratkerleri, dinı saladaǵy memlekettik organnyń basshylary, zıaly qaýym ókilderi, jalpy sany 300 delegat qatysty.
Konferensıaǵa qatysqan QR Aqparat jáne qoǵamdyq damý mınıstri Dáýren Abaev jastardyń sanasyna jat aǵymdarǵa qarsy myqty ımýnıtet qalyptastyrý mańyzdy ekenin atap ótti.
«Radıkalızmge adamdar qandaı sebep boıynsha burylyp ketetinin anyqtaý qajet. Oǵan jekelegen adamdardy gýmanısik, ıntellektýaldyq, mádenı jaǵdaılar da ıtermeleýi múmkin. Sondyqtan da zamanaýı zaıyrly memlekettiń din ókilderi aımaqtardaǵy dástúrge mán berip, mádenı baǵyttaǵy, ǵylym men bilim salasyndaǵy artyqshylyqtardy eskerýi tıis dep oılaımyn.
Biz jas urpaqtyń dúnıetanymyn durys qalyptastyrýymyz kerek. Qazirgi jastar óz pikirlerin ashyq aıta alady. Olar básekege qabiletti, bilimge qushtar. Eń bastysy olardyń sanasyna jat aǵymdarǵa qarsy myqty ımýnıtet qalyptastyrý mańyzdy», – dedi Dáýren Áskerbekuly.
2019 – Jastar jyly aıasynda ótkizilgen konferensıa maqsaty – óskeleń urpaqty destrýktıvti aǵymnyń yqpalynan saqtandyrý, olarǵa durys dinı aqparat jetkizý, dinı ekstremızm men terorızmdi aldyn alý maqsatynda Eýrazıa jáne Ortalyq Azıa elderi din qaıratkerleriniń kúshin biriktirý, tájirıbe almasý, «Rýhanı jańǵyrý» ıdeıasyn nasıhattaý, jahandyq dinı máselelerdi sheshýde jańa ádis-tásilderdi usyný, ultaralyq, konfesıaaralyq dıalogty nyǵaıtý, t.b.
Konferensıa sońynda qatysýshylar arnaıy qarar qabyldady.
Sýretter www.muftyat.kz saıtynan alyndy.
